រាជធានីភ្នំពេញ ៖ មន្ត្រីទេសចរណ៍បានអះអាងថា វិមានអនុស្សាវរីយ៍នយោបាយឈ្នះ ឈ្នះ ក្លាយជាគោលដៅទេសចរណ៍ថ្មីមួយទៀតរបស់រាជធានីភ្នំពេញក្នុងការទាក់ទាញអ្នកទេសចរជាតិ និងអន្តរជាតិ ។ ជាក់ស្តែងវិមានឈ្នះ ឈ្នះ បាន និងងកំពុងទាក់ទាញការចាប់អារម្មណ៍ពីភ្ញៀវជាតិ និងអន្តរជាតិចូលទស្សនាជារៀងរាល់ថ្ងៃ ដោយក្នុង មួយថ្ងៃៗ មានជាង១០០០នាក់ឯណោះ ។
កងកម្លាំងប្រចាំការរក្សាសន្តិសុខសុវត្ថិភាពនៅវិមានឈ្នះ ឈ្នះឲ្យដឹងថា ជារៀងរាល់ថ្ងៃភ្ញៀវជាតិ និងអន្តរជាតិ ទស្សនាវិមានប្រកបដោយទឹកមុខសប្បាយរីករាយ ហើយកោតសរសើរចំពោះស្នាដៃនៃវិស្វករសំណង់វិមានឈ្នះ ឈ្នះដែលរំលេចដោយក្បាច់រចនាបែបខ្មែរ រួមទាំងរូបចម្លាក់នៃសកម្មភាពអតីតអ្នកតស៊ូរំដោះជាតិ ពិសេសសម្តេចតេជោហ៊ុនសែន ដែលមានភាពរស់រវើកគួរឲ្យស្ងើចសរសើរ ។
ទន្ទឹមនោះសារមន្ទីរមគ្គុទេ្ទសក៍ទេសចរណ៍តេជោសែន នៅវិមានឈ្នះ ឈ្នះ បានឆក់ការចាប់អារម្មណ៍អ្នកទេសចរយ៉ាងខ្លាំង ហើយពួកគេដែលចូលទស្សនាសុទ្ធតែបានផ្តិតយករូបភាពដោយសែលហ្វី៊ ឬជួលគេថតរូបថតទុកជាអនុស្សាវរីយ៍ ។
តាមមន្ត្រីនៃក្រុមការងារសាងសង់វិមានឈ្នះឈ្នះ បានបញ្ជាក់ថា បើទោះបីជាវិមានអនុស្សាវរីយ៍ «នយោបាយឈ្នះ ឈ្នះ» ត្រូវបានដាក់សម្ពោធជាច្រើនថ្ងៃទៅហើយក្តី តែប្រជាពលរដ្ឋខ្មែរ និងភ្ញៀវបរទេសនៅតែបន្តចូលទស្សនានៅវិមានប្រវត្តិសាស្ត្រមួយនេះយ៉ាងច្រើនជារៀងរាល់ថ្ងៃ ។ ទន្ទឹមនោះសារមន្ទីរមគ្គុទ្ទេសក៏តេជោសែន នៅក្នុងវិមានឈ្នះ ឈ្នះ ដែលស្ថិតនៅក្នុងចំណោមទីតាំងផ្សេងទៀតក្នុងវិមានបានទាក់ទាញការចាប់អារម្មណ៍ និងការយកចិត្តទុកដាក់ពីប្រជាជនយ៉ាងខ្លាំងផងដែរ ។
ប្រភពដដែលឲ្យដឹងទៀតថា ការចូលទស្សនាសំណង់វិមានឈ្នះ ឈ្នះ ត្រូវបានប្រជាពលរដ្ឋខ្មែរគ្រប់មជ្ឈដ្ឋាន រួមទាំង ជនបរទេសជាច្រើន បានយកចិត្តទុកដាក់ យ៉ាងខ្លាំង ដើម្បីទស្សនាឈ្វេងយល់ពីរូបភាព ចម្លាក់ក្បាច់ក្បូរទាក់ទងប្រវត្តិសាស្ត្រ ដំណើរស្វែងរកសន្តិភាពរបស់ប្រមុខដឹកនាំកម្ពុជាសម្តេចតេជោហ៊ុន សែន រហូតមានការបង្រួបបង្រួមជាតិ និងឈានទៅបញ្ចប់សង្គ្រាមស៊ីវិលទាំងស្រុងនៅកម្ពុជាឆ្នាំ១៩៩៨ ។
វិមានឈ្នះ ឈ្នះ បានចាប់ផ្តើមសាងសង់ឡើងកាលពីខែកុម្ភៈ ឆ្នាំ២០១៦ លើទំហំដី៨ហិកតា ស្ថិតនៅសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ។ វិមាននេះត្រូវបានសម្ពោធជាផ្លូវការនៅថ្ងៃទី២៩ ខែធ្នូ ឆ្នាំ២០១៨ ក្រោមអធិបតីភាពសម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ។
សំណង់វិមានឈ្នះ ឈ្នះនេះ តំណាងឱ្យវីរភាពរបស់សម្តេចតេជោហ៊ុន សែន ដែលហ៊ានប្រថុយជីវិតធ្វើដំណើរទៅកាន់ប្រទេសវៀតណាម ដើម្បីស្នើសុំកម្លាំងភាគីវៀតណាម ជួយផ្តួលរំលំរបបប្រល័យជូពសាសន៍ប៉ុល ពត និងបានប្រើគ្រប់យុទ្ធវិធី ដើម្បីបញ្ចប់ភ្លើងសង្គ្រាមនៅកម្ពុជា ៕
ចែករំលែកព័តមាននេះ