ខេត្តប៉ៃលិន ៖ បុរសម្នាក់ដុតស្មៅក្នុងចម្ការរបស់ខ្លួន ដើម្បីឱ្យងាយស្រួលក្នុងការភ្ជួរដីស្រាប់តែបង្កទៅជាអណ្តាតភ្លើងឆេះរាលចូលក្នុងចម្ការអ្នកដទៃឆេះដំណាំស្វាយជាង៨០០ដើម និងឆេះត្រាក់ទ័ររបស់ខ្លួនមួយគ្រឿងផងដែរ ។ ហេតុការណ៍នេះបានកើតឡើង កាលពីវេលាម៉ោង៤និង៣០នាទីរសៀលថ្ងៃទី១១ ខែមករា ឆ្នាំ២០១៩…
ខេត្តប៉ៃលិន ៖ បុរសម្នាក់ដុតស្មៅក្នុងចម្ការរបស់ខ្លួន ដើម្បីឱ្យងាយស្រួលក្នុងការភ្ជួរដីស្រាប់តែបង្កទៅជាអណ្តាតភ្លើងឆេះរាលចូលក្នុងចម្ការអ្នកដទៃឆេះដំណាំស្វាយជាង៨០០ដើម និងឆេះត្រាក់ទ័ររបស់ខ្លួនមួយគ្រឿងផងដែរ ។
ហេតុការណ៍នេះបានកើតឡើង កាលពីវេលាម៉ោង៤និង៣០នាទីរសៀលថ្ងៃទី១១ ខែមករា ឆ្នាំ២០១៩ ស្ថិតនៅក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។ ប្រភពព័ត៌មានបានឱ្យដឹងថា បុរសដែលដុតស្មៅក្នុងចម្ការរបស់ខ្លួនមិនទាន់ស្គាល់អត្តសញ្ញាណ រស់នៅក្នុងភូមិអូរពឺត សង្កាត់ទួលល្វា ក្រុងប៉ៃលិន ។
ចំណែកម្ចាស់ចម្ការរងគ្រោះមានឈ្មោះ ខាយ ចន្ថា ភេទប្រុស អាយុ៤៨ឆ្នាំ រស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
មុនពេលកើតហេតុគេឃើញបុរសម្នាក់យកត្រាក់ទ័រចូលទៅក្នុងចម្ការបម្រុងនឹងភ្ជួរដីរបស់ខ្លួន លុះឃើញមានស្មៅច្រើនពេកក៏ដុតភ្លើងឱ្យឆេះស្រឡះ ដើម្បីងាយស្រួលភ្ជួរ ។ តែជាអកុសល ខណៈភ្លើងឆេះក្នុងចម្ការ ស្រាប់តែមានខ្យល់បក់បោកកាន់តែខ្លាំងបណ្តាលឱ្យឆាបឆេះជាអណ្តាតភ្លើងរាលដាលចូលទៅក្នុងចម្ការអ្នកដទៃទៀតនៅក្បែរនោះដែរ បណ្តាលឱ្យឆេះដំណាំស្វាយកែវរមៀតរបស់គេអស់ចំនួនជាង៨០០ដើម ថែមទាំងឆេះត្រាក់ទ័ររបស់ខ្លួនអស់១គ្រឿងផងដែរ ។
ប្រភពបន្តទៀតថា ក្រោយពេលកើតហេតុគេបានប្តឹងទៅនគរបាលឱ្យយករថយន្តពន្លត់អគ្គិភ័យនៃស្នងការនគរបាលខេត្តចុះទៅជួយពន្លត់ទាន់ពេលវេលា ។ ក្នុងនោះនគរបាលបានប្រើរថយន្តពន្លត់អគ្គិភ័យចំនួន២គ្រឿង ដើម្បីជួយបាញ់ទឹកពន្លត់តាំងពីរសៀលរហូតដល់វេលាម៉ោង៦និង២០នាទីទើបអាចគ្រប់គ្រងស្ថានភាពភ្លើងឆេះព្រៃទាំងនោះជាប់ ។
ពាក់ព័ន្ធនឹងបញ្ហាខាងលើនេះក្រុមនគរបាលជំនាញកំពុងធ្វើការស្រាវជ្រាវរកម្ចាស់ចម្ការជាជន បង្ក ដើម្បីសួរនាំ និងកសាងសំនុំរឿងបញ្ជូនទៅតុលាការ ឱ្យចាត់ការតាមនីតិវិធី ៕
ចែករំលែកព័តមាននេះ