ខេតស្ទឹងត្រែង ៖ តាមការអះអាងពីរដ្ឋបាលព្រៃឈើថា រថយន្តខ្នាតធំប្រភេទវ៉េអង និងយីឌុប សរុបចំនួន៩០គ្រឿងដឹកឈើអារមិនដឹងសន្សំយកពីតំបន់ណាខ្លះទេ ចេញពីរោងចក្រអារកែច្នៃឈើបណ្តោះអាសន្ននៅស្រុកសេសាន ឆ្ពោះទៅកាន់ទីផ្សាររបស់ក្រុមហ៊ុនចាប់តាំងពីថ្ងៃទី៥ ខែមករា រហូតមកត្រឹមយប់ថ្ងៃ១០ ខែមករា ឆ្នាំ២០១៩នេះ គឺមានរាល់យប់យ៉ាងរញ្ជួយខេត្តស្ទឹងត្រែង និងផ្លូវជាតិលេខ៧។
លោក អន ចាន់សុជាតិ នាយខណ្ឌរដ្ឋបាលព្រៃឈើស្តីទីបានប្រាប់ឱ្យដឹងថា ឈើដែលដឹកតាមរថយន្ត វ៉េអង និងយីឌុបខាងលើ ជាប្រភេទឈើលេខ១ និងលេខ២ ដោយបានដឹកជញ្ជូនតាមការអនុញ្ញាតរបស់មន្ទីរកសិកម្ម និងរដ្ឋបាលព្រៃឈើ និងមានការវាស់វែងត្រឹមត្រូវមុនឡើងរថយន្តចេញដំណើរ។
លោក លៀង សេង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានបញ្ជាក់ថា រថយន្តបានដឹកជញ្ជូនផលអនុផលព្រៃឈើអារកែច្នៃចេញពីរោងចក្រអារកែច្នៃឈើបណ្តោះអាសន្ន សេសាន ជាបន្តបន្ទាប់ រៀងរាល់ថ្ងៃដោយអនុវត្តតាមគោលការណែនាំលើលិខិតអនុញ្ញាត ពុំមានល្មើសផ្ទុយពីការអនុញ្ញាតឡើយ។
លោក ចាប ពិសិដ្ឋ នាយរងសង្កាត់រដ្ឋបាលព្រៃឈើសេកុង និងជាប្រធានក្រុមចម្រុះប្រចាំគោលដៅថ្នាលបណ្តុះកូនឈើភ្នំក្រហម ឱ្យដឹងថា ឈើដែលដឹកតាមរថយន្តធុនធំខាងលើជាប្រភេទឈើលេខ១ និងលេខ២ ដោយបានផ្ទុកលើរថយន្តចំណុះ១៨ម៉ែត្រគូប គឺជាចំនួនម៉ែត្រគូបត្រីគុណដែលច្បាប់អនុញ្ញាតកំណត់ផ្ទុកលើរថយន្ត។
លោកបញ្ជាក់ថា រថយន្តក្រុមហ៊ុនដឹកឈើខាងលើ ចេញពីរោងចក្រអារកែច្នៃឈើបណ្តោះអាសន្នសេសាន ដោយបានដំណើរការរៀងរាល់ថ្ងៃចាប់តាំងពីថ្ងៃទី៥ មករា មកគឺចំនួន១២រថយន្ត ថ្ងៃទី៦ មករា ចំនួន១៤រថយន្ត ថ្ងៃទី៧ មករា ចំនួន១៤រថយន្ត ថ្ងៃទី៨ មករា ចំនួន១៥រថ យន្ត ថ្ងៃទី៩ មករា ចំនួន១៦រថយន្ត និងថ្ងៃទី១០ មករា ២០១៩ គឺចំនួន១៩រថយន្ត ដែលជាឈើរបស់លោកឧកញ៉ា ជ័យ ដែលល្បីថាជាឈ្មួញឈើដ៏ធំប្រចាំខេត្តស្ទឹងត្រែង។
ព័ត៌មានពិស្តារបន្ថែមនឹងមានផ្សាយនៅកាសែតកោះសន្តិភាព
ចែករំលែកព័តមាននេះ