ខេត្តបន្ទាយមានជ័យ ៖ ជណ្តើរយន្តនៃអគារកាស៊ីណូហ្គោដិនក្រោន ដែលមានកម្ពស់១៨ជាន់ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ត្រូវបានឆេះផ្អើលក្រុងប៉ោយប៉ែត ជាប់ព្រំដែនថៃ នៅម៉ោង៩…
ខេត្តបន្ទាយមានជ័យ ៖ ជណ្តើរយន្តនៃអគារកាស៊ីណូហ្គោដិនក្រោន ដែលមានកម្ពស់១៨ជាន់ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ត្រូវបានឆេះផ្អើលក្រុងប៉ោយប៉ែត ជាប់ព្រំដែនថៃ នៅម៉ោង៩ និង៣០នាទីនិងពន្លត់ស្ងប់ទៅវិញនៅម៉ោង១២អធ្រាត្រឈានចូលថ្ងៃទី៨ មករា ដោយសារទុស្សេចរន្តអគ្គិសនីផ្នែកមួយនៃអគារនេះ ។
គេឃើញមានអណ្តាតភ្លើងឆេះខ្មួលខ្មាញ់ ជះចេញមកក្រៅ មានកម្ពស់ផុតដំបូល តាំងពីជាន់ទី៤ឡើងទៅលើ ខណៈអ្នកជាប់គាំងតាមបន្ទប់នីមួយៗ បានស្រែកកងរំពង និងខ្លះព្យាយាមប្រើប្រាស់ពិលបំភ្លឺតាមទូរស័ព្ទបញ្ចាំងតាមបង្អួច ជាសញ្ញាឱ្យមានការសង្គ្រោះពួកគេជាបន្ទាន់ ព្រោះមិនអាចចុះបាន ។ ប្រហែលជិត២ម៉