ខេត្តកំពង់ចាម ៖ ពូជគោប្រភេទសាន់តា ផ្តល់សាច់ច្រើនក្នុង ១ក្បាល អាចមានទម្ងន់រហូតដល់ជាង ១តោន នាំមកពីសហរដ្ឋអាមេរិក ត្រូវបានបង្កាត់តាមបែបវិទ្យាសាស្រ្ត (ស្ពែម) កំពុងត្រូវបាន ប្រជាកសិករចាប់អារម្មណ៍ពីតំបន់មួយទៅតំបន់មួយ ជាក់ស្តែងដូចជានៅភូមិទួលវិហារ ឃុំជីរោទ៍ទី២ ស្រុកត្បូងឃ្មុំ បង្កាត់បានចំនួន ៣ក្បាល ទើបតែមានលើកដំបូង ។
លោក ឃឹម សាវឿន ប្រធានមន្ទីរកសិកម្មខេត្ត បានមានប្រសាសន៍ឲ្យដឹង កាលពីល្ងាច ថ្ងៃទី១៩ កក្កដា ២០១៣ នេះថា លោកបណ្ឌិត ច័ន្ទ សារុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានផ្តើមគំនិតនាំយកពូជគោប្រភេទសាន់តា ដែលផ្តល់សាច់ច្រើននេះ ពីសហរដ្ឋអាមេរិក មកកាន់ខេត្តពោធិ៍សាត់ ទទួលបាននូវលទ្ធផលជោគជ័យត្រចះត្រចង់ ត្រូវបានបងប្អួនប្រជាកសិករចាប់អារម្មណ៍បំផុត និងកំពុងពង្រីកតាមរយៈការបង្កាត់ស្ពែម ។
លោកបន្តថា ដោយសម្លឹងឃើញបែបនេះ ទើបរូបលោកបានទៅទំនាក់ទំនងជាមួយនិងប្រធានមន្ទីរកសិកម្មខេត្តពោធិ៍សាត់ ចាត់ឲ្យមន្រ្តីការិយាល័យពសុព្យាបាលយកស្ពែមមកបង្កាត់លើមេគោរបស់កសិករធម្មតានៅភូមិទួលវិហារ ឃុំជីរោទ៍ទី២ ស្រុកត្បូងឃ្មុំ ។ គ្រាន់តែក្រោយកើតបាន ១ខែ ប៉ុណ្ណោះ កូនគោប្រភេទពូជនាំមកពីសហរដ្ឋអាមេរិកនោះ បានរីកធំធាត់ឲ្យទ្រឡុកៗ ហើយពិធីចិញ្ចឹមមានលក្ខណៈងាយស្រួល ដោយគ្រាន់តែឲ្យស៊ីស្មៅនាំមកពីប្រទេសអូស្រ្តាលី ដែលដាំនៅក្នុងបរិវេណដីផ្ទះ ។
ពេលដែលឃើញកូនគោបង្កាត់នោះ ឆាប់ធំ ត្រូវបានប្រជាពលរដ្ឋនៅភូមិទួលវិហារ ចាប់អារម្មណ៍តាមដានមើល ថែមទាំងនឹងពង្រីកនូវការបង្កាត់ពូជតាមបែបវិទ្យាសាស្រ្តនេះ ឲ្យកាន់តែទូលំទូលាយ ព្រមជាមួយនោះ ក៏មានគោលការណ៍ពង្រីកទៅតាមបណ្តាស្រុក-ក្រុង ផ្សេងទៀត ព្រោះតែការចិញ្ចឹមដូចគោខ្មែរយើងដែរ ប្រើរយៈចន្លោះពី ៣ ទៅ ៤ឆ្នាំ នឹងផ្តល់សាច់ច្រើនរហូតដល់ទៅជាង ១.០០០ គីឡូក្រាម ក្នុង ១ក្បាល ៕
ចែករំលែកព័តមាននេះ