រាជធានីភ្នំពេញ ៖ ជនសង្ស័យ២នាក់រួមជាមួយថ្នាំញៀន៥៣កញ្ចប់តូចត្រូវបានកម្លាំងនគរបាលប៉ុស្តិ៍រដ្ឋបាលនគរបាលចាក់អង្រែលើចុះរដ្ឋបាលធ្វើការឃាត់ខ្លួនភ្លាមៗ ក្រោយឆែកឆេរមានថ្នាំញៀនក្នុងខ្លួនប្រាណនៅចំណុចសំណង់មិនរៀបរយផ្លូវ៦០ម៉ែត្រ ក្នុងភូមិព្រែកតាគង់៣ សង្កាត់ចាក់អង្រែលើ ខណ្ឌមានជ័យ កាលពីវេលាម៉ោង៩ព្រឹក ថ្ងៃទី១៤ ខែមករា ឆ្នាំ២០១៩ ។
ជនសង្ស័យទាំង២នាក់មានឈ្មោះ ឯម ឌីម ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅចំណុចកើតហេតុខាងលើ និងម្នាក់ទៀតមានឈ្មោះ នុត ចិន្តា ភេទស្រី អាយុ២១ឆ្នាំ មុខរបរកម្មករសំណង់ ស្នាក់នៅផ្ទះជួល សង្កាត់កាកាប ខណ្ឌពោធិ៍សែនជ័យ ។
មន្ត្រីនគរបាលអោយដឹងថា ចំណុចសំណង់មិនរៀបរយខាងលើ គឺជាចំណុចក្តៅរស៊ើបដែលក្រុមជួញដូរ និងប្រើប្រាស់ថ្នាំញៀនតែងពពាក់ពពូនគ្នាចរាចរចែកចាយ និងប្រើប្រាស់យ៉ាងអនាធិបតេយ្យ ហើយកន្លងមកកម្លាំងនគរបាលតែងធ្វើការបង្ក្រាបបានជាបន្តបន្ទាប់មករហូតដែរ ។
ជាក់ស្តែងនៅវេលាខាងលើកម្លាំងនគរបាលមូលដ្ឋានបានចុះរដ្ឋបាលពិនិត្យនៅតំបន់មិនរៀបរយខាងលើនេះក៏ប្រទះឃើញជនសង្ស័យទាំង២នាក់គួរអោយសង្ស័យក៏សុំធ្វើការឆែកឆេរ ស្រាប់តែប្រទះឃើញមានថ្នាំញៀននៅក្នុងខ្លួនក៏កម្លាំងសមត្ថកិច្ចសម្រេចធ្វើការឃាត់ខ្លួនតែម្តងទៅ ដោយដកហូតបានថ្នាំញៀនសរុប៥៣កញ្ចប់តូច ។
បច្ចុប្បន្នជនសង្ស័យទាំង២នាក់ រួមទាំងវត្ថុតាងត្រូវបញ្ចូនទៅកាន់ប៉ុស្តិ៍រដ្ឋបាលនគរបាលមូលដ្ឋាន ដើម្បីបន្តនីតិវិធីច្បាប់នៅពេលខាងមុខ ៕
ចែករំលែកព័តមាននេះ