ខេត្តកំពង់ឆ្នាំង ៖ ក្របីស្ទាវមួយក្បាលបានដេញវ័ធមនុស្ស និងយានជំនិះ ដែលធ្វើដំណើរតាមផ្លូវបង្កឱ្យ
មានការភ្ញាក់ផ្អើល កាលពីវេលាម៉ោង៨ និង៣០នាទីព្រឹកថ្ងៃទី៨ មករា ស្ថិតក្នុងសង្កាត់កំពង់ឆ្នាំង ក្រុងកំពង់ឆ្នាំង ។ ហេតុការណ៍នេះ បណ្តាលឱ្យកុមារម្នាក់បានរងរបួសសន្លប់ស្ដូកស្ដឹង ។ ចំណែកឯម្ចាស់ក្របីក៏
រងរបួសជាច្រើនកន្លែងផងដែរ ។
បើតាមសមត្ថកិច្ចនគរបាលមូលដ្ឋានបានឲ្យដឹងថា ក្របីមួយក្បាលនេះ បានបង្ករការភ័យខ្លាចនៅក្នុងសង្កាត់កំពង់ឆ្នាំង ក្រុងកំពង់ឆ្នាំង រយៈពេលពីរថ្ងៃមកហើយ ។ នៅព្រឹកថ្ងៃទី៨ ខែមករានេះ ក្របីមួយក្បាលនេះកាន់តែកាចលើសដើម គឺឱ្យតែប្រទះឃើញមនុស្ស ឃើញម៉ូតូដេញវ័ធតែម្តងដែលអ្នកខ្លះថាជាក្របីឡើងក ។ ជាមួយគ្នានេះម្ចាស់ក្របីដែលមានឈ្មោះ សារ៉ាត់ បានរងរបួសជាច្រើនកន្លែង ។ ចំណែកកុមារម្នាក់បានរងរបួសសន្លប់ស្តូកស្តឹង ហើយត្រូវបានក្រុមគ្រួសារដឹកយកទៅមន្ទីរពេទ្យ ។
លោក សារ៉ាត់ ដែលជាម្ចាស់ក្របីបានឲ្យដឹងថា លោកបានទិញក្របីនេះ ពីជនបទដើម្បីយកមកចិញ្ចឹមក្នុងតម្លៃ២លាន១៥ម៉ឺនរៀល ។ ពេលទិញមក គាត់បានដឹកយកទៅចងអោយស៊ីស្មៅបាន២ ទៅ៣ថ្ងៃ គឺមិនមានបញ្ហាអ្វីទេ ។ ប៉ុន្តែស្រាប់តែនៅថ្ងៃទី៧ មករា ពេលដឹកយកទៅចង ក្របីនោះ បានវធ័គាត់ដួល៣ទៅ៤ត្រឡប់ធ្លាក់ចូលប្រឡាយ បណ្តាលឱ្យរងរបួសជាច្រើនកន្លែង ។
គាត់បានព្យាយាមរកអ្នកជំនាញទាក់វាដែរ តែទាក់មិនបានតាំងពីថ្ងៃទី៧ មករា ទើបថ្ងៃនេះ សម្រេចឱ្យសមត្ថកិច្ចជួយបាញ់សម្លាប់តែម្តង ព្រោះខ្លាចបង្កឱ្យគ្រោះថ្នាក់ដល់មនុស្សថែមទៀត ។ ការបាញ់សម្លាប់ក្របីមួយក្បាលខាងលើនេះ មិនមែនជារឿងធម្មតាទេ ព្រោះតែក្របីវានៅក្នុងភូមិ ខ្លាចរងគ្រោះដល់មនុស្ស។
នៅព្រឹកនោះ គេសង្កេតឃើញមន្ត្រីកងរាជអាវុធហត្ថក្រុងកំពង់ឆ្នាំងម្នាក់ បានព្យាយាមតាមបាញ់ក្របីមួយក្បាលនេះដោយលំបាក ព្រោះតែខ្លាចផ្លាតគ្រាប់ត្រូវមនុស្ស ទើបចេះតែលបដើរតាមក្របីពីភូមិមួយទៅភូមិមួយ រហូតដល់ម៉ោង១០ និង៣០នាទីព្រឹក ទើបមន្ត្រីកងរាជអាវុធហត្ថនោះសម្រេចបាញ់ក្របីនោះបណ្តាលឱ្យងាប់ នៅក្នុងដីស្រឡះមួយក្នុងភូមិទួលក្រឡាញ់ សង្កាត់កំពង់ឆ្នាំង ។ ក្របីខាងលើត្រូវបានម្ចាស់លក់ឱ្យទីសត្តឃាតដើម្បីយកប្រាក់មកសងថ្លៃការខូចខាត និងកុមារដែលរងរបួសដោយសារក្របីវ័ធ ៕
ចែករំលែកព័តមាននេះ