ខេត្តសៀមរាប ៖ សម្តេច វិបុលសេនាភក្តីសាយ ឈុំ ប្រធានព្រឹទ្ធសភាបានថ្លែងថា ប្រទេសរុស្ស៊ីបានជួយគាំទ្រ និងជួយជ្រោមជ្រែងលើគ្រប់វិស័យកម្ពុជាគ្រប់កាលៈទេសៈនៅគ្រាលំបាកនិងបានជួយបណ្តុះបណ្តាលធនធានមនុស្ស ស្របពេលដែលកម្ពុជាត្រូវការធនធានមនុស្ស ដើម្បីរួមចំណែកដល់ការអភិវឌ្ឍប្រទេសជាតិ…
ខេត្តសៀមរាប ៖ សម្តេច វិបុលសេនាភក្តីសាយ ឈុំ ប្រធានព្រឹទ្ធសភាបានថ្លែងថា ប្រទេសរុស្ស៊ីបានជួយគាំទ្រ និងជួយជ្រោមជ្រែងលើគ្រប់វិស័យកម្ពុជាគ្រប់កាលៈទេសៈនៅគ្រាលំបាកនិងបានជួយបណ្តុះបណ្តាលធនធានមនុស្ស ស្របពេលដែលកម្ពុជាត្រូវការធនធានមនុស្ស ដើម្បីរួមចំណែកដល់ការអភិវឌ្ឍប្រទេសជាតិ ។
ការលើកនេះធ្វើឡើងក្នុងជំនួបពិភាក្សាការងារជាមួយលោក ILYAS UMAKHANOV អនុប្រធានក្រុមប្រឹក្សាសហព័ន្ធនៃសភាសហព័ន្ធនៃសហព័ន្ធរុស្ស៊ី កាលពីថ្ងៃទី១៥ ខែមករា ឆ្នាំ២០១៩ នៅសណ្ឋាគាសុខាសៀមរាប ។
សម្តេចសាយ ឈុំ មានប្រសាសន៍ថា «ប្រទេសរុស្ស៊ី គឺជាប្រទេសដែលបានជួយបណ្តុះបណ្តាលធនធានមនុស្សស្របពេលដែលព្រះរាជាណាចក្រកម្ពុជាត្រូវការធនធានមនុស្ស ដើម្បីរួមចំណែកដល់ការអភិវឌ្ឍប្រទេសជាតិ ។ ជាក់ស្តែងអតីតនិស្សិតកម្ពុជាដែលបានទទួលការបណ្តុះបណ្តាលនៅប្រទេសរុស្ស៊ី បច្ចុប្បន្នមួយចំនួនបាននឹងកំពុងតែកាន់តួនាទីសំខាន់ៗជាមន្រី្តជាន់ខ្ពស់ថ្នាក់មធ្យមនៅថ្នាក់ជាតិក៏ដូចជា នៅថ្នាក់ក្រោមជាតិ» ។
ជាមួយគ្នានោះដែរសម្តេចក៏បានអំណរគុណ រុស្ស៊ី ដែលបានជួយគាំទ្រ និងជួយជ្រោមជ្រែងប្រជាជននៃប្រទេសកម្ពុជាលើគ្រប់វិស័យក្នុងកាលៈទេសៈលំបាកបន្ទាប់ពីព្រះរាជាណាចក្រកម្ពុជារំដោះរួចចេញពីរបបប្រល័យពូជសាសន៍ ប៉ុល ពត ។ នេះ គឺជាមនោសញ្ចេតនាមិត្តភាពយ៉ាងជ្រាលជ្រៅមានលក្ខណៈជាប្រវតិ្តសាស្ត្រដែលប្រជាជនកម្ពុជាមិនអាចបំភ្លេចបានឡើយ ។ សម្តេចប្រធានព្រឹទ្ធសភាក៏បានបញ្ជាក់ថា នាពេលបច្ចុប្បន្ននេះរដ្ឋាភិបាលនៃប្រទេសទាំងពីរបានចុះហត្ថលេខាលើឯកសារកិច្ចព្រមព្រៀង និងអនុស្សារណៈយោគយល់គ្នាសំខាន់ៗជាច្រើនវិស័យ និងបានបង្កើតគណៈកម្មការអន្តររដ្ឋាភិបាលកម្ពុជា-រុស្សី សម្រាប់កិច្ចសហប្រតិបត្តិការពាណិជ្ជកម្ម សេដ្ឋកិច្ច វិទ្យាសាស្ត្រ និងបច្ចេកទេសសំដៅរួមគ្នាអភិវឌ្ឍសេដ្ឋកិច្ចសង្គមប្រទេសទាំងពីរឆ្ពោះទៅកាន់សករាជថ្មី ។
ដូច្នេះប្រធានព្រឹទ្ធសភាសម្តែងនូវការគាំទ្រយ៉ាងពេញទំហឹងចំពោះការចុះហត្ថលេខាលើឯកសារកិច្ចព្រមព្រៀងអនុស្សារណៈយោគយល់គ្នា និងចូលរួមជំរុញនៃការអនុវត្តប្រកបដោយការទទួលខុសត្រូវដោយទូលំទូលាយស៊ីជម្រៅ និងប្រកបដោយប្រសិទ្ធភាព ដើម្បីជាគុណប្រយោជន៍ដ៏ធំធេងសម្រាប់ប្រជាជន និងប្រទេសទាំងពីរទាំងក្នុងពេលបច្ចុប្បន្ន និងទៅអនាគត ។
ចំណែកលោក ILYAS UMAKHANOV អំណរគុណចំពោះសម្តេចសាយ ឈុំ បានចំណាយពេលដ៏មានតម្លៃទទួលជួបសវនាការនាឱកាសនេះព្រមទាំងបានសម្តែងនូវការអបអរសាទរចំពោះកម្ពុជាដែលធ្វើជាម្ចាស់ផ្ទះនៃកិច្ចប្រជុំប្រចាំឆ្នាំលើកទី២៧ នៃវេទិកាសភាអាស៊ី-ប៉ាស៊ីហ្វិក (APPF) ។ ការបង្កើតឡើងនៃវេទិកានេះមានរយៈពេល៣៥ឆ្នាំមកហើយដែលមានការទទួលស្គាល់តួនាទីដ៏សំខាន់នៃវេទិកានេះក្នុងការរួមចំណែកដល់ការពង្រឹងទំនាក់ទំនងរវាងសភា និងសភានៅក្នុងតំបន់អាស៊ី-ប៉ាស៊ីហ្វីក កាន់តែជិតស្និត និងល្អប្រសើរឡើង ៕
ចែករំលែកព័តមាននេះ