សហរដ្ឋអាមេរិក ៖ ទូរទស្សន៍ NBC អាមេរិករាយការណ៍នាថ្ងៃទី១០ មករាថា អ្នកដំណើរជិត៣០០នាក់ នៃនាវាកម្សាន្តអាមេរិកដ៏ធំបំផុតមួយ ដែលបើកបរក្នុងតំបន់ការ៉ាអីុប បានឆ្លងវីរុសពោះវៀនមួយ។
នាវាកម្សាន្តយក្សOASIS OF THE SEAS មានបណ្ដោយ៣៦២ម៉ែត្របានបើកបរក្នុងដំណើរកម្សាន្តរយៈពេល៧ថ្ងៃ ក្នុងតំបន់ការ៉ាអីុប។ អ្នកនាំពាក្យរបស់ក្រុមហ៊ុនROYAL CARIBBEAN CRUISES OWEN TORRESប្រកាសថា ដោយសារមានវីរុសឆ្លងនោះ នាវាកម្សាន្តនឹងបើកត្រឡប់មកកាន់រដ្ឋផ្លរីដានាថ្ងៃទី១២មករា មួយថ្ងៃមុនការគ្រោងទុក។
តាមអ្នកនាំពាក្សនោះថា អ្នកជំងឺ២៧៥នាក់ ត្រូវបានក្រុមគ្រូពេទ្យព្យាបាលលើនាវាដោយប្រើប្រាស់ថ្នាំនានា។ គេក៏និយាយដែរថាអ្នកដំណើរជាង៨០០០នាក់តាមនាវានោះ នឹងត្រូវគេផ្ដល់ប្រាក់ឲ្យវិញ ព្រោះដំណើរកម្សាន្តរបស់ពួកគេត្រូវអាក់ខាន។
ពុំមែនជារឿងកម្រមួយឡើយ ដែលនាវាកម្សាន្តឆ្លងជំងឹពោះវៀន GASTRO-ENTERITE។ កាលពីខែឧសភាឆ្នាំ២០១៦ អ្នកដំណើរ២៥២នាក់ ដែលភាគច្រើនជាជនជាតិអង់គ្លេស បានឆ្លងNOROVIRUSជាអ្នកបង្កឲ្យមានជំងឺGASTRO-ENTERITEពេលធ្វើដំណើរតាមនាវាកម្សាន្តBALMORAL៕
ចែករំលែកព័តមាននេះ