រាជធានីភ្នំពេញ ៖ ស្ត្រីម្នាក់បានធ្វើដំណើរទៅលោតទឹកសម្លាប់ខ្លួនពីលើស្ពានជ្រោយចង្វា បន្ទាប់ពីប្តីក្រោយរករឿងទាស់ទែងគ្នាដោយចោទថា នាងមានទំនាក់ទំនងស្នេហាជាមួយប្តីមុន ។ ទោះបីជាយ៉ាងណា នៅពេលនាងតោងបង្កាន់ដៃស្ពានប្រុងលោត ក៏ត្រូវបានអ្នកធ្វើដំណើររួមទាំងសមត្ថកិច្ចដែលប្រចាំការនៅទី នោះ នាំគ្នាចាប់ឃាត់ទាន់ពេល ។
ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង៩ព្រឹកថ្ងៃទី៨ ខែមករា នៅស្ពានជ្រោយចង្វា
ថ្មី ក្នុងសង្កាត់ជ្រោយចង្វា ខណ្ឌជ្រោយចង្វា ។ ចំណែកស្ត្រីដែលគិតខ្លីរូបនេះបានប្រាប់ឲ្យដឹងថា នាងឈ្មោះ ថុន រ៉ានី អាយុ៣០ឆ្នាំ ស្នាក់នៅផ្ទះជួលក្នុងសង្កាត់ជ្រោយចង្វា ខណ្ឌជ្រោយចង្វា មានកូនតូចៗចំនួន២
នាក់ ។
តាមអ្នកឃើញហេតុការណ៍ឲ្យដឹងថា នៅមុនពេលកើតហេតុ គេឃើញស្ត្រីរូបនេះ ធ្វើដំណើរដោយថ្មើរជើង ក្នុងទិសដៅពីខាងកើតទៅខាងលិច ឡើងទៅលើស្ពាន ។ នៅពេលជិតដល់កណ្តាលស្ពាន ស្រាប់តែឃើញយំខ្សឹកខ្សួល រួចតោងបង្កាន់ដៃស្ពានប្រុងលោតទឹកសម្លាប់ខ្លួន តែហាក់ដូចជាពុំដាច់ចិត្ត ។ ខណៈឃើញដូចនេះ អ្នកធ្វើដំណើរតាមស្ពាន ក៏រាយការណ៍ប្រាប់ប្រជាការពារ និងនគរបាលដែលប្រចាំការនៅគល់ស្ពាន ទើបនាំគ្នាមកឃាត់សួរនាំ ។
នៅចំពោះមុខសមត្ថកិច្ច ស្ត្រីរូបនេះនិយាយថា នាងមានបំណងមកលោតទឹកសម្លាប់ខ្លួន ព្រោះតែតូចចិត្តខ្លួនឯង ដែលប្តីក្រោយរបស់នាងមិនទុកចិត្ត ហើយចេះតែចោទថា នាងលួចមានទំនាក់ទំនងស្នេហាឡើងវិញ ជាមួយអតីតប្តីរបស់នាង ទោះបីនាងប្រាប់យ៉ាងណា ក៏ប្តីក្រោយនេះមិនជឿដែរ ។
ស្ត្រីរូបនេះនិយាយទៀតថា កន្លងមក នាងធ្លាប់មានប្តី តែបានលែងលះគ្នា និងបានមកយកប្តីក្រោយនេះ ។ ប៉ុន្តែការរស់នៅជាមួយគ្នានេះ ប្តីក្រោយចេះតែរករឿងនិងចោទថា នាងលួចមានទំនាក់ទំនងគ្នាជាមួយប្តីមុន ធ្វើឲ្យនាងទ្រាំលែងបានក៏ធ្វើដំណើរមកលោតទឹកសម្លាប់ខ្លួនតែម្តង ។
ទោះជាយ៉ាងណា ស្ត្រីរូបនេះ ពុំបានឲ្យដឹងច្រើនពីរឿងរ៉ាវស្នេហា និងជីវិតគ្រួសារដែលពោរពេញទៅដោយភាពចម្រូងចម្រាសនោះទេ ។ បន្ទាប់ពីនាំនាងទៅសាកសួរនៅស្នាក់ការប៉ុស្តិ៍រួចនគរបាលក៏បានទាក់ទងហៅក្រុមគ្រួសារ មកយកនាងទៅលំនៅឋានវិញ ៕
ចែករំលែកព័តមាននេះ