រាជធានីភ្នំពេញ ៖ សេចក្តីរាយការណ៍បឋមឱ្យដឹងថា ជនសង្ស័យជាប់ពាក់ព័ន្ធនឹងករណីប្លន់ស្រីស្អាតនៅផ្ទះសំណាក់បៃតង ដែលធ្វើឱ្យមានការភ្ញាក់ផ្អើលកាលពីប៉ុន្មានថ្ងៃមុននោះ ពេលនេះ ត្រូវសមត្ថកិច្ចកងអាវុធហត្ថរាជធានីភ្នំពេញ ធ្វើការស្រាវជ្រាវនិងចាប់ខ្លួនបានហើយ ។
ជនសង្ស័យឈ្មោះ ឌីណា ពុទ្ធិស័កិ្ត ហៅទី ភេទប្រុស អាយុ២៣ឆ្នាំ ជាសិស្ស មានទីលំនៅក្នុងភូមិអង្គកែវ សង្កាត់ចោមចៅ៣ ខណ្ឌពោធិ៍សែនជ័យ បានប្រើប្រាស់គណនីហ្វេសបុ៊កឈ្មោះ Tii Fee(ឥទ្ធិពលនៃផ្សែងគីមី) ។
ជនសង្ស័យ ត្រូវបានចាប់ខ្លួនកាលពីយប់ថ្ងៃទី១១ ខែមករា នៅមុខផ្ទះសំណាក់សូរិយា ក្បែរសាលាខណ្ឌពោធិ៍សែនជ័យ ដោយកម្លាំងកងអាវុធហត្ថមូលដ្ឋានខណ្ឌពោធិ៍សែនជ័យ សហការជាមួយកម្លាំងការិយាល័យប្រឆាំងបទល្មើសព្រហ្មទណ្ឌកងរាជអាវុធហត្ថរាជធានីភ្នំពេញ ។
ក្រោយពីត្រូវចាប់ខ្លួន ជនសង្ស័យបានសារភាពថា «ខ្លួនឈ្មោះ ឌីណា ពុទ្ធិស័ក្តិ ហៅទី ពិតជាបានប្រើគណនីហ្វេសបុ៊កឈ្មោះ Tii Fee (ឥទ្ធិពលនៃផ្សែងគីមី) ដែលបានបោកនារីរងគ្រោះតាមរយៈហ្វេសបុ៊ក ឲ្យមកជួបនៅផ្ទះសំណាក់ និងភ្ជង់ប្លន់យកទ្រព្យសម្បត្តិប្រាកដមែន ។ ទ្រព្យសម្បត្តិដែលប្លន់យកបានពីនារីរងគ្រោះ ខ្លួនយកទៅប្រគល់ឲ្យមិត្តភក្តិឈ្មោះត្រា ឈ្មោះឧត្តម ឈ្មោះស្នា និងឈ្មោះជា ទៅដូរយកគ្រឿងញៀនមួយកញ្ចប់ធំ មកចែកគ្នាជក់ និងលក់បន្តអស់ហើយ» ។
សូមរំឭកថា កាលពីវេលាម៉ោង៧យប់ថ្ងៃទី១ មករា កន្លងទៅ មានករណីជនសង្ស័យម្នាក់ បានធ្វើសកម្មភាពបោកនារីស្រស់ស្អាតម្នាក់ មានមុខរបរលក់ទំនិញតាមអនឡាញ ដែលជនសង្ស័យ និងជនរងគ្រោះស្គាល់គ្នា តាមការលេងឆាតហ្វេសបុ៊ក ។ ជនសង្ស័យបានណាត់ឲ្យជនរងគ្រោះទៅជួបនៅផ្ទះសំណាក់បៃតង ដោយបោកបញ្ឆោតថា ឱ្យប្រាក់១០០ដុល្លារអាមេរិក ។
ផ្ទុយទៅវិញ នៅពេលជនរងគ្រោះទៅដល់ ជនសង្ស័យក៏ប្រើកាំបិតភ្ជង់ប្លន់យកគ្រឿងអលង្ការ និងទូរស័ព្ទដៃ ព្រមទាំងប្រាក់ ។
ចែករំលែកព័តមាននេះ