ខេត្តព្រះសីហនុ ៖ រថយន្តទំនើបបន្លំពន្ធចង្កូតស្តាំចំនួន៩គ្រឿង និងរថយន្តចង្កូតឆ្វេងបន្លំពន្ធចំនួន៥គ្រឿង ត្រូវបានមន្ត្រីសាខាគយនិងរដ្ឋាករខេត្ត រឹបអូសជាបន្តបន្ទាប់នារយៈពេលប៉ុន្មានថ្ងៃចុងក្រោយនេះ ដោយរក្សាទុកជាទ្រព្យសម្បត្តិរបស់រដ្ឋ ។ នេះបើយោងតាមការបញ្ជាក់របស់លោក ទុំ…
ខេត្តព្រះសីហនុ ៖ រថយន្តទំនើបបន្លំពន្ធចង្កូតស្តាំចំនួន៩គ្រឿង និងរថយន្តចង្កូតឆ្វេងបន្លំពន្ធចំនួន៥គ្រឿង ត្រូវបានមន្ត្រីសាខាគយនិងរដ្ឋាករខេត្ត រឹបអូសជាបន្តបន្ទាប់នារយៈពេលប៉ុន្មានថ្ងៃចុងក្រោយនេះ ដោយរក្សាទុកជាទ្រព្យសម្បត្តិរបស់រដ្ឋ ។ នេះបើយោងតាមការបញ្ជាក់របស់លោក ទុំ ណូ ប្រធានសាខាគយនិងរដ្ឋាករខេត្ត កាលពីរសៀលថ្ងៃទី១០ ខែមករា ។
លោក ទុំ ណូ បានឱ្យដឹងថា រថយន្តទំនើបចង្កូតស្តាំនិងឆ្វេងបន្លំពន្ធសរុបចំនួន១៤គ្រឿង ត្រូវបានចាប់រឹបអូសជាបន្តបន្ទាប់ នៅក្នុងប្រតិបត្តិការបង្ក្រាបអំពើរត់គេចពន្ធ ពីសំណាក់សមត្ថកិច្ចគយពីអគ្គនាយកដ្ឋានគយនិងរដ្ឋាករ សហការជាមួយសមត្ថកិច្ចសាខាគយនិងរដ្ឋាករខេត្ត និងសមត្ថកិច្ចពាក់ព័ន្ធ ។
លោកប្រធានសាខាគយនិងរដ្ឋាករខេត្ត ថ្លែងទៀតថា រថយន្តទំនើបចង្កូតស្តាំបន្លំពន្ធទាំងអស់នេះ ត្រូវដកហូតទុកជាសម្បត្តិរដ្ឋដោយមិនមានការដោះស្រាយបង់ជាប្រាក់ពិន័យហើយឲ្យម្ចាស់យកទៅវិញឡើយ ព្រោះយោងតាមច្បាប់របស់ព្រះរាជាណាចក្រកម្ពុជា ដែលរាជរដ្ឋាភិបាលបានប្រកាសនាពេលកន្លងមក គឺហាមមិនឱ្យនាំរថយន្តចង្កូតស្តាំចូលទៀតទេ លើសពីនេះម្ចាស់រថយន្តថែមទាំងបានបន្លំបំពាក់ផ្លាកលេខក្លែងក្លាយថែមទៀត ។
ទោះបីជាយ៉ាងណា ម្ចាស់រថយន្តទាំងនោះពុំត្រូវបានឃាត់ខ្លួនទេព្រោះបានព្រមព្រៀងប្រគល់រថយន្តដោយស្ម័គ្រចិត្ត ។ ឆ្លៀតក្នុងឱកាសនោះដែរ លោកប្រធានសាខាគយនិងរដ្ឋាករខេត្ត ក៏បានអំពាវនាវផងដែរដល់បងប្អូនប្រជាពលរដ្ឋទាំងអស់ សូមបញ្ឈប់សកម្មភាពនាំចូលរថយន្តចង្កូតស្តាំ និងគោរពច្បាប់ទាំងអស់គ្នា ។ ការចូលរួមគោរពច្បាប់របស់បងប្អូន គឺជាការរួមចំណែកបង្កើនប្រាក់ចំណូលពន្ធដល់រាជរដ្ឋាភិបាល ៕
ចែករំលែកព័តមាននេះ