ខេត្តបាត់ដំបង ៖ សំណុំរឿងលោកនាយប៉ុស្ដិ៍ជ្រោយស្ដៅ ស្រុកថ្មគោល ប្រើប្រាស់អាវុធបាញ់គំរាមលោកមេឃុំ ដោយសារក្ដៅក្រហាយសុំបើកល្បែងស៊ីសងមិនបាន ហើយត្រូវគេបិទស្ងាត់ឈឹងអស់រយៈពេល១ខែកន្លងទៅនោះ ពេលនេះ បានបែកធ្លាយនិងបង្កឲ្យមានការភ្ញាក់ផ្អើលពេញស្នងការដ្ឋានខេត្ត ខណៈលោកស្នងការរងទទូលបន្ទុកបុគ្គលិកបានប្រាប់កោះសន្តិភាព នាព្រឹកថ្ងៃទី១១ ខែមករាថា ពេលនេះថ្នាក់ដឹកនាំកំពុងចាត់វិធានការតាមនីតិវិធីរបស់អង្គភាពហើយ ។
ប្រភពពីមន្ត្រីស្រុកថ្មគោលបានឲ្យដឹងថា សំណុំរឿងលោកនាយប៉ុស្ដិ៍ជ្រោយស្ដៅបាញ់គំរាមលោកមេឃុំជ្រោយស្ដៅនេះ បានកើតឡើងតាំងពីថ្ងៃទី១០ ខែធ្នូ ឆ្នាំ២០១៨ តែត្រូវគេព្យាយាមបិទមិនឲ្យបែកធ្លាយដល់អ្នកសារព័ត៌មានឡើយ ។ ប្រភពព័ត៌មានបានឲ្យដឹងទៀតថា លោក ហែម សុផុន នាយប៉ុស្ដិ៍ជ្រោយស្ដៅ បានប្រើប្រាសកាំភ្លើងរបស់គាត់បាញ់មេឃជាច្រើនគ្រាប់ ខណៈស្រវឹងជោកជាំដែលគេសង្ស័យថា
ជាសញ្ញាគំរាមកំហែងដល់លោក ហ៊ីន ណាគ្រី មេឃុំជ្រោយស្ដៅ ដោយសារមានវិវាទជាមួយគ្នា ។
មន្ត្រីដែលសុំមិនប្រាប់ឈ្មោះរូបនេះ បានបញ្ជាក់ថា បើតាមព័ត៌មានខ្សឹបខ្សៀវតៗគ្នាមូលហេតុដែលនាំឲ្យលោកនាយប៉ុស្ដិ៍ក្ដៅក្រហាយ រហូតឈានដល់ទាញកាំភ្លើងបាញ់មេឃជាច្រើនគ្រាប់គំរាមលោកមេឃុំនេះ ដោយសារតែខឹងលោកមេឃុំ «មិនអនុញាតឲ្យបើកល្បែងស៊ីសង» ។
ជុំវិញករណីនេះ មេឃុំជ្រោយស្ដៅ លោកហ៊ីន ណាគ្រី បានបំភ្លឺប្រាប់កោះសន្តិភាពតាមទូរស័ព្ទ កាលពីព្រឹកថ្ងៃទី១០ ខែមករាថា ពិតជាមានរឿងនេះកើតឡើងចំពោះរូបលោកមែន ។ លោកមេឃុំប្រាប់ថា លោក ហែម សុផុន នាយប៉ុស្ដិ៍ជ្រោយស្ដៅ បានប្រើប្រាស់កាំភ្លើងបាញ់ជាច្រើនគ្រាប់នៅនឹងផ្ទះរបស់ខ្លួន(ផ្ទះនាយប៉ុស្ដិ៍) លុះក្រោយពេលបាញ់រួច នាយប៉ុស្ដិ៍រូបនេះបានកាន់កាំភ្លើងមកបង្ករឿងនិងគំរាមកំហែងរូបលោកដល់ផ្ទះទៀត ទាំងខ្លួនស្រវឹងស្រាជោកជាំ ។
លោក ហ៊ីន ណាគ្រី បញ្ជាក់ថា លោក ហែម សុផុន បានគំរាមកំហែងនិងប្រមាថរូបលោកគ្រប់បែបយ៉ាង ដោយសារទំនាស់រឿងសុំបើកល្បែងស៊ីសង ។ នាយប៉ុស្តិ៍រូបនេះបានព្យាយាមបង្កបញ្ហាជាមួយលោក តែភ្លាមៗនោះត្រូវបាននាយរងប៉ុស្ដិ៍ និងមន្ត្រីនគរបាលប៉ុស្ដិ៍ប៉ុន្មាននាក់ទៀតមកជួយអន្តរាគមន៍ទាន់ពេល
