ប្រទេសបារាំង ៖ ការផ្ទុះយ៉ាងខ្លាំងមួយកើតមានកាលពីថ្ងៃទី១២មករា ក្នុងហាងនំប៉័ងមួយស្ថិតនៅតាមវិថីTREVISE ខណ្ឌទី៩ក្រុងប៉ារីស បណ្ដាលឲ្យមនុស្សស្លាប់៣នាក់និងរបួសជិត៥០នាក់ ក្នុងនោះ១០នាក់របួសធ្ងន់។
រដ្ឋអាជ្ញាក្រុងប៉ារីសលោកREMY HEITZថ្លែងនាថ្ងៃទី១២មករាថា អ្នកពន្លត់ភ្លើង២នាក់ស្លាប់ ហើយមនុស្ស១០នាក់របួសធ្ងន់និង៣៧នាក់របួសស្រាល។ នាវេលាល្ងាចថ្ងៃដដែលនោះសារព័ត៌មាននានារាយការណ៍ ពីមនុស្សស្លាប់ទី៣ ជានារីអ្នកទេសចរជនជាតិអេស្ប៉ា្ញម្នាក់ ធ្វើឲ្យចំនួនអ្នកស្លាប់ឡើងដល់៣នាក់។ ការផ្ទុះយ៉ាងខ្លាំងនោះដែលក៏បណ្ដាលឲ្យមានការខូចខាតសម្ភារធ្ងន់ធ្ងរ បើតាមអាជ្ញាធរបារាំងថាបណ្ដាលមកពីការចៃដន្យ។ នោះជាការផ្ទុះធ្ងន់ធ្ងរមួយពិតណាស់ទាក់ទិននឹងការធ្លាយឧស្ម័នដោយចៃដន្យនៅកន្លែងស្តុក។
រដ្ឋមន្ត្រីមហាផ្ទៃបារាំងលោកCHRISTOPHE CASTANER ដែលទៅកាន់កន្លែងផ្ទុះឆេះ រួមជាមួយនាយករដ្ឋមន្ត្រីលោកEDOUARD PHILIPPE និងអភិបាលក្រុងប៉ារីសលោកស្រី ANNE HIDALGOថ្លែងថា នោះជាការផ្ទុះពិតណាស់ដោយចៃដន្យមួយ បណ្ដាលឲ្យមានជនរងគ្រោះច្រើននាក់។
រដ្ឋអាជ្ញាក្រុងប៉ារីសដែលទៅកាន់កន្លែងផ្ទុះដែរនិយាយថា យើងផ្ដោតលើការផ្ទុះដោយចៃដន្យមួយ តែយើងក៏មិនបដិសេធមូលហេតុផ្សេងទៀតដែរ។ លោកបញ្ជាក់ថាការស៊ើបអង្កេតមួយត្រូវបានបើកធ្វើដើម្បីកំណត់លើមូលហេតុពិតប្រាកដនៃការផ្ទុះ ព្រមទាំងលើកន្លែងស្តុកឧស្ម័ន ដែលនាំឲ្យមានសោកនាដកម្មនោះ។
នោះជាការផ្ទុះដ៏កម្រមួយដែលនាំឲ្យមានការខូចខាតធំធេង។ បណ្ដារូបភាពផ្សាយតាមទូរទស្សន៍នានា និងតាមTWITTER គេឃើញផ្នែកផ្ទាល់ដីនៃអគារ រងការបំផ្លាញទាំងស្រុង ហើយបង្អួចកញ្ចក់នានានៃអគារទាំងឡាយត្រូវបែក។ ការផ្ទុះពិតជាខ្លាំងណាស់ដោយក្នុងរង្វង់១០០ម៉ែត្រ អគារមួយចំនួន ញ័ររង្គើដែលអាចបណ្ដាលឲ្យរលំបាក់់គ្រប់ពេល។ អ្នកពន្លត់ភ្លើងជាង២០០នាក់និងប៉ូលិសប្រមាណ១០០នាក់ត្រូវបានប្រមូលទប់ទល់និងភ្លើងឆាបឆេះ៕
ចែករំលែកព័តមាននេះ