សហរដ្ឋអាមេរិក-តួកគី ៖ ប្រធានាធិបតីអាមេរិកលោកដូណាល់ត្រាំ កាលពីថ្ងៃទី១៣មករាគំរាមប្រទេសតួកគី ពីគ្រោះមហន្តរាយសេដ្ឋកិច្ចមួយរបស់ប្រទេសនេះ ប្រសិនបើហ៊ានវាយប្រហារប្រឆាំងពួកឃើត ក្រោយការដកថយនាពេលខាងមុខនេះ របស់កងទាហានអាមេរិកចេញពីស៊ីរី តែដោយអំពាវនាវដល់ពួកឃើតកុំឲ្យបង្កហេតុដល់ក្រុងអង់ការ៉ា។ តាមTWITTERលោកត្រាំសរសេរថា…
សហរដ្ឋអាមេរិក-តួកគី ៖ ប្រធានាធិបតីអាមេរិកលោកដូណាល់ត្រាំ កាលពីថ្ងៃទី១៣មករាគំរាមប្រទេសតួកគី ពីគ្រោះមហន្តរាយសេដ្ឋកិច្ចមួយរបស់ប្រទេសនេះ ប្រសិនបើហ៊ានវាយប្រហារប្រឆាំងពួកឃើត ក្រោយការដកថយនាពេលខាងមុខនេះ របស់កងទាហានអាមេរិកចេញពីស៊ីរី តែដោយអំពាវនាវដល់ពួកឃើតកុំឲ្យបង្កហេតុដល់ក្រុងអង់ការ៉ា។
តាមTWITTERលោកត្រាំសរសេរថា សហរដ្ឋអាមេរិកនឹងកម្ទេចសេដ្ឋកិច្ចតួកគី ប្រសិនបើខ្លួនវាយប្រហារពួកឃើត។ លោកក៏អំពាវនាវផងដែរ ឲ្យបង្កើតតំបន់សន្តិសុខមួយមានជម្រៅ៣០គីឡូម៉ែត្រ តែលោកមិនបានបញ្ជាក់ពីតំបន់នោះស្ថិតនៅទីណាឬលើការផ្ដល់ហិរញ្ញវត្ថុឡើយ។ ទន្ទឹមនឹងនេះក្រុងវ៉ាស៊ិនតោនស្នើដល់ពួកឃើតកុំបង្កហេតុលើតួកគី។
សេចក្ដីថ្លែងការណ៍នោះធ្វើឡើងខណៈរដ្ឋមន្ត្រីការបរទេសអាមេរិក លោកMIKE POMPEO មកបំពេញទស្សនកិច្ចនៅមជ្ឈឹមបូព៌ា។ ទស្សនកិច្ចនេះសំដៅធានាពីការទ្រទ្រង់របស់អាមេរិក ចំពោះបណ្ដាសម្ព័ន្ធមិត្តខណៈភាពតានតឹង មានការកើនឡើងរវាងសហរដ្ឋអាមេរិកនិងតួកគី លើបញ្ហាវាសនារបស់ពួកឃើតសីុរី ដែលតស៊ូនៅខាងអាមេរិកប្រឆាំងក្រុមរដ្ឋអ៊ិស្លាម។
លោកPOMPEO ស្វះស្វែងធានាប្រាប់សម្ព័ន្ធមិត្តឃើត ដោយអះអាងពីការធានាដល់កិច្ចការពារពួកគេ ទោះបីលោកត្រាំប្រកាសកាលពីខែធ្នូពីការដកទាហានអាមេរិក២០០០នាក់ដាក់ពង្រាយនៅស៊ីរី ដើម្បីប្រយុទ្ធប្រឆាំងពួកជីហាដក្រុមរដ្ឋអ៊ិស្លាមក្ដី។ អបអរដោយតួកគីតែការដកថយនោះធ្វើឲ្យផុយស្រួយដល់សភាពការណ៍របស់ពួកយុទ្ធជនឃើត។ កងជីវពលឃើតស៊ីរីនៃក្រុមកងឯកភាពការពារប្រជាជន YPG ជាកម្លាំងស្នូលនៅលើទីលាន ក្នុងការប្រឆាំងក្រុមរដ្ឋអ៊ិស្លាម ហើយពេលនេះរងការគំរាមកំហែងដោយលទ្ធភាពនៃការវាយលុកមួយរបស់តួកគី ជាប្រទេសជាប់ជិតខាងស៊ីរី។
ក្រុងអង់ការ៉ាចាត់ទុកពួកYPGថាជាពួកភេរវករ ដោយសារតែពួកគេមានទំនាក់ទំនងជាមួយគណបក្សពលករឃើតឌីស្ថានPKKដែលធ្វើឧទ្ទាមកម្មលើដែនដីតួកគី ចាប់តាំងពីឆ្នាំ១៩៨៤មក។ តួកគីមិនលាក់លៀមឡើយពីចេតនារបស់ខ្លួនបើកការវាយលុកមួយ ប្រឆាំងពួកឃើតស៊ីរិ ដើម្បីចៀសវាងការបង្កើតនៅក្បែរខ្លូន រដ្ឋឃើតមួយ ដែលអាចលើកទឹកចិត្តដល់ការបំបែកខ្លួននិយមរបស់ពួកឃើតតួកគី។
ក្រុងអង់ការ៉ាបញ្ចេញប្រតិកម្មយ៉ាងខ្លាំង ចំពោះព័ត៌មានដែលថាលោកត្រាំគ្រោងដាក់លក្ខខណ្ឌ លើការដកថយរបស់កងទាហានអាមេរិក ទៅនឹងសន្តិសុខរបស់ពួកយុទ្ធជនឃើត៕
ចែករំលែកព័តមាននេះ