វេលា ។ បើមិនដូច្នេាះទេ ប្រហែលអាចប្រឈមមុខដាក់គ្នាធ្ងន់ធ្ងរជាមិនខាន ។
លោក ហ៊ីន ណាគ្រី បានបញ្ជាក់បន្ថែមអំពីករណីនេះថា កន្លងមកនាយប៉ុស្ដិ៍រូបនេះតែងស្នើសុំបើកល្បែងស៊ីសងនៅក្នុងមូលដ្ឋាន តែលោកមិនអនុញ្ញាត ទើបធ្វើឲ្យលោកនាយបុ៉ស្ដិ៍ឈានដល់ការប្រើប្រាស់អាវុធបាញ់មេឃគំរាមកំហែងលោកបែបនេះ ។ លោកបានដាក់ពាក្យបណ្ដឹងទៅគណៈបញ្ជាការឯកភាពស្រុក
និងខេត្តរួចហើយ ដើម្បីឲ្យជួយអន្តរាគមន៍និងដោះស្រាយ។
នៅថ្ងៃដដែលនោះ កោះសន្តិភាពមិនអាចស្វែងរកការឆ្លើយតបពីលោក ហែម សុផុន នាយប៉ុស្ដិ៍ជ្រោយស្ដៅបានទេ ជុំវិញការចោទប្រកាន់ពីសំណាក់លោកមេឃុំ ពីករណីខាងលើនេះ ។ រីឯលោក ហៀង ប៊ុនថា អធិការរងនគរបាលស្រុកថ្មគោលទទួលបន្ទុកផ្នែកព្រហ្មទណ្ឌ បានឆ្លើយបដិសេធយ៉ាងខ្លីថា «ខ្ញុំមិនបានដឹងរឿងនេះទេ» ។ ប៉ុន្តែលោកឧត្តមសេនីយ៍ត្រី ជេត វណ្ណនី ស្នងការរងនគរបាលខេត្ត ទទូលបន្ទុកព្រហ្មទណ្ឌ មានប្រសាសន៍ថា ពិតជាមានរឿងដូចនេះកើតឡើងមែន ហើយពេលនេះ ខាងការិយាល័យជំនាញកំពុងតែចាត់ការ ។ លោកស្នងការរងរូបនេះបញ្ជាក់ថា ប្រសិនការផ្ទុះអាវុធរបស់លោកនាយប៉ុស្ដិ៍ជ្រោយស្ដៅដោយសារតែរឿងសុំបើកល្បែងស៊ីសងមែន វាជាកំហុសធ្ងន់ណាស់សម្រាប់លោកនាយប៉ុស្ដិ៍ ខណៈខ្លួនជាមន្ត្រីនគរបាលយុត្ដិធម៌ ។
លោកបានរំឭកថា កន្លងមកលោកស្នងការខេត្ត តែងដាក់បទបញ្ជាជាបន្តបន្ទាប់ឲ្យសមត្ថកិច្ចនៅតាមមូលដ្ឋាន ត្រូវមានវិធានការទប់ស្កាត់ឬបង្ក្រាបរាល់ល្បែងស៊ីសងនានា ។ ប៉ុន្តែផ្ទុយទៅវិញ បែរជាមាននាយប៉ុស្ដិ៍សុំបើកល្បែងស៊ីសង ដែលនេះជាទង្វើមិនសមរម្យទេ ។ ប្រភពពីមន្ត្រីនៅស្នងការដ្ឋាននគរបាលខេត្តបានបង្ហើបឲ្យដឹងថា សមត្ថកិច្ចនិងមន្ត្រីរាជការនៅក្នុងមូលដ្ឋានសុទ្ធតែបានដឹងករណីបាញ់បោះនេះ តែមិនត្រូវបានគេទម្លាយឲ្យដឹងឡើយ ។ មន្ត្រីដដែលបញ្ជាក់ថា ចាប់តាំងពីមន្ត្រីប៉ុស្ដិ៍ មន្ត្រីអធិការដ្ឋានស្រុក រហូតដល់មន្ត្រីនៅស្នងការដ្ឋានខេត្តមួយចំនួន សុទ្ធតែដឹងរឿងនេះតែគេនាំគ្នាបិទបាំង ព្រោះការផ្ទុះអាវុធរបស់លោកនាយប៉ុស្ដិ៍ជ្រោយស្ដៅនេះមិនមែនទើបតែលើកទី១ទេ គឺញឹកញាប់ពេកហើយ ជាពិសេសពេលមន្ត្រីរូបនេះស្រវឹងស្រាម្ដងៗ ។
