ខេត្តបាត់ដំបង ៖ ជនសង្ស័យ៣នាក់ ត្រូវកម្លាំងសមត្ថកិច្ចស្រាវជ្រាវឃាត់ខ្លួនបាន កាលពីល្ងាចថ្ងៃទី១១មករា ក្រោយពីឃុបឃិតគ្នាលួចយកគោយន្តកន្ត្រៃ១គ្រឿងពីក្នុងរោងម៉ាស៊ីនកិនស្រូវមួយកន្លែង ស្ថិតនៅភូមិដង្គត់ធ្នង់ ឃុំតាគ្រាម ស្រុកបាណន់ ។
ជនសង្ស័យទាំង៣នាក់ ១-ឈ្មោះឌី មករា អាយុ២៧ឆ្នាំ ខេត្តសៀមរាប ២-ឈ្មោះមោះ ញឹមចំរើន អាយុ២៤ឆ្នាំ នៅភូមិអង្គតាសោម ឃុំលាយបូ ស្រុកត្រាំកក់ ខេត្តតាកែវ និង៣-ឈ្មោះទុំ សំណាង អាយុ២៨ឆ្នាំ នៅភូមិបង្គាំងស ឃុំគងជ័យ ស្រុកអូររាំងឪ ខេត្តកំពង់ចាម ។
បើតាមសមត្ថកិច្ចថា ជនទាំង៣នាក់នេះជាកម្មករសំណង់របស់ម្ចាស់គោយន្តឈ្មោះធឿន ធួក ប្រុសអាយុ៧៤ឆ្នាំ រស់នៅភូមិអូរចា សង្កាត់អូរចា ក្រុងបាត់ដំបង តែជនរងគ្រោះបានទៅធ្វើរោងម៉ាស៊ីនកិនស្រូវនៅចំណុចភូមិ-ឃុំខាងលើ។
សមត្ថកិច្ចបាននិយាយថា ក្រុមនេះបាននាំគ្នាលួចបើកគោយន្តសណ្ដោងទាំងរ៉ឺម៉ក ដឹកទាំងស៊ីម៉ង់ត៍ប៉ុន្មានការុងថែមទៀត ចេញពីរោងម៉ាស៊ីននៅម៉ោង១រំលងអធ្រាត្រ ឈានចូលថ្ងៃទី១១ មករា តែពេលចេញផុតដល់ពាក់កណ្ដាលផ្លូវ ស្រាប់តែបើកធ្លាក់ផ្លូវក្រឡាប់ចូលប្រឡាយតែម្ដង ។
សមត្ថកិច្ចបានឲ្យដឹងទៀតថា ក្រោយពីបាត់គោយន្ត និងដឹងថា កម្មករលួចយកទៅម្ចាស់ក៏បានប្ដឹងទៅ
សមត្ថកិច្ច និងបាននាំគ្នាស្វែងរក ទើបនៅល្ថាចថ្ងៃដដែលក៏ប្រទះឃើញគោយន្តក្រឡាប់ចូលប្រឡាយ ហើយសមត្ថកិច្ចក៏ស្រាវជ្រាវឃាត់ខ្លួនក្រុមកម្មករទាំង៣នាក់នោះតែម្ដង ។
លោកឧត្តមសេនីយត្រី ជេត វណ្ណនី ស្នងការរងខេត្តបានប្រាប់ថា ជនទាំង៣នាក់នេះបានលួចគោយន្ត១គ្រឿង ហើយលួចទាំងស៊ីម៉ង់ត៏ប៉ុន្មានការុងថែមទៀតផង ហើយពួកគេគឺជាកម្មករធ្វើរោងម៉ាស៊ីនកិនស្រូវឲ្យម្ចាស់គោយន្តនេះ ។ លោកស្នងការរងបានបញ្ជាក់ថា ក្រុមនេះត្រូវកម្លាំងនគរបានស្រុកបាណន់ ធ្វើការស្រាវឃាត់ខ្លួនបាន ពេលកំពុងស្វែងរកជាមួយជនរងគ្រោះ ។ សមត្ថកិច្ចបានដកហូតវត្ថុតាងគោយន្តកន្ត្រៃ និងស៊ីម៉ង់ត៍ ប្រគល់អោយម្ចាស់ដើមវិញហើយ។ ដោយឡែកក្រុមជនសង្ស័យ កម្លាំងជំនាញកំពុងសួរនាំ ដើម្បីកសាងសំណុំរឿងបញ្ជូនទៅតុលាការហើយ ។
ចែករំលែកព័តមាននេះ