ខេត្តព្រះសីហនុ ៖ រថយន្តទំនើបចង្កូតស្តាំបន្លំពន្ធចំនួន០៩គ្រឿង និងរថយន្តចង្កូតឆ្វេងបន្លំចំនួន០៥គ្រឿង ត្រូវបានសាខាគយ និងរដ្ឋាករខេត្តព្រះសីហនុចាប់រឹបអូសបន្តបន្ទាប់ រយៈពេលប៉ុន្មានថ្ងៃចុងក្រោយនេះដោយរក្សាទុកជាទ្រព្យសម្បត្តិរបស់រដ្ឋ ។ នេះបើយោងតាមការបញ្ជាក់ពីលោក ទុំ…
ខេត្តព្រះសីហនុ ៖ រថយន្តទំនើបចង្កូតស្តាំបន្លំពន្ធចំនួន០៩គ្រឿង និងរថយន្តចង្កូតឆ្វេងបន្លំចំនួន០៥គ្រឿង ត្រូវបានសាខាគយ និងរដ្ឋាករខេត្តព្រះសីហនុចាប់រឹបអូសបន្តបន្ទាប់ រយៈពេលប៉ុន្មានថ្ងៃចុងក្រោយនេះដោយរក្សាទុកជាទ្រព្យសម្បត្តិរបស់រដ្ឋ ។
នេះបើយោងតាមការបញ្ជាក់ពីលោក ទុំ ណូ ប្រធានសាខាគយ និងរដ្ឋាករខេត្តព្រះសីហនុ ថ្លែងបញ្ជាក់នារសៀល ថ្ងៃទី១០ មករានេះ ។ ថ្លែងបញ្ជាក់នារសៀលថ្ងៃទី១០ មករា នេះ លោកទុំ ណូ ប្រធានសាខាគយ និងរដ្ឋាករខេត្តព្រះសីហនុបានអោយដឹងថា មានរថយន្តទំនើបចង្កូតស្តាំបន្លំពន្ធចំនួន០៩គ្រឿង រួមជាមួយរថយន្តចង្កូតឆ្វេងចំនួន០៥គ្រឿង ត្រូវបានចាប់រឹបអូសជាបន្តបន្ទាប់រយៈពេលប៉ុន្មានថ្ងៃចុងក្រោយនេះ ។
នៅក្នុងប្រតិបត្តិការបង្ក្រាបអំពើរត់គេចពន្ធពីសំណាក់សមត្ថកិច្ចគយពីអគ្គនាយកដ្ឋានគយ និងរដ្ឋាករសហការជាមួយសមត្ថកិច្ចសាខាគយ និងរដ្ឋាករខេត្តព្រះសីហនុ និងសមត្ថកិច្ចពាក់ព័ន្ធ ។ លោកប្រធានសាខាគយ និងរដ្ឋាករខេត្តព្រះសីហនុអះអាងបន្ថែមថា រថយន្តទំនើបចង្កូតស្តាំបន្លំពន្ធទាំងអស់នេះនឹងត្រូវដកហូតទុកជាសម្បត្តិរដ្ឋដោយមិនមានការដោះស្រាយបង់ជាប្រាក់ពិន័យអោយម្ចាស់នាំយកទៅវិញបានឡើយព្រោះយោងតាមច្បាប់របស់ព្រះរាជាណាចក្រកម្ពុជារាជរដ្ឋាភិបាលបានប្រកាសនាពេលកន្លងមក គឺហាមមិនអោយនាំរថយន្តចង្កូតស្តាំនេះចូលទៀតទេលើសពីនេះម្ចាស់រថយន្តថែមទាំងបានបន្លំបំពាក់ស្លាកលេខក្លែងក្លាយថែមទៀតផង ។
បើទោះបីជាយ៉ាងណាក៏ដោយម្ចាស់រថយន្តទាំងនោះពុំត្រូវបានឃាត់ខ្លួននោះទេ ព្រោះម្ចាស់រថយន្តទាំងអស់បានព្រមព្រៀងប្រគល់រថយន្តដោយស្ម័គ្រចិត្ត ។ ឆ្លៀតក្នុងឪកាសនោះផងដែរលោកប្រធានសាខាគយ និងរដ្ឋាករខេត្តព្រះសីហនុក៏បានអំពាវនាវផងដែរដល់បងប្អូនប្រជាពលរដ្ឋទាំងអស់ សូមបញ្ឈប់សកម្មភាពនាំចូលរថយន្តចង្កូតស្តាំ និងមេត្តាគោរពច្បាប់ទាំងអស់គ្នា ការចូលរួមគោរពច្បាប់របស់បងប្អូន គឺជារួមចំណែកបង្កើនប្រាក់ចំណូលពន្ឋដល់រាជរដ្ឋាភិបាល ៕
ចែករំលែកព័តមាននេះ