ប្រទេសកូរ៉េទាំង២ ៖ វេបសាយឃោសនាកូរ៉េខាងជើង URIMINZOKKIRI និងMEARI កាលពីថ្ងៃទី១៤ ខែមករា ឆ្នាំ២០១៩ បានអំពាវនាវឲ្យមានកិច្ចសហប្រតិបត្តិការសេដ្ឋកិច្ចអន្តរកូរ៉េយ៉ាងសកម្ម ដោយកត់សម្គាល់ថា ការផ្លាស់ប្ដូរគ្នាគ្រប់វិស័យនឹងពុំផ្ដល់ប្រយោជន៍ឲ្យនរណាផ្សេងក្រៅពីកូរ៉េទាំង២ឡើយ។
វេបសាយនោះបន្តថា ការខិតខំប្រឹងប្រែងដោយសកម្មនានាត្រូវតែធ្វើ ដើម្បីពង្រីកកិច្ចសហប្រតិបត្តិការ និងការផ្លាស់ប្ដូររវាងកូរ៉េទាំង២ ក្នុងគ្រប់វិស័យ។ គ្មាននរណាក្រៅពីប្រជាជនយើងឡើយដែលទទួលផលប្រយោជន៍ ពីកិច្ចសហប្រតិបត្តិការនិងការផ្លាស់ប្ដូរទាំងនេះ។
វេបសាយនោះក៏រំឭកពីគម្រោងផ្សេងៗនៃកិច្ចសហប្រតិបត្តិការ ដែលកូរ៉េទាំង២បានធ្វើ កាលពីឆ្នាំទៅមិញក្នុងវិស័យផ្លូវដែក ផ្លូវថ្នល់ ព្រៃឈើ និងសុខាភិបាលហើយបញ្ជាក់ថា ការខិតខំប្រឹងប្រែងទាំងនោះ គឺសំដៅទៅរកការបង្រួបបង្រួម និងសាមគ្គីភាពរវាងកូរ៉េទាំង២ ទោះបីបានការរាំងខ្ទប់យ៉ាងខ្លាំងពីបណ្ដាកម្លាំងខាងក្រៅក៏ដោយ។
ចំណែកវេបសាយ MEARI ជាវេបសាយឃោសនាមួយទៀតរបស់កូរ៉េខាងជើង បានអំពាវនាវឲ្យពង្រឹងកិច្ចសហប្រតិបត្តិការសេដ្ឋកិច្ចអន្តរកូរ៉េ ដោយនិយាយថា ប្រសិនបើបណ្ដាគម្រោងកិច្ចសហប្រតិបត្តិការ រវាងកូរ៉េទាំង២ ត្រូវបានបង្កើតឡើងយ៉ាងសកម្ម នោះសេដ្ឋកិច្ចកូរ៉េខាងត្បូងនឹងមិនស្ថិតក្នុងសភាពប្រឈមមុខនឹងគ្រោះមហន្តរាយដូចបច្ចុប្បន្នឡើយ។
វេបសាយនោះ បានចោទប្រកាន់រដ្ឋាភិបាលអភិរក្សនិយមកូរ៉េខាងត្បូងមុនៗថា បង្កការខូចខាតយ៉ាងធំធេងដល់បណ្ដាសហគ្រាសកូរ៉េខាងត្បូង និងប្រជាជនកូរ៉េខាងជើង ដោយសារការផ្អាកបណ្ដាគម្រោងកិច្ចសហប្រតិបត្តិការសេដ្ឋកិច្ចរវាងកូរ៉េទាំង២ ដែលសំដៅធ្វើឲ្យសម្រេចភាពរុងរឿងរួមរបស់ប្រជាជន។
សារព័ត៌មានកូរ៉េខាងជើង អំពាវនាវឲ្យអនុវត្តឡើងវិញបណ្ដាគម្រោងកិច្ចសហប្រតិបត្តិការសេដ្ឋកិច្ច ដោយអះអាងថានោះជាឆន្ទះម៉ឺងម៉ាត់របស់មេដឹកនាំជាន់ខ្ពស់របស់យើងលោកគីមជុងអ៊ុន៕
ចែករំលែកព័តមាននេះ