សហរដ្ឋអាមេរិក ៖ ផ្កាយរណបតេឡេស្កុបអវកាស របស់អង្គការNASAអាមេរិកTESS ទទួលបន្ទុករុករកភពនានា ដែលប្រហាក់ប្រហែលគ្នានឹងភពផែនដីនៅក្រៅប្រព័ន្ធព្រះអាទិត្យ បានរកឃើញភពក្រៅប្រព័ន្ធនេះទី៣ ដែលមានទំហំធំជាងផែនដីដល់ទៅ៣ដង។ តាមអត្ថបទមួយចេញផ្សាយតាមវេបសាយរបស់NASAថា ភពនោះមានឈ្មោះថាHD…
សហរដ្ឋអាមេរិក ៖ ផ្កាយរណបតេឡេស្កុបអវកាស របស់អង្គការNASAអាមេរិកTESS ទទួលបន្ទុករុករកភពនានា ដែលប្រហាក់ប្រហែលគ្នានឹងភពផែនដីនៅក្រៅប្រព័ន្ធព្រះអាទិត្យ បានរកឃើញភពក្រៅប្រព័ន្ធនេះទី៣ ដែលមានទំហំធំជាងផែនដីដល់ទៅ៣ដង។
តាមអត្ថបទមួយចេញផ្សាយតាមវេបសាយរបស់NASAថា ភពនោះមានឈ្មោះថាHD 21749b មានផ្ទៃប្រមាណជា៣ដងធំជាងផែនដី និងទម្ងន់២៣ដងធ្ងន់ជាងទម្ងន់ផែនដី។ រៀងរាល់៣៦ថ្ងៃ ភពនេះវិលជុំវិញផ្កាយមួយគឺផ្កាយHD21749ប្រភេទK ស្ថិតនៅចម្ងាយ៥៣ឆ្នាំពន្លឺពីផែនដី ដោយសីតុណ្ហភាពលើភពនោះអាចមានដល់១៥០អង្សាសេ។
អ្នកស្រាវជ្រាវលោកស្រីDIANA DRAGOMIRនិយាយថា ភពនោះធំជាងភពNEPTUNEតែពុំសម្បូរថ្មឡើយ។
ភពទីមួយក្រៅប្រព័ន្ធព្រះអាទិត្យ មានសណ្ឋានប្រហាក់ប្រហែលគ្នានឹងភពផែនដី ត្រូវបានរកឃើញកាលពីថ្ងៃទី១៩កញ្ញាឆ្នាំ២០១៨។ ពេលនោះNASAនិយាយថាវាជាភពធំជាងផែនដីវិលជុំវិញផ្កាយ PI MENSAEស្ថិតនៅចម្ងាយប្រមាណជា៦០ឆ្នាំពន្លឺពីផែនដី។ NASAនិយាយថាភពនោះអាចមានទឹកនិងឧស្ម័ន។
ភពទី២រកឃើញ២ថ្ងៃបន្ទាប់ពីនោះគឹថ្ងៃទី២១កញ្ញា២០១៨។ វាជាភពធំជាងផែនដីបន្តិច វិលរៀងរាល់១១ម៉ោងជុំវិញផ្កាយLHS 3844ជាផ្កាយប្រភេទM ស្ថិតនៅចម្ងាយ៤៩ឆ្នាំពន្លឺពីភពផែនដី។ ផ្កាយរណបTESSត្រូវបានបញ្ជូនទៅកាន់អវកាសកាលពីខែមេសាឆ្នាំ២០១៨។ វាមានបេសកកម្មស្រាវជ្រាវផ្កាយប្រមាណជា២០០.០០០ក្នុងចំណោមផ្កាយស្ថិតនៅក្បែរព្រះអាទិត្យបំផុត៕
ចែករំលែកព័តមាននេះ