ខេត្តស្វាយរៀង ៖ លោក ញឹម សាំ ចៅសង្កាត់ចេក ក្រុងស្វាយរៀង បានត្រូវជនស្រវឹងស្រាម្នាក់វាយទម្លាក់ពីលើម៉ូតូធ្លាក់ចូលភក់ក្រោលក្របីបណ្តាលឱ្យរងរបួសធ្ងន់ ខណៈលោកចៅសង្កាត់ទៅសាកសួរ ព្រោះមានពាក្យបណ្តឹងពីប្រជាពលរដ្ឋថា មានជនម្នាក់ស្រវឹងស្រាកំពុងអុកឡុកដេញវាយអ្នកភូមិ ។
នៅពេលទទួលពាក្យបណ្តឹងភ្លាម លោកចៅសង្កាត់ក៏ទៅកន្លែងកើតហេតុដើម្បីសួរនាំ តែមិនទាន់ទាំងចុះពីលើម៉ូតូផង ក៏ត្រូវជនប្រមឹកវាយទម្លាក់ពីលើម៉ូតូដួលចូលក្នុងភក់ក្រោលក្របី ហើយជនស្រវឹងកំណាចក៏ស្ទុះទៅជាន់ពីលើនិងធាក់ទៀត បណ្តាលឲ្យរបួសធ្ងន់ទ្រមខ្លួនតែម្តង ។ខណៈនោះ អ្នកស្រុកឃើញក៏រត់មកជួយ និងប្តឹងសមត្ថកិច្ចឲ្យមកជួយអន្តរាគមន៍ ។ ពេលនោះ បើអ្នកភូមិជួយមិនទាន់ទេ លោកចៅសង្កាត់អាចនឹងស្លាប់បាន ។
អំពើហិង្សាវាយលោកចៅសង្កាត់នេះ បានកើតឡើងកាលពីយប់ថ្ងៃទី៩ ខែមករា នៅភូមិទទា សង្កាត់ចេក ។ បើតាមសមត្ថកិច្ចមូលដ្ឋានឱ្យដឹងថា នេះជាករណីហិង្សាដោយចេតនា ដែលបង្កឡើងដោយជនឈ្មោះ ប៉ូច សុផល ហៅខ្វិន ភេទប្រុស អាយុ៤៧ឆ្នាំ ជាកម្មករសំណង់ រស់នៅក្នុងភូមិ សង្កាត់ខាងលើ ហើយកន្លងមកតែងតែផឹកស្រាស្រវឹងរួចដើរឡូឡាអុកឡុកអ្នកភូមិជាញឹកញាប់ ។
ប្រភពដដែលបន្តថា ជននេះបានវាយជនរងគ្រោះជាចៅសង្កាត់ចេក គឺលោក ញឹម សាំ អាយុ៧២ឆ្នាំ មានទីលំនៅក្នុងភូមិទទាដែរ បណ្តាលឱ្យគ្រេចកដៃស្តាំ និងស្នាមឆូតករងរបួសធ្ងន់ ។ ពេលសមត្ថកិច្ចទៅដល់ ជនសង្ស័យវាយទាំងសមត្ថកិច្ចទៀត ដែលទម្រាំចាប់ខ្លួនបានបែកល្បាប់ប្រឡាក់ភក់លាមកក្របីឲ្យស្រមកតែម្តង ។ ជនប្រមឹកឈ្មោះប៉ូច សុផល ហៅខ្វិនត្រូវបានឃាត់ខ្លួននៅអធិការដ្ឋាននគរបាលក្រុងស្វាយ
រៀង ដើម្បីកសាងសំណុំរឿងបញ្ជូនទៅសាលាដំបូងខេត្ត នៅថ្ងៃទី១១ ខែមករា៕
ចែករំលែកព័តមាននេះ