ខេត្តស្ទឹងត្រែង ៖ យ៉ាងហោចណាស់មនុស្សប្រុសស្រីជាង១០០នាក់ ត្រូវចាប់ខ្លួនជាមួយគ្រឿងញៀនប្រមាណជិត២០០គីឡូក្រាម នៅក្នុងកំឡុងឆ្នាំ២០១៨ និងដើមឆ្នាំ២០១៩ ។ ការបង្ហាញរបាយការណ៍នេះឡើងនៅសាលប្រជុំនៃសាលាខេត្តស្ទឹងត្រែង កាលពីថ្ងៃទី៩ មករា…
ខេត្តស្ទឹងត្រែង ៖ យ៉ាងហោចណាស់មនុស្សប្រុសស្រីជាង១០០នាក់ ត្រូវចាប់ខ្លួនជាមួយគ្រឿងញៀនប្រមាណជិត២០០គីឡូក្រាម នៅក្នុងកំឡុងឆ្នាំ២០១៨ និងដើមឆ្នាំ២០១៩ ។
ការបង្ហាញរបាយការណ៍នេះឡើងនៅសាលប្រជុំនៃសាលាខេត្តស្ទឹងត្រែង កាលពីថ្ងៃទី៩ មករា ២០១៩ ក្នុងពិធីត្រួតពិនិត្យឯកសារវត្ថុតាងគ្រឿងញៀន ដែលអនុវត្តសម្រេចបានជាលទ្ធផលនៅឆ្នាំ២០១៨ និងលើកទិសដៅអនុវត្តការងារសម្រាប់ឆ្នាំបន្ទាប់២០១៩ ។
លោក សាន និមល ស្នងការរងនគរបាលទទួលផែនការិយាល័យប្រឆាំងបទល្មើសសេដ្ឋកិច្ចស្នងការដ្ឋាននគរបាលខេត្តស្ទឹងត្រែងបានបង្ហាញនូវរបាយការណ៍ក្នុងអង្គប្រជុំដោយបានលើកឡើងថា កន្លងមកនេះគណៈកម្មាការត្រួតពិនិត្យគ្រឿងញៀនថ្នាក់ខេត្តបានចូលរួមសហការបង្ក្រាបករណីជួញដូរដោយខុសច្បាប់ និងករណីប្រើប្រាស់នូវសារធាតុញៀនសរុបចំនួន៥៦ករណី ព្រមទាំងឃាត់ខ្លួនជនសង្ស័យចំនួន១១៤នាក់ ស្រី៨នាក់ ក្នុងនោះមានជនជាតិខ្មែរ ១០៧នាក់ ស្រី៨នាក់ ជនជាតិឡាវ៥នាក់ និងជនជាតិវៀតណាម២នាក់ ។
ជនសង្ស័យខាងលើត្រូវបានកសាង និងបញ្ជូនសំណុំរឿងទៅអយ្យការអមសាលាដំបូងខេត្តរួចរាល់បន្ទាប់បញ្ចប់នីតិវិធីនៅស្នងការដ្ឋាន ។ លោកស្នងការរូបនេះបន្ថែមថា ស្ថិតក្នុងករណីបង្ក្រាបគ្រឿងញៀនកំឡុង ឆ្នាំ២០១៨ កន្លងមកសមត្ថកិច្ចពាក់ព័ន្ធបង្ក្រាបរឹបអូសថ្នាំញៀនប្រភេទមេតំហ្វេតាមីន (ICE) ទម្ងន់១៦៤០៧៤,៣៨ក្រាមថ្នាំញៀនប្រភេទមេតំហ្វេតាមីន (WY) ចំនួន១១៩៩៥គ្រាប់ថ្នាំញៀនប្រភេទកេតាមីន (Ketamine) ទម្ងន់២២.៨៥៧,៨២ក្រាម ព្រមទាំងបានរឹបអូសទ្រព្យសម្បត្តិមួយចំនួនធំ ពីការបង្ក្រាបគ្រឿងញៀននេះផងដែរ ។
ក្រោមកិច្ចប្រជុំបូកសរុបលទ្ធផលការងារបង្ក្រាបករណីជួញដូរ និងប្រើប្រាស់គ្រឿងញៀនខាងលើលោក យង់ សុវឌ្ឍនា អភិបាលរងខេត្ត និងជាប្រធានលេខាធិការដ្ឋានត្រួតពិនិត្យគ្រឿងញៀនខេត្តបានថ្លែងកោតសរសើរចំពោះការចូលរួមសហការ និងការខិតខំប្រឹងប្រែងរបស់កងកម្លាំងលើការបង្ក្រាបបទល្មើសរត់ពន្ធជួញដូរគ្រឿងញៀននៅក្នុងភូមិសាស្ត្រខេត្តស្ទឹងត្រែងទទួលបាននូវលទ្ធផលល្អ ពិសេសបានយកចិត្តទុកដាក់សហការគ្នាផ្សព្វផ្សាយដល់ប្រជាពលរដ្ឋតាមមូលដ្ឋាននានាឲ្យមានការយល់ដឹងពីគ្រោះថ្នាក់នៃគ្រឿងញៀន ។
លោកលើកឡើងថា បញ្ហាគ្រឿងញៀនជាបញ្ហាសកល និងជាឧក្រិដ្ឋកម្មឆ្លងដែនដែលអាចបង្ករងគ្រោះមហន្តរាយដល់ប្រជាពលរដ្ឋគ្រួសារសហគមន៍ និងសង្គមជាតិនោះដែរ ។ ទោះបីខេត្តស្ទឹងត្រែងមិនមែនជាមូលដ្ឋានផលិតគ្រឿងញៀនក្តី តែខេត្តស្ទឹងត្រែងជាខេត្តដែលរងគ្រោះដោយឧក្រិដ្ឋជននាំនូវសារធាតុញៀនឆ្លងកាត់ពីតំបន់ត្រីកោណមាសមកតាមព្រំដែនឡាវ ហើយបញ្ហានេះអាជ្ញាធរពាក់ព័ន្ធត្រូវយកចិត្តទុកដាក់ខ្ពស់ ដើម្បីទប់ស្កាត់បង្ក្រាបអោយខានតែបាន ៕
ចែករំលែកព័តមាននេះ