ខេត្តពោធិ៍សាត់ ៖ គ្រោះថ្នាក់ចរាចរណ៍២ករណីផ្សេងគ្នាក្នុងថ្ងៃតែមួយ បណ្តាលឱ្យប្ដីប្រពន្ធ២នាក់បានស្លាប់កៀបជាប់ក្នុងរថយន្ដ ដោយឡែកបុរសជាមន្ត្រីយោធាម្នាក់ផ្សេងទៀតបានស្លាប់លើថ្នល់យ៉ាងអាណោចអាធ័ម ដែលហេតុការណ៍នេះបានកើតឡើងកាលពីថ្ងៃទី១២ខែមករាឆ្នាំ២០១៩ ។
ករណីទី១-សមត្ថកិច្ចឲ្យដឹងថា រថយន្ដម៉ាកហ៊ីយ៉ាន់ដាយមួយគ្រឿងបានបុកជាមួយរថយន្ដម៉ាកហ៊ីយ៉ាន់ដាយមួយគ្រឿងទៀត បណ្ដាលឲ្យប្ដីប្រពន្ធ២នាក់ស្លាប់កៀបជាប់ក្នុងរថយន្ដកាលពីវេលាម៉ោង១និង២០នាទីយប់ឈានចូលថ្ងៃទី១២ ខែមករា ឆ្នាំ២០១៩ នៅលើកំណាត់ផ្លូវជាតិលេខ៥ ចន្លោះគីឡូម៉ែតលេខ២១៩ ២២០ ស្ថិតក្នុងភូមិស្វាយដូនកែវ ឃុំស្វាយដូនកែវ ស្រុកបាកាន។
ភាគីរថយន្ដមួយគ្រឿងជិះគ្នា២នាក់ប្តីប្រពន្ធម៉ាកហ៊ីយ៉ាន់ដាយ ពណ៌ស ពាក់ស្លាកលេខ តាកែវ ៣A-១០៨៨ បើកបរដោយបុរសជាប្ដីឈ្មោះ ខេង រ៉ា អាយុ៤១ឆ្នាំ បានស្លាប់ និងអ្នករួមដំណើរជាប្រពន្ធឈ្មោះ ធា អាយុ៤០ឆ្នាំ ។ ជនរងគ្រោះទាំង២នាក់រស់នៅភូមិរំលេច ឃុំរំលេច ស្រុកបាកាន។
ចំណែកភាគីរថយន្តមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខ កំពង់ចាម ១A-៦៣៧៨ បើកបរដោយបុរសមិនស្គាល់អត្តសញ្ញាណម្នាក់ បានរត់គេចខ្លួនបាត់ ។
ប្រភពព័ត៌មានបានឱ្យដឹងថា មុនពេលកើតហេតុ រថយន្ដមួយគ្រឿងជិះគ្នា២នាក់ប្តីប្រពន្ធម៉ាកហ៊ីយ៉ាន់ដាយ ពណ៌ស ពាក់ស្លាកលេខ តាកែវ ៣A-១០៨៨ បានធ្វើដំណើរពីលិចទៅកើត លុះទៅដល់ចំណុចកើតហេតុមិនដឹងថាចាំងនឹងភ្លើងហ្វារថយន្ដដែលមកពីមុខ ឬមួយក៏អ្នកបើកបរងងុយដេកនោះទេ បានជាទៅបុកពីក្រោយរថយន្ដហ៊ីយ៉ាន់ដាយពណ៌សមួយគ្រឿងទៀត ពាក់ស្លាកលេខ កំពង់ចាម ១A-៦៣៧៨ ដែលកំពុងធ្វើដំណើរស្របគ្នា បណ្ដាលឲ្យរថយន្ដខាងក្រោយក្រពិតរួញចូលគ្នាកៀបប្ដីប្រពន្ធទាំង២នាក់ស្លាប់យ៉ាងអាណោចអាធ័មនៅក្នុងរថយន្ដ។
ឃើញហេតុការណ៍បែបនេះអ្នកបើកបររថយន្ដខាងមុខដែលមិនស្គាល់អត្តសញ្ញាណបានទុករថយន្ដចោល ហើយគេចខ្លួនបាត់ស្រមោលតែម្ដង។
ករណីទី២-គ្រោះថ្នាក់ចរាចរណ៍រវាងរថយន្ដឡិចស៊ីស៤៧០មួយគ្រឿងបុកជាមួយម៉ូតូមួយគ្រឿង បណ្ដាលឲ្យអ្នកបើកបរម៉ូតូស្លាប់ភ្លាមៗនៅនឹងកន្លែងកើតហេតុ។
ហេតុការណ៍នេះបានកើតឡើងកាលពីវេលាម៉ោង១និង៤៥នាទីរសៀលថ្ងៃទី១២ ខែមករា ឆ្នាំ២០១៩ លើកំណាត់ផ្លូវកៅស៊ូមួយខ្សែស្ថិតក្នុងភូមិស្វាយប៉ាក ឃុំព្រងិល ស្រុកភ្នំក្រវាញ ។
ជនរងគ្រោះដែលស្លាប់ឈ្មោះ សេង សារឿន ភេទប្រុស អាយុប្រមាណជាង៤០ឆ្នាំ ជាមន្ត្រីយោធានៅតំបន់ប្រតិបត្តិការសឹករងខេត្ត។
អ្នកឃើញហេតុការណ៍បាននិយាយថា មុនពេលកើតហេតុ គេឃើញបុរសម្នាក់ជាអ្នកបើកបររថយន្ដមួយគ្រឿងម៉ាកឡិចស៊ីស បើកយ៉ាងលឿនក្នុងទិសដៅពីស្រុកភ្នំក្រវាញឆ្ពោះទៅកាន់ទីរួមខេត្ត លុះទៅដល់ចំណុចកើតហេតុ បានបុកម៉ូតូមួយគ្រឿងពីក្រោយពេញទំហឹង បណ្ដាលឲ្យអ្នកបើកបរម៉ូតូស្លាប់ភ្លាមៗនៅនឹងកន្លែងកើតហេតុ។ បន្ទាប់មកអ្នកបើកបររថយន្តដែលមិនស្គាល់អត្តសញ្ញាណបានបើករថយន្ដទៅទុកចោលនៅខាងមុខសាលាឃុំព្រងិល រួចរត់គេចខ្លួនទៅបាត់ស្រមោល។
ក្រោយពេលកើតហេតុ សមត្ថកិច្ចចុះទៅពិនិត្យកន្លែងកើតហេតុ និងបានប្រគល់សពឲ្យទៅក្រុមគ្រួសារដើម្បីយកទៅធ្វើបុណ្យតាមប្រពៃណី ចំណែកវត្ថុតាងរក្សាទុកនៅបុស្ដិ៍រដ្ឋបាលព្រងិល និងស្រាវជ្រាវតាមចាប់ខ្លួនអ្នកបើកបររថយន្តដើម្បីឲ្យមកទទួលខុសត្រូវចំពោះមុខច្បាប់៕
ចែករំលែកព័តមាននេះ