ខេត្តសៀមរាប ៖ មុនឈានដល់ការពិភាក្សាលើប្រធានបទសំខាន់ៗនោះសមាជិកគណៈកម្មាកិច្ចជុំវេទិកាសភាអាស៊ី-ប៉ាស៊ីហ្វិកលើកទី២៧ ហៅកាត់ថា APPF បានចាប់ផ្តើមបើកកិច្ចប្រជុំគណៈកម្មការប្រតិបត្តិរបស់ខ្លួន នៅថ្ងៃទី១៤ មករានេះ ។ ការបើកកិច្ចប្រជុំនេះមុននឹងឈានដល់ការពិភាក្សាលើប្រធានបទសំខាន់ៗដែលមានប្រយោជន៍ក្នុងតំបន់…
ខេត្តសៀមរាប ៖ មុនឈានដល់ការពិភាក្សាលើប្រធានបទសំខាន់ៗនោះសមាជិកគណៈកម្មាកិច្ចជុំវេទិកាសភាអាស៊ី-ប៉ាស៊ីហ្វិកលើកទី២៧ ហៅកាត់ថា APPF បានចាប់ផ្តើមបើកកិច្ចប្រជុំគណៈកម្មការប្រតិបត្តិរបស់ខ្លួន នៅថ្ងៃទី១៤ មករានេះ ។
ការបើកកិច្ចប្រជុំនេះមុននឹងឈានដល់ការពិភាក្សាលើប្រធានបទសំខាន់ៗដែលមានប្រយោជន៍ក្នុងតំបន់ និងលើពិភពលោកនៅថ្ងៃទី១៥ មករា ។ កិច្ចប្រជុំ APPF ត្រូវបានកម្ពុជាធ្វើជាម្ចាស់ផ្ទះកិច្ចសភាថ្នាក់តំបន់នេះចាប់ពីថ្ងៃទី១៤ ដល់ទី១៧ ខែមករា ឆ្នាំ២០១៩ នៅលើទឹកដីអង្គរខេត្តសៀមរាប ដោយមានការអញ្ជើញចូលរួមពីបណ្តាថ្នាក់ដឹកនាំសភាមកពីបណ្តាប្រទេសជាសមាជិកចំនួន២១នៅក្នុងតំបន់អាស៊ីប៉ាស៊ីហ្វិក ។
លោក ឈាង វុន សមាជិករដ្ឋសភាកម្ពុជាទទួលបន្ទុកកិច្ចការឃោសនាការព័ត៌មាន និងកិច្ចសហប្រតិបត្តិអន្តរជាតិបានឲ្យដឹងក្នុងសន្និសីទសារព័ត៌មាន មុនពេលបើកកិច្ចប្រជុំគណកម្មការប្រតិបត្តិកិច្ចជុំវេទិកាសភាអាស៊ី-ប៉ាស៊ីហ្វិក លើកទី២៧ នាសណ្ឋាគារសុខា នាព្រឹកថ្ងៃទី១៤មករានេះថា វេទិកានេះធ្វើឡើងក្រោមមូលបទស្តីពី«ពង្រឹងភាពជាដៃគូសភា ដើម្បីសន្តិភាព សន្តិសុខ និងការអភិវឌ្ឍប្រកបដោយចីរភាព» សំដៅពង្រឹងកិច្ចសហប្រតិបត្តិការរបស់សភា ក្នុងការប្រើប្រាស់ប្រព័ន្ធព័ត៌មានវិទ្យាប្រកបដោយការទទួលខុសត្រូវ ដើម្បីវឌ្ឍនភាពសង្គម ។
លោកក៏បានលើកឡើងថា កិច្ចប្រជុំនេះមានប្រទេសជាសមាជិកចំនួន២១ប្រទេសចូលរួមបូកទាំងកម្ពុជាក្នុងនោះមានប្រទេសចិនអូស្ត្រាលីឡាវសហព័ន្ធរុស្ស៊ី ម៉ាឡេស៊ី ឥណ្ឌូនេស៊ី ហ្វីលីពីន ម៉ុងហ្គោលី ណូវ៉ែលហ្សឺឡង់ ម៉ិចស៊ីកូ ជប៉ុន ថៃ កូរ៉េខាងត្បូង ឈីលី ប៉ាពួញូហ្គីនៀ និងប្រទេសសិង្ហបូរីជាដើម ។
លោកបានបញ្ជាក់ថា ប្រទេសជាមាជិកទាំងអស់បានបញ្ជូនសេចក្តីព្រាងសេចក្តីសម្រេចពាក់ព័ន្ធនឹងវិស័យនយោបាយ សេដ្ឋកិច្ច ពាណិជ្ជកម្ម សង្គមកិច្ច ការកសាងទំនុកចិត្ត ដើម្បីជំរុញឲ្យមានសន្តិភាព សន្តិសុខ និងការអភិវឌ្ឍប្រកបដោយចីរភាពនៅក្នុងតំបន់ការប្រយុទ្ធប្រឆាំងភេរវកម្ម និងឧក្រិដ្ឋកម្មឆ្លងដែននៅក្នុងតំបន់ និងការលើកកម្ពស់សមភាពយេនឌ័រក្នុងវិស័យសភា ។
សូមជម្រាបថា ពិធីបើកកិច្ចប្រជុំប្រចាំឆ្នាំនៃវេទិកាសភាអាស៊ី-ប៉ាស៊ីហ្វិក លើកទី២៧ ជាផ្លូវការ គឺប្រារព្ធធ្វើនៅព្រឹកថ្ងៃទី១៥ ខែមករា ក្រោមការស្វាគមន៍ដោយព្រះរាជសាររបស់ព្រះករុណាព្រះបាទសម្ដេចព្រះបរមនាថនរោត្ដមសីហមុនីព្រះមហាក្សត្រនៃព្រះរាជាណាចក្រកម្ពុជាព្រមទាំងមានការចូលរួមថ្លែងសន្ទរកថា គន្លឹះពីថ្នាក់ដឹកនាំស្ថាប័នកំពូល កំពូលៗរបស់កម្ពុជាមានដូចជា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីសម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងតំណាងសភាប្រទេសជាសមាជិកនៃវេទិកាសភាអាស៊ី-ប៉ាស៊ីហ្វិច មុនពេលសម្ដេចអគ្គមហាពញាចក្រី ហេង សំរិន ប្រធានរដ្ឋសភា និងជាប្រធានវេទិកាសភាអាស៊ី-ប៉ាស៊ីហ្វិក លើកទី២៧ ប្រកាសបើកជាផ្លូវការ ។
សូមបញ្ជាក់ថា វេទិកាAPPF ត្រូវបានបង្កើតឡើងនៅទីក្រុងតូក្យូ ប្រទេសជប៉ុន ក្នុងឆ្នាំ១៩៩៣ ហើយ បច្ចុប្បន្នមានសមាជិកពេញសិទ្ធិចំនួន២៧ប្រទេស ។ ចំណែកសភាកម្ពុជាបានចូលជា សមាជិកពេញសិទ្ធិនៃវេទិកាសភានេះកាលពីឆ្នាំ១៩៩៥ ដើម្បីចូលរួមស្វែងសុខសន្តិភាពវិបុលភាព និងការអភិវឌ្ឍក្នុងតំបន់ និងពិភពលោក ។ មុនហ្នឹងឈានដល់ថ្ងៃរៀបចំពិធីរដ្ឋសភាកម្ពុជាបានរៀបចំកិច្ចប្រជុំគណៈកម្មការជំនាញជាច្រើនលើកមកហើយ ដើម្បីធ្វើយ៉ាងណាឲ្យកិច្ចប្រជុំនេះទទួលបានលទ្ធផលល្អ និងជោគជ័យ ៕
ចែករំលែកព័តមាននេះ