រាជធានីភ្នំពេញ ៖ ប្រជាពលរដ្ឋរស់នៅជិតខាងជាប់នឹងអតីតសណ្ឋាគារស បច្ចុប្បន្នដាក់ឈ្មោះសណ្ឋាគារអេស៊ាភេលេសស្ថិតនៅវិថីហ្សាហ្សាលដឺហ្គោលកាច់ជ្រុងមហាវិថីព្រះមុនីវង្ស ក្នុងសង្កាត់អូរឫស្សីទី៤ ខណ្ឌ៧មករា បានទូរស័ព្ទមកសំដែងការព្រួយបារម្ភរបស់ខ្លួនដល់កោះសន្តិភាពកាលពីព្រឹកថ្ងៃទី៣០ មីនា ថា ប្រជាពលរដ្ឋរាប់ សិបគ្រួសារដែលមានផ្ទះនៅជាប់សណ្ឋាគារនោះបានធ្វើពាក្យបណ្តឹងរួចហើយដាក់ជូនទៅសាលាខណ្ឌក៏ដូចជាសាលារាជធានីភ្នំពេញប្តឹងពីម្ចាស់សណ្ឋាគារដែលសាងសង់បន្ទប់ និងអគារបន្ថែមលើសំណង់អគារចាស់និងលើដំបូលផ្ទះរបស់ពួកគេ។
ប្រជាពលរដ្ឋឱ្យដឹងថា អតីតសណ្ឋាគារសមានកំពស់៧ជាន់ តែឥឡូវនេះត្រូវគេសង់បន្ថែមទៅលើ១ជាន់កន្លះទៀត រីឯដំបូលលើផ្ទះប្រជាពលរដ្ឋជាប់សណ្ឋាគារពីចំហៀងខាងផ្លូវហ្សាដឺហ្គោលវិញត្រូវថៅកែសណ្ឋាគារសាងសង់សំណង់ថ្មីធ្វើជាបន្ទប់បណ្តោយរហូតដល់កាច់ជ្រុងវិថីសុកហុក និងដាក់បង្គោលប្រព័ន្ធទូរស័ព្ទយ៉ាងធំដែលមាន ទម្ងន់ធ្ងន់១គ្រឿងផងដែរ។ ប្រជាពលរដ្ឋនិយាយថា សំណង់ថ្មីទាំងអស់នេះជាសំណង់ធ្វើឡើងពុំមានច្បាប់អនុញ្ញាតទេ ព្រោះពិតជាគ្មានអាជ្ញាធរ ឬស្ថាប័នជំនាញណាមួយហ៊ានអនុញ្ញាតឱ្យគេធ្វើបែបនេះលើសំណង់អគារចាស់ទេ។ បើទោះបីគេមានច្បាប់ ឬក៏អត់ច្បាប់យ៉ាងណាក្តីនោះជារឿងអាជ្ញាធរមានសមត្ថកិច្ចមូលដ្ឋាន តែរឿងធំបំផុតពួកគាត់មានការភ័យខ្លាចសំណង់ទាំងនោះបាក់ធ្លាក់សង្កត់លើ តើនរណាជាអ្នកទទួលខុសត្រូវ។
ប្រជាពលរដ្ឋធ្វើពាក្យបណ្តឹងដាក់ជូនទៅសាលាខណ្ឌ និងសាលារាជធានីនោះសុំឱ្យជួយអន្តរាគមន៍វាយកំទេចសំណង់ថ្មីចោលវិញ។ ទាក់ទិនករណីនេះ លោកចៅសង្កាត់អូរឫស្សីទី៤ឆ្លើយយ៉ាងខ្លីថា លោកអត់បានដឹងទេព្រោះពេលគេសាងសង់លួចដឹកសំភារសំណង់មិនឱ្យសង្កាត់ដឹងទេ។ លោកសោម សុវណ្ណ អភិបាលខណ្ឌ៧មករា មានប្រសាសន៍ដូចគ្នានេះដែរថា ពេលបានដឹងព័ត៌មាននេះលោកហាក់ដូចជាភ្ញាក់ខ្លួន ព្រោះការសាងសង់រហូតមានព័ត៌មានថា ប្រជាពលរដ្ឋប្តឹងម្ចាស់សណ្ឋាគារនោះ លោកមិនទាន់បានទទួលរបាយការណ៍ ឬព័ត៌មានអ្វីទាំងអស់ ដូច្នេះពេលទទួលបានព័ត៌មាននេះ លោក នឹងចាត់តាំងមន្ត្រីពាក់ព័ន្ធឱ្យទៅពិនិត្យ។ មន្ត្រីនគរបាលមូលដ្ឋាននិយាយស្ទើរមិនចេញថា កុំថាឡើយគេប្រាប់ពីរឿងសាងសង់នោះ គ្រាន់តែជណ្តើរឡើងទៅលើសណ្ឋាគារក៏ជាន់មិនបានផង។
អ្នកសង្កេតការណ៍និយាយថា នេះជាបញ្ហាដែលគប្បីអាជ្ញាធរត្រូវតែគិតគូរកុំឱ្យកើតហេតុការណ៍បាក់រលំបង្កជាសោកនាដកម្មកណ្តាលក្រុងឆ្លើយដាក់គ្នាទៅវិញទៅមកមិនល្អមើលទេ។ មហាជនឆ្ងល់ថា ការសាងសង់សំណង់លើអគារចាស់នេះហេតុអ្វីក៏ធ្វើបានដោយរលូនបែបនេះ បើផ្ទះប្រជាពលរដ្ឋតូចតាចចាក់ខ្សាច់មួយរទេះមិនទាន់ដល់ដីទេច្បាស់ជាប៉ូលិសមកក្រវែលហើយ ចុះហេតុអ្វីបានជាគេមានវាសនាបំបាំងភ្នែកសមត្ថកិច្ច និងអាជ្ញាធរ។ គេនៅចាំបានថា កាលពីសប្តាហ៍មុនសំណង់នៅខណ្ឌទួលគោកតំរូវឱ្យវាយបំផ្លាញចោលជាន់ខាងលើដែលធ្វើខុសច្បាប់។ គេនៅចាំមើលផងដែរថា តើបញ្ហានេះអាជ្ញាធរថ្នាក់ណាជាអ្នកទទួលខុសត្រូវចំពោះមុខប្រជាពលរដ្ឋដែលកំពុងព្រួយបារម្ភពីការបាក់រលំជាយថាហេតុណាមួយដោយសារតែគេធ្វើសំណង់ថ្មីលើអគារចាស់នេះ៕
ចែករំលែកព័តមាននេះ