ខេត្តបាត់ដំបង ៖ ឧត្តមសេនីយឯក ហ៊ុន ម៉ាណែត អគ្គមេបញ្ជាការរងកងយោធពល ខេមរភូមិន្ទ និងជាមេបញ្ជាការកងទ័ពជើងគោកបានថ្លែងថា ដើម្បីថែរក្សាប្រៀបឈ្នះ និងការពារស្ថិរភាពសង្គមនោះ…
ខេត្តបាត់ដំបង ៖ ឧត្តមសេនីយឯក ហ៊ុន ម៉ាណែត អគ្គមេបញ្ជាការរងកងយោធពល ខេមរភូមិន្ទ និងជាមេបញ្ជាការកងទ័ពជើងគោកបានថ្លែងថា ដើម្បីថែរក្សាប្រៀបឈ្នះ និងការពារស្ថិរភាពសង្គមនោះ គឺការងារនយោបាយ និងការងារសន្តិសុខ គឺដើរទន្ទឹមគ្នា សំខាន់ការប្រមូលកម្លាំងមហាជន ដើម្បីជួយទៅដល់ប្រជាពលរដ្ឋ ដើម្បីឲ្យមហាជន ផ្ដល់ជំនឿទៅលើកងទ័ព និងរាជរដ្ឋាភិបាល ។
ការថ្លែងដូច្នេះធ្វើឡើងក្នុងឱកាសដែលឧត្តមសេនីយឯកចូលរួមក្នុងពិធីសិក្ខាសាលាបូកសរុប លទ្ធផលការងារយោធាសន្តិសុខ និងផ្សព្វផ្សាយផែនការសកម្មភាពការងារយោធា សន្តិសុខឆ្នាំ២០១៩ នៅទីបញ្ជាការយោធភូមិភាគទី៥ ខេត្តបាត់ដំបង កាលពីថ្ងៃទី០៩ មករា ២០១៩កន្លងទៅ ។
នាឱកាសនោះឧត្តមសេនីយឯក ហ៊ុន ម៉ាណែត បានថ្លែងអំណរគុណ និងវាយតម្លៃខ្ពស់ចំពោះ ការខិតខំប្រឹងប្រែងរបស់នាយទាហាន នាយទាហានរង និងពលទាហានគ្រប់អង្គភាពចំណុះ ឲ្យយោធភូមិភាគទី៥ដែលបានខិតខំបំពេញភារកិច្ចកន្លងមក និងកំពុងបំពេញភារកិច្ចបច្ចុប្បន្ន និងត្រៀមទៅថ្ងៃអនាគត ដើម្បីការពារជាតិបូរណភាពទឹកដី សុខសន្តិភាពជូនប្រជាពលរដ្ឋ ។
ទន្ទឹមនោះលោកក៏បានអបអរសាទរ និងកោតសរសើរផងដែរចំពោះអង្គភាពនៅក្នុងយុទ្ធភូមិ ភាគទី៥ ដែលបានចូលរួមចលនាប្រឡងប្រណាំងក្នុងការពង្រឹងប្រៀបការពារជាតិ និងការ ត្រៀមលក្ខណៈបំពេញភារកិច្ចជូនជាតិមាតុភូមិរបស់យើង ។ លោកក៏បានថ្លែងនូវការ កោតសរសើរចំពោះយោធភូមិភាគទី៥ ក្នុងការងារទំនាក់ទំនងព្រំដែនជាមួយប្រទេសជិតខាង បានល្អបញ្ជៀសបានការប្រឈមមុខដាក់គ្នា ។
ឧត្តមសេនីយឯក ហ៊ុន ម៉ាណែត បានរម្លឹកថា រឿងព្រំដែន គឺជារឿង ដែលយើងត្រូវទទួលខុសត្រូវទាំងអស់គ្នា ហើយការការពារទឹកដីត្រូវធ្វើតាមគ្រប់រូបភាពទាំងអស់មិនមែនរឿងព្រំដែន ទាល់តែយើងលើកគ្នាទៅវ៉ៃដូចកាលនៅព្រះវិហារទើបថា ការពារព្រំដែននោះទេ ។ លោកថា រូបភាពច្រើនណាស់ក្នុងការការពារទឹកដី និងការដណ្ដើមប្រៀបឈ្នះ ។ ប៉ុន្តែយើងធ្វើយ៉ាងណា រួមគ្នាខិតខំធ្វើយ៉ាងណាប្រែក្លាយព្រំដែនពីតំបន់សមរភូមិទៅជាតំបន់មិត្តភាព និងសេដ្ឋកិច្ច ត្រូវធ្វើតាមទិសដៅរបស់រាជរដ្ឋាភិបាល ប៉ុន្តែមិនធ្វើអ្វីឲ្យបាត់ប្រៀបនោះទេ ព្រោះរឿង ព្រំដែននេះ គឺជារឿងយូរអង្វែង ។
ដូច្នេះសូមយកចិត្តទុកដាក់ក្នុងការថែរក្សា និងការឈរជើងរបស់កងកម្លាំងរបស់យើង ឲ្យបានរឹងមាំ ។ ឧត្តមសេនីយឯករូបនោះក៏បានលើកឡើងថា រាជរដ្ឋាភិបាលបានយកចិត្តទុកដាក់នៅក្នុងការងារកំណែទម្រង់ ដើម្បីធ្វើអោយប្រព័ន្ធការងារដើរទៅរលូន និងប្រសិទ្ធភាពនៅក្នុងការដឹកនាំបញ្ជា និងបន្សល់ប្រព័ន្ធការងារនេះទុកឲ្យនាយទាហានជំនាន់ក្រោយ គឺជាគោលដៅរួម និងធានានិរន្តរភាពសម្រាប់កងទ័ពដែលនេះ គឺជាការកសាងគ្រោងឆ្អឹងដ៏រឹងមាំមួយសម្រាប់ វិស័យការពារជាតិយូរអង្វែងទៅមុខទៀត ៕
ចែករំលែកព័តមាននេះ