ជុំវិញបណ្ដឹងរបស់លោក ហ៊ីន ណាគ្រី មេឃុំជ្រោយស្ដៅ បើតាមលោកមេឃុំរូបនេះ បានបញ្ជាក់អំពីជំហររបស់លោកថា លោកទាមទារឲ្យថ្នាក់ដឹកនាំត្រូវតែធ្វើការផ្លាស់ប្ដូរលោក ហែមសុផុន ចេញពីប៉ុស្ដិ៍ជ្រោយស្ដៅ ព្រោះលោកមិនអាចធ្វើការងារជាមួយមន្ត្រីរូបនេះបន្តទៀតបានទេ ។ លោកមេឃុំក៏បានទម្លាយដែរថា បច្ចុប្បន្ននេះល្បែងស៊ីសងបានកើតឡើងពេញមូលដ្ឋាន តែសមត្ថកិច្ចមិនបានអើពើទប់ស្កាត់ឬបង្ក្រាបទេ បើទោះជាលោកបានទទូចស្នើឲ្យមានការទប់ស្កាត់ឬបង្ក្រាបខ្លះក្ដី ។
លោកមេឃុំបានលើកឡើងបែបជាសំណួរដូច្នេះថា មិនត្រឹមតែមិនបង្ក្រាបល្បែងទេ បែរជាសុំបើកល្បែងស៊ីសងបន្ថែមទៀត…តើឯណាទៅគោលនយោបាយ«ភូមិ ឃុំមានសុវត្ថិភាព» ដែលជាគោលនយោបាយដ៏ចម្បងរបស់រាជរដ្ឋាភិបាល ? លោក ហ៊ីន ណាគ្រី បានបង្ហាញពីឆន្ទៈរបស់លោកថា «ខ្ញុំធ្វើជាមេឃុំទើបបាន១ឆ្នាំទេ តែគ្រប់សេវាកម្មទាំងអស់នៅក្នុងឃុំ ខ្ញុំមិនដែលធ្វើឲ្យពលរដ្ឋល្អក់កករឡើយ ។ ដូច្នេះ ក្នុង
សំណុំរឿងនេះ បើឃើញថាខ្ញុំមានកំហុស ខ្ញុំសុខចិត្តឲ្យថ្នាក់លើដកខ្ញុំចុះ…តែខ្ញុំមិនអាចយកតួនាទីខ្ញុំទៅពាក់ព័ន្ធនឹងបទល្មើសជាមួយមន្ត្រីខិលខូចឡើយ។ ខ្ញុំត្រូវតែយកតួនាទីខ្ញុំទៅបម្រើពលរដ្ឋដោយស្មោះត្រង់ និងអនុវត្តតាមគោលនយោបាយរបស់រាជរដ្ឋាភិបាល» ។
ពាក់ព័ន្ធនឹងសំណុំរឿងនេះ លោកឧត្តមសេនីយត្រី សៅ សាម៉ុន ស្នងការរងនគរបាលខេត្តទទូលបន្ទុកបុគ្គលិក បានមានប្រសាសន៍ប្រាប់កោះសន្តិភាព នាព្រឹកថ្ងៃទី១១ ខែមករាថា លោកទើបបានដាក់សំណុំរឿងនេះ(សំណុំរឿងនាយប៉ុស្តិ៍ជ្រោយស្ដៅ) ជួនលោកស្នងការដើម្បីពិនិត្យ និងសម្រេចហើយ កាលពីថ្ងៃទី១០ ខែមករា។ លោកស្នងការរងរូបនេះ បានបញ្ជាក់ប្រាប់ថា ពេលនេះថ្នាក់លើត្រូវការឆ្លងយោបល់ក្រុមការងារជាមុនសិន មុនពេលធ្វើការសម្រេច។ ប៉ុន្តែយ៉ាងណាក៏ដោយ ចំពោះចំណាត់ការលើលោក ហែម សុផុន នាយប៉ុស្ដិ៍នគរបាលជ្រោយស្ដៅនេះ ថ្នាក់លើនឹងមានវិធានការបន្តទៀត ៕
ចែករំលែកព័តមាននេះ