ប្រទេសម៉ាឡេស៊ី ៖ រដ្ឋប៉ាហាំងម៉ាឡេស៊ីរាយការណ៍នាថ្ងៃទី១២មករាថា ពេលនេះរដ្ឋនោះមានស៊ុលតង់ថ្មីមួយអង្គ ដែលនឹងក្លាយជាព្រះមហាក្សត្រថ្មី ម៉ាឡេស៊ីនាពេលខាងមុខ ក្រោយការដាក់រាជ្យគួរឲ្យភ្ញាក់ផ្អើលកាលពីសប្ដាហ៍មុន របស់អតីតព្រះមហាក្សត្រដែលតាមពាក្យចចាមអារ៉ាមនានាថា ទ្រង់បានទៅរៀបអភិសេកជាមួយអតីតបវរកញ្ញារុស្ស៊ីមួយរូប។ ប្រទេសម៉ាឡេស៊ីចាប់តាំងពីទទួលបានឯករាជ្យពីឆ្នាំ១៩៥៧មក…
ប្រទេសម៉ាឡេស៊ី ៖ រដ្ឋប៉ាហាំងម៉ាឡេស៊ីរាយការណ៍នាថ្ងៃទី១២មករាថា ពេលនេះរដ្ឋនោះមានស៊ុលតង់ថ្មីមួយអង្គ ដែលនឹងក្លាយជាព្រះមហាក្សត្រថ្មី ម៉ាឡេស៊ីនាពេលខាងមុខ ក្រោយការដាក់រាជ្យគួរឲ្យភ្ញាក់ផ្អើលកាលពីសប្ដាហ៍មុន របស់អតីតព្រះមហាក្សត្រដែលតាមពាក្យចចាមអារ៉ាមនានាថា ទ្រង់បានទៅរៀបអភិសេកជាមួយអតីតបវរកញ្ញារុស្ស៊ីមួយរូប។
ប្រទេសម៉ាឡេស៊ីចាប់តាំងពីទទួលបានឯករាជ្យពីឆ្នាំ១៩៥៧មក ជាព្រះរាជាណាចក្រអាស្រ័យរដ្ឋធម្មនុញ្ញមួយ មានប្រព័ន្ធខុសពីគេដាច់ ដោយព្រះមហាក្សត្រត្រូវប្ដូររៀងរាល់៥ឆ្នាំម្ដង ជ្រើសរើសក្នុងចំណោមគ្រួសាររាជវង្សនៃបណ្ដាអតីតរាជាណាចក្រដែលរួមគ្នាបង្កើតជាព្រះរាជាណាចក្រសហព័ន្ធមួយ។
អតីតព្រះមហាក្សត្រដែលដាក់រាជ្យទើបសោយរាជ្យបាន២ឆ្នាំ ហើយទ្រង់ត្រូវជំនួសទៅតាមវេន ដោយសមាជិកគ្រួសាររាជវង្សនៃរដ្ឋប៉ាហាំង ប៉ុន្តែស៊ុលតង់នៃរដ្ខនោះមានវ័យជរាខ្លាំង ទើបទ្រង់ដាក់រាជ្យហើយឡើងជំនួសដោយព្រះបុត្រា TENGKU ABDULLAD SHAHព្រះជន្ម៥៩ព្រះវស្សា ដែលបែបនោះអាចឲ្យក្រុមប្រឹក្សាព្រះរាជបល្ល័ង្ក ដែលរួមប្រជុំនាថ្ងៃទី២៤មករា ជ្រើសរើសព្រះអង្គជាព្រះមហាក្សត្រថ្មី។
ស៊ុលតង់TENGKU ABDULLAD SHAHគេស្គាល់ទ្រង់ច្បាស់ ដោយសារទ្រង់ជាអ្នកចូលចិត្តកីឡា ហើយបច្ចុប្បន្នជាប្រធានសហព័ន្ធកីឡាហុកគីអាស៊ី ហើយជាសមាជិកក្រុមប្រឹក្សានាយករបស់FIFA។
ទោះជាព្រះមហាក្សត្រម៉ាឡាសីុមានតួនាទីនិមិត្តរូបមួយ តែត្រូវបានគេគោរពបំផុត ហើយរាល់ការរិះគន់ត្រូវហាមឃាត់។ ព្រះឆាយាល័ក្ខណ៍ព្រះអង្គត្រូវបានដាក់តាំងនៅតាមកន្លែងសាធារណៈ ហើយទ្រង់ក៏ជាប្រមុខជានិមិត្តរូបនៃអ៊ិស្លាមក្នុងប្រទេសដែរ ព្រមទាំងជាប្រមុខកិត្តិយសរបស់កងទ័ព៕
ចែករំលែកព័តមាននេះ