ខេត្តកំពង់ស្ពឺ ៖ យ៉ាងហោចណាស់មនុស្ស៣នាក់បានរងរបួសធ្ងន់ក្នុងហេតុការណ៍រថយន្តបុកគ្នាទាំងកណ្តាលអធ្រាត្រ ក្រោយកើតហេតុសមត្ថកិច្ចបានគាស់កាប៊ីនរថយន្តយកជនរងគ្រោះចេញ និងបញ្ជូនទៅសង្គ្រោះភ្លាមៗផងដែរ ។
ករណីនេះកើតឡើងនាវេលាម៉ោង១២និង១០នាទីយប់រំលងអធ្រាត្រឈានចូលថ្ងៃ១៣ ខែមករា ឆ្នាំ២០១៩ លើផ្លូវជាតិលេខ០៤ ចន្លោះគីឡូម៉ែត្រលេខ ៦០-៦១ ត្រង់ចំណុចភូមិត្រពាំងក្រឡាញ់ ឃុំមហាសាំង ស្រុកភ្នំស្រួច ខេត្តកំពង់ស្ពឺ ។
ប្រភពពីសមត្ថកិច្ចបានអោយដឹងថា មានរថយន្ត០១គ្រឿងមិនស្គាល់ម៉ាក ពណ៌លឿង ពាក់ផ្លាកលេខ ភ្នំពេញ 3E-2610 សណ្តោងរ៉ឺម៉ក ពណ៌ខៀវ ពាក់ផ្លាកលេខ ភ្នំពេញ 4A-4301 របស់ក្រុមហ៊ុន PRIVATE ដឹកជញ្ជូន អ្នកបើកបរមិនស្គាល់ឈ្មោះដោយបានបើកបរមកពីទិសខាងកើតទៅទិសខាងលិច ។
លុះមកដល់ចំណុចខាងលើបានបុករថយន្ត០១គ្រឿងទៀត ម៉ាកហ៊ីយ៉ាន់ដាយ ពណ៌ខៀវ ពាក់ផ្លាកលេខ ភ្នំពេញ 3D-7315 អ្នកបើកបរមិនស្គាល់ឈ្មោះដោយបើកបរបញ្ច្រាសទិសគ្នាបណ្តាលឲ្យមនុស្សរបួសធ្ងន់០៣នាក់ ។
ក្នុងហេតុការណ៍នេះបណ្តាលអោយរថយន្តហ៊ីយ៉ាន់ដាយខូចខាតធ្ងន់ រថយន្តធំខូចខាតស្រាល ។ ចំពោះវត្ថុតាងក្រោយធ្វើកំណត់ហេតុសមត្ថកិច្ចបានយកទៅរក្សាទុកនៅអធិការដ្ឋាននគរបាលស្រុកភ្នំស្រួចដើម្បីចាត់ការតាមនីតិវិធី ៕
ចែករំលែកព័តមាននេះ