រាជធានីភ្នំពេញ ៖ គ្រោះថ្នាក់ចរាចររវាងម៉ូតូមួយបុកជាមួយរថយន្តដឹកដី បណ្តាលឲ្យក្មេងប្រុសជំទង់ម្នាក់បានស្លាប់ និងក្មេងប្រុសជំទង់ម្នាក់ទៀតរងរបួសធ្ងន់ ដែលហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង៦និង៤៥នាទីយប់ថ្ងៃទី៩ ខែមករា ឆ្នាំ២០១៩ ស្ថិតនៅតាមផ្លូវបេតុង ក្នុងភូមិបឹងធំទី៣ សង្កាត់បឹងធំ ខណ្ឌពោធិសែនជ័យ ។
ជនរងគ្រោះទាំង២នាក់ខាងលើ ម្នាក់ឈ្មោះ ទិត្យ ប៊ុនលី ភេទប្រុស អាយុ១៥ឆ្នាំ ជាសិស្ស និងជាអ្នករួមដំណើរ មានទីលំនៅភូមិបឹងធំទី១ សង្កាត់បឹងធំ ខណ្ឌពោធិសែនជ័យ បានស្លាប់ភ្លាមៗនៅនឹងកន្លែងកើតហេតុ និងអ្នកបើកបរម៉ូតូឈ្មោះ សុខ ម៉េងសឺ ភេទប្រុស អាយុ១៦ឆ្នាំ ជាសិស្ស មានទីលំនៅភូមិបឹងធំទី១ សង្កាត់បឹងធំ ខណ្ឌពោធិសែនជ័យ បានរងរបួសធ្ងន់ ។ ជនរងគ្រោះទាំង២នាក់ជិះម៉ូតូមួយគ្រឿងម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ ភ្នំពេញ ១CU-៥០៧៣។
ចំណែកភាគីខាងរថយន្ត ពណ៌ខៀវ ពាក់ស្លាកលេខចង្កូតស្តាំ PP-០៣៦៨ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ ។
តាមប្រភពពីប្រជាពលរដ្ឋបានឲ្យដឹងថា នៅមុនពេលកើតហេតុ គេឃើញជនរងគ្រោះទាំង២នាក់ជិះម៉ូតូមួយគ្រឿងឌុបគ្នាក្នុងល្បឿនយ៉ាងលឿន ធ្វើដំណើរតាមបណ្តោយផ្លូវបេតុងពីលិចទៅកើត ដល់មកដល់ចំណុចកើតហេតុខាងលើបានទៅបុកជាមួយរថយន្តមួយគ្រឿងចំពីមុខ ក្នុងទិសដៅបញ្ច្រាសទិសគ្នា បណ្តាលឲ្យអ្នកបើកបរម៉ូតូបុកផ្ទប់កញ្ចក់រថយន្តរងរបួសធ្ងន់ ត្រូវបានរថយន្តសង្គ្រោះដឹកទៅមន្ទីពេទ្យភ្លាមៗ និងអ្នករួមដំណើរម្នាក់ទៀតខ្ទាតផ្លោងទៅបុកផ្ទប់លូដាក់នៅចិញ្ចើមផ្លូវ បណ្តាលឲ្យបាក់កស្លាប់ភ្លាមៗ និងបែកទាំងលូផងដែរ រីឯម៉ូតូរងការខូចខាតផ្នែកខាងមុខស្ទើរតែទាំងស្រុង។
ចំណែកឯរថយន្តរងការខូចខាតផ្នែកខាងមុខចំហៀងខាងស្តាំក្រពឹតកាង និងបែកភ្លើងបំភ្លឺផ្លូវខាងមុខអស់មួយចំហៀង។ ដោយឡែកអ្នកបើកបរបានរត់គេចខ្លួនបាត់ស្រមោល បន្សល់ទុកតែរថយន្តនៅកន្លែងកើតហេតុ។
ក្រោយកើតហេតុ មានសមត្ថកិច្ចមូលដ្ឋានចុះមកដល់ ហើយក៏ទំនាក់ទំនងទៅសមត្ថកិច្ចជំនាញចរាចរណ៏មកវាស់វែងយកម៉ូតូនិងរថយន្តទៅរក្សាទុកនៅការិយាល័យចរាចរណ៏ផ្លូវគោកនៃស្នងការនគរបាលរាជធានីភ្នំពេញ រង់ចាំម្ចាស់រថយន្តចូលខ្លួនមកដោះស្រាយតាមផ្លូវច្បាប់។ ចំណែកសពត្រូវបានសមត្ថកិច្ចធ្វើកំណត់
ហេតុ រួចប្រគល់ឲ្យសាច់ញាតិយកទៅធ្វើបុណ្យតាមប្រពៃណី ៕
ចែករំលែកព័តមាននេះ