ខេត្តឧត្តរមានជ័យ ៖ ស្ត្រីម្នាក់បានតាំងខ្លួនជាគ្រូចូលរូប និងជាអ្នកមើលជម្ងឺនោះ ត្រូវបានប៉ូលិសអធិការក្រុងសំរោងធ្វើការឃាត់ខ្លួនភ្លាមៗ បន្ទាប់ពីប្តីប្រពន្ធ២នាក់បានមកដាក់ពាក្យបណ្តឹងដោយចោទប្រកាន់ពីបទឆបោកទ្រព្យសម្បត្តិ ហេតុការណ៍នេះកើតឡើងកាលពីវេលាម៉ោង២និង៣០នាទីរសៀលថ្ងៃទី១៣ មករា ២០១៩ នៅក្នុងភូមិអូរព្រាល…
ខេត្តឧត្តរមានជ័យ ៖ ស្ត្រីម្នាក់បានតាំងខ្លួនជាគ្រូចូលរូប និងជាអ្នកមើលជម្ងឺនោះ ត្រូវបានប៉ូលិសអធិការក្រុងសំរោងធ្វើការឃាត់ខ្លួនភ្លាមៗ បន្ទាប់ពីប្តីប្រពន្ធ២នាក់បានមកដាក់ពាក្យបណ្តឹងដោយចោទប្រកាន់ពីបទឆបោកទ្រព្យសម្បត្តិ ហេតុការណ៍នេះកើតឡើងកាលពីវេលាម៉ោង២និង៣០នាទីរសៀលថ្ងៃទី១៣ មករា ២០១៩ នៅក្នុងភូមិអូរព្រាល សង្កាត់បុស្បូវ ក្រុងសំរោង ខេត្តឧត្តរមានជ័យ។
ប្តីប្រពន្ធជាជនរងគ្រោះខាងលើ ប្តីឈ្មោះឡាំ សារី អាយុ៤៨ឆ្នាំ និងប្រពន្ធឈ្មោះភ្លឿយ ស្រស់អាយុ៣៦ឆ្នាំ អ្នកទាំង២មានទីលំនៅក្នុងភូមិក្តុល សង្កាត់កូនក្រៀល ក្រុងសំរោង ខេត្តឧត្តរមានជ័យមុខរបរជាកសិករ។
ចំណែកស្ត្រីដែលបានតាំងខ្លួនជាគ្រូចេះមើលជម្ងឺនោះឈ្មោះហ៊ឹង ណាត់ អាយុ៣៩ឆ្នាំ មុនរបរជាគ្រូចូលរូប រស់នៅក្នុងភូមិសង្កាត់កើតហេតុខាងលើ ត្រូវបានសមត្ថកិច្ចចាប់ឃាត់ខ្លួន។
តាមប្រភពពីប្តីប្រពន្ធជាជនរងគ្រោះខាងលើបានរៀបរាប់ថា មុនពេលកើតហេតុនេះ ពួកគាត់ទាំង២នាក់ប្តីប្រពន្ធបានយកកូនប្រុសដែលមានអាយុ៣ឆ្នាំកើតជម្ងឺខ្វិនដៃជើង និងប្រកាច់ផងនោះទៅឱ្យស្ត្រីជាគ្រូចូលរូបម្នាក់ខាងលើព្យាបាល ហើយស្ត្រីជាគ្រូនោះបានតម្រូវជាជំហានដំបូងត្រូវដាក់នូវអាសនៈគ្រូចំនួន៣លានរៀល ។
ប្រភពដដែលបានបន្តថា ក្រោយមកទៀត ស្ត្រីជាគ្រូខាងលើនោះបានតម្រូវជាបន្តបន្ទាប់ឱ្យយកប្រាក់ទាំងមុននិងក្រោយឱ្យបានគ្រប់ចំនួន២៧លានរៀល និងប្រាក់ថៃឱ្យបានចំនួន៥ពាន់បាត និងមាសឱ្យបានចំនួន៧ជីដើម្បីដាក់តម្កល់លើអាសនៈគ្រូ បើពុំដូច្នេះទេមិនអាចមើលជាឡើយ ហើយស្ត្រីជាគ្រូនោះបានអះអាងថា
«ទ្រព្យសម្បត្តិទាំងនេះគ្រូមិនយកទេ នៅពេលកូនជាហើយយកទៅវិញបាន» ។
ប្រភពដដែលបានបញ្ជាក់ទៀតថា លុះនៅថ្ងៃទី១១ មករា ២០១៩ ពួកគាត់ទាំង២នាក់ប្តីប្រពន្ធនាំគ្នាទៅដកយកទ្រព្យសម្បត្តិ និងលុយកាក់មកវិញ ព្រោះយល់ថា កូននិងប្រពន្ធមិនជាសោះ ស្រាប់តែពេលនោះស្ត្រីជាគ្រូបានឆ្លើយតបថា បាត់អស់ខ្លះហើយ គឺនៅសល់តែ១លាន៨៥ម៉ឺនរៀល ប្រាក់ថៃនៅសល់តែ១១០០បាត និងមានចេញជាលុយ១០០ដុល្លារទៅវិញ ចំណែកមាសត្រូវបាត់ទាំងអស់ ទើបពួកគាត់ទាំង២នាក់ប្តីប្រពន្ធកើតទុក្ខមិនសុខចិត្តមកដាក់ពាក្យបណ្តឹងដល់សមត្ថកិច្ច។
ប្រភពពីប៉ូលិសអធិការក្រុងសំរោងបានឱ្យដឹងថា មុនឈានទៅដល់ធ្វើការឃាត់ខ្លួនស្ត្រីជាគ្រូខាងលើនេះ គឺយោងទៅលើពាក្យបណ្តឹងរបស់ជនរងគ្រោះទាំង២នាក់ប្តីប្រពន្ធបានចោទពីបទឆបោកទ្រព្យសម្បត្តិ ។
បន្ទាប់ពីបានទទួលពាក្យបណ្តឹងហើយ សមត្ថកិច្ចបានឈានទៅធ្វើការឃាត់ខ្លួនស្ត្រីជាគ្រូចូលរូបខាងលើនេះនាំខ្លួនមកអធិការក្រុងសំរោងដើម្បីធ្វើការសាកសួរ ។
យោងតាមចម្លើយសារភាពរបស់ស្ត្រីជាគ្រូដែលបានសារភាពថា ខ្លួនពិតជាបានឆបោកជនរងគ្រោះជាប្តីប្រពន្ធទាំង២នាក់ខាងលើប្រាកដមែន ។ យោងទៅលើពាក្យបណ្តឹង សមត្តកិច្ចបានកសាងសំណុំរឿងបញ្ជូនស្ត្រីជាគ្រូដែលឆបោកទៅតុលាការអមសាលាដំបូងខេត្តឧត្តរមានជ័យដើម្បីចាត់ការទៅតាមនីតិវិធី ៕
ចែករំលែកព័តមាននេះ