រាជធានីភ្នំពេញ ៖ ក្រុមជនសង្ស័យជាចោរឆក់ទ្រព្យសម្បត្តិប្រជាពលរដ្ឋតាមផ្លូវសាធារណៈ ហៅថា ក្រុមដៃមឹក៣នាក់ត្រូវបានកម្លាំងសមត្ថកិច្ចជំនាញនគរបាលព្រហ្មទណ្ឌកម្រិតស្រាលរាជធានីភ្នំពេញស្រាវជ្រាវចាប់ខ្លួនកាលពីថ្ងៃទី៨ ខែមករា ឆ្នាំ២០១៩ នេះនៅចំណុចផ្លូវលេខ២៩៤ កែងផ្លូវលេខ៥១ សង្កាត់បឹងកេងកងទី១ ខណ្ឌចំការមន ។
ជនសង្ស័យទី១-ឈ្មោះ អ៊ឹង រតនា ហៅ ខ្នា ភេទប្រុស អាយុ១៩ឆ្នាំ មុខរបរជាអ្នកទិញលក់ម៉ូតូ ស្នាក់នៅសង្កាត់គីឡូម៉ែត្រលេខ៦ ខណ្ឌឬស្សីកែវ, ទី២-ឈ្មោះ ស្រី មនោ ភេទប្រុស អាយុ១៧ឆ្នាំ មុខរបរធ្វើម្ហូបការ ស្នាក់នៅផ្ទះគ្មានលេខ ផ្លូវលំ ឃុំអរិយក្សត្រ ស្រុកល្វាឯម ខេត្តកណ្តាល និងទី៣-ឈ្មោះ គ្រឿន ជលសា ហៅនៅ ភេទប្រុស អាយុ១៧ឆ្នាំ មុខរបរធ្វើចំការ ស្នាក់នៅផ្ទះលេខ០២ ផ្លូវលំ ឃុំអរិយក្សត្រ ស្រុកល្វាឯម ខេត្តកណ្តាល ។
មន្ត្រីនគរបាលព្រហ្មទណ្ឌរាជធានីភ្នំពេញបានបង្ហើបឲ្យដឹងថា កាលពីវេលាម៉ោង៧និង១៩នាទីថ្ងៃទី៨ ខែមករា ឆ្នាំ២០១៩ ក្រុមដៃមឹក៣នាក់បានធ្វើសកម្មភាពឆក់កាបូបស្ពាយមិនបានសម្រេច នៅចំណុចមុខហាងម៉ាស្សាយីហោវ៉ាភូ ផ្ទះលេខ១៤ ផ្លូវលេខ៥១ ភូមិ៧ សង្កាត់បឹងកេងកងទី១ ខណ្ឌចំការមន ។
ក្រោយកើតមានអំពើឆក់នោះកម្លាំងជំនាញការិយាល័យព្រហ្មទណ្ឌកម្រិតស្រាលដែលចេញល្បាតលើដងផ្លូវជាប្រចាំនោះបានធ្វើការស្រាវជ្រាវជាបន្ទាន់ឈានដល់ការឃាត់ខ្លួនជនសង្ស័យបាន៣នាក់ ហើយក៏ចាប់យកវត្ថុតាងម៉ូតូមួយគ្រឿងម៉ាកហុងដាសេ១២៥ ពណ៌ទឹកមាស ស៊េរីឆ្នាំ២០១៩ ពាក់ផ្លាកលេខ ភ្នំពេញ ១HI-៨២៤៧ ដែលជាមធ្យោបាយជិះធ្វើសកម្មភាព ។ ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