ការថែទាំផ្ទៃមុខឱ្យមានភាពស្រស់ស្រាយដោយធម្មជាតិ លោកអ្នកអាចអនុវត្ដតាមវិធីសាស្ដ្របែបធម្មជាតិ ដោយយកផ្លែឈើមកច្នៃប្រឌិតជួយថែរក្សាទឹកមុខឱ្យស្រស់បស់បាន ។
- ល្ហុងទុំ ៖ កិនឱ្យម៉ដ្ឋប្រហែល២ស្លាបព្រាកាហ្វេ រួចយកទៅលាបប៉ាតឱ្យសព្វលើផ្ទៃមុខ ទុកចោលប្រហែលពី១០-២០នាទី ទើបលាងដោយទឹកក្ដៅឧណ្ហៗ ។ ដោយអនុវត្ដបែបនេះជាប្រចាំក្នុងមួយថ្ងៃម្ដង នឹងធ្វើឱ្យស្បែកមុខរបស់អ្នកទន់ ល្មើយ និងជួយកាត់បន្ថយស្លាកស្នាម ។
– ទឹកផ្លែឈើ ៖ យកទឹកផ្លែឪឡឹក ទឹកប៉េងប៉ោះ ទឹកក្រូចឆ្មារ និងទឹកត្រឡាច មួយមុខ១ស្លាបព្រាកាហ្វេ លាយឱ្យសព្វចូលគ្នា បន្ទាប់មកត្រូវប្រើសំឡីជ្រលកយកមកជូតថ្នមៗឱ្យពេញផ្ទៃមុខ ទុកចោលរយៈពេល២០នាទី ទើបជូតចេញ និងលាងដោយទឹកក្ដៅឧណ្ឌៗពេលនោះស្បែកមុខរបស់អ្នកនឹងមានលក្ខណៈស្រទន់ ។ ម្យ៉ាងទៀតវិធីសាស្ដ្រ នេះថែមទាំងជួយកំចាត់មុខខ្មៅនៅលើផ្ទៃមុខបាន ។
– ទឹកដោះគោឆៅលាយជាមួយសំបកចេកអំបូង ៖ ប្រើតែសំបកចេកអំបូងទុំមួយផ្លែ លាងទឹកឱ្យស្អាត ហាន់ជាចំណិតតូចៗ ចាក់ទឹកដោះគោឆៅចូលប្រហែលកន្លះចានតូច (ចានជង)កិនឱ្យម៉ដ្ឋចូលគ្នាប្រើជំនួសទឹក “ឡូស្សិន” សំរាប់ការពារស្បែកស្ងួត។ ក្រៅពីនេះ ទឹកដែលលោកអ្នកលាយថែមទាំងជួយកំចាត់ល្អងធូលីដែលកកនៅលើផ្ទៃមុខបានទៀតផង។
គួររំលឹកថា ទឹកឡូស្សិនប្រភេទទឹកដោះគោឆៅលាយជាមួយសំបកចេកអំបូងនេះអាចដាក់ក្នុងដបរក្សាទុកនៅក្នុងទូទឹក កក សំរាប់ប្រើប្រាស់បាន ៕
ចែករំលែកព័តមាននេះ