ខេត្តប៉ៃលិន ៖ បុរសម្នាក់ត្រូវគេស្គាល់ថាជាមន្ត្រីបរិស្ថានខេត្តប៉ៃលិន បានបាត់ម៉ូតូ១គ្រឿងពេលគាត់ចូលរួមប្រជុំនៅក្នុងសាលាស្រុកសាលាក្រៅ ដើម្បីពិភាក្សាការងាររៀបចំទទួលសម្តេចកិត្តិព្រឹទ្ធបណ្ឌិត ដែលនឹងចុះមកក្នុងខេត្តប៉ៃលិននាពេលខាងមុខនេះ ។
ហេតុការណ៍ជនសង្ស័យលួចម៉ូតូក្នុងបរិវេណសាលាស្រុកសាលាក្រៅនេះបានកើតឡើងកាលពីវេលាម៉ោង១០និង៤០នាទីព្រឹកថ្ងៃទី១១ ខែមករា ឆ្នាំ២០១៩ ។
ប្រភពព័ត៌មានបានឱ្យដឹងថា ជនរងគ្រោះជាម្ចាស់ម៉ូតូឈ្មោះ ណុប សាលុច ភេទប្រុស អាយុ៤៥ឆ្នាំ ជាមន្ត្រីបរិស្ថានខេត្ត រស់នៅភូមិអូរច្រាលិច សង្កាត់បរយ៉ាខា ក្រុងប៉ៃលិន ។ ចំណែកម៉ូតូ១គ្រឿងដែលបាត់ម៉ាកហុងដាឌ្រីម ពណ៍ខ្មៅ ស៊េរីឆ្នាំ២០១៧ ពាក់ស្លាកលេខ បាត់ដំបង ១X- ៥៦៩៧ ។
បើតាមប្រភពពីម្ចាស់ម៉ូតូបានឱ្យដឹងថា នៅព្រឹកថ្ងៃកើតហេតុ គាត់បានជិះម៉ូតូមួយគ្រឿងទៅសាលាស្រុកសាលាក្រៅ ដើម្បីចូលរួមប្រជុំស្តីពីការទទួលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលនឹងអញ្ជើញមកសួរសុខទុក្ខប្រជាពលរដ្ឋនៅក្នុងខេត្តប៉ៃលិន ក្នុងកិច្ចការមនុស្សធម៌ កាកបាទក្រហមកម្ពុជានាថ្ងៃ២២ ដល់២៥ ខែមករា ឆ្នាំ២០១៩ ខាងមុខនេះ ។
ប្រភពដដែលបានបន្តទៀតថា លុះប្រជុំរយៈពេល១ព្រឹកចប់សព្វគ្រប់ ក៏នាំគ្នាចេញមកក្រៅ ដើម្បីត្រឡប់ទៅផ្ទះរៀងៗខ្លួន ពេលដើររកមើលម៉ូតូរបស់គាត់ ស្រាប់តែអត់ឃើញ ក៏ដើររកមើលអស់ចិត្តអស់ចង់ រហូតដល់មន្ត្រីរាជការចេញទៅផ្ទះអស់ ទើបដឹងថាម៉ូតូរបស់គាត់ត្រូវជនសង្ស័យចូលលួច ហើយក៏ប្រញាប់ទៅដាក់ពាក្យបណ្តឹងនៅនគរបាលអធិការស្រុកសាលាក្រៅ ដើម្បីស្រាវជ្រាវតាមរក ។
ចំណែកប្រជាពលរដ្ឋបានឱ្យដឹងថា នៅតាមខាងមុខបរិវេណមន្ទីរ តាមសាលាស្រុក ឬក្នុងសាលាខេត្ត គួរតែដាក់កាមេរ៉ាសុវត្ថិភាព ដើម្បីចាំចាប់សកម្មភាពជនសង្ស័យទាំងនោះ ព្រោះកន្លងមកធ្លាប់មានបាត់នៅក្នុងបរិវេណមន្ទីរជាច្រើនកន្លែង ៕
ចែករំលែកព័តមាននេះ