រាជធានីភ្នំពេញ ៖ សម្ដេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃ រាជនៃព្រះរាជាណាចក្រកម្ពុជាបានយាងត្រឡប់មកដល់កម្ពុជាវិញ ហើយកាលពីរសៀលម្សិលម៉ិញ ក្រោយយាងចូលរួមកម្មវិធីព្រះពុទ្ធសាសនាដ៏ធំនៅប្រទេសវៀតណាម ។…
រាជធានីភ្នំពេញ ៖ សម្ដេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃ រាជនៃព្រះរាជាណាចក្រកម្ពុជាបានយាងត្រឡប់មកដល់កម្ពុជាវិញ ហើយកាលពីរសៀលម្សិលម៉ិញ ក្រោយយាងចូលរួមកម្មវិធីព្រះពុទ្ធសាសនាដ៏ធំនៅប្រទេសវៀតណាម ។
សម្តេចព្រះអគ្គមហាសង្ឃរាជចាត់ទុកព្រះរាជទស្សនកិច្ចនេះជោគជ័យផ្នែកព្រះពុទ្ធសាសនាថេរវាទ និងមហាយាន ។ សម្ដេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជាបានយាងនិវត្តន៍ពីបំពេញព្រះរាជកិច្ចនៅសាធារណរដ្ឋសង្គមនិយមវៀតណាម កាលពីរសៀលថ្ងៃទី១៣ ខែមករា ម្សិលម៉ិញ ក្រោយបំពេញរាជទស្សនកិច្ចអស់រយៈពេល៤ថ្ងៃ ។
នៅអាកាសយានអន្តរជាតិភ្នំពេញសម្ដេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជបានចាត់ទុកព្រះរាជដំណើរទស្សនកិច្ចរបស់កម្ពុជា នាពេលនេះ បានរួមចំណែកដ៏សំខាន់សម្រាប់ការអភិវឌ្ឍផ្នែកពុទ្ធសាសនា ។
ជាពិសេសផ្សារភ្ជាប់រវាងព្រះពុទ្ធសាសនាថេរវាទ និងមហាយាន ។ នៅក្នុងឱកាសបំពេញព្រះរាជទស្សនកិច្ចនោះសម្ដេចព្រះមហាសង្ឃរាជបានយាងចូលរួមកម្មវិធីជាច្រើននៅវត្ត PhatQuang (ហ្វាតគ័ង) ខេត្តបារៀ មានដូចជា កម្មវិធីបូកសរុបសកម្មភាពការងារឆ្នាំ២០១៨ យាងជាអធិបតីក្នុងពិធីបំបួសកុលបុត្រចំនួន១២រូប យាងជាវាគ្មិនក្នុងកម្មវិធីសំណួរចម្លើយពីសកម្មភាពព្រះពុទ្ធសាសនា និងការដឹកនាំព្រះពុទ្ធសាសនានៅកម្ពុជា យាងចូលរួមកម្មវិធីសូត្រធម៌សន្តិភាព ។
ជាមួយគ្នានោះសម្តេចព្រះអគ្គមហាសង្ឃរាជក៏បានយាងទតសកម្មភាពបូជាផ្កាភ្ញីចំពោះព្រះពុទ្ធរូបពីសំណាក់ពុទ្ធបរិស័ទវត្ត PhatQuang ចំនួនប្រមាណជាង៥ម៉ឺនអង្គនាក់ដែលមានរបៀបរៀបរយល្អគួរជាទីជ្រះថ្លា ។
សូមបញ្ជាក់ផងដែរថា ព្រះរាជទស្សនកិច្ចនេះមានការស្វាគមន៍យ៉ាងកក់ក្ដៅពីសំណាក់ព្រះចៅអធិការវត្ត PhatQuang ក៏ដូចពុទ្ធបរិស័ទគ្រប់មជ្ឈដ្ឋានទើបធ្វើឱ្យទស្សនកិច្ចនេះទទួលបានជោគជ័យយ៉ាងត្រចះត្រចង់ ៕
ចែករំលែកព័តមាននេះ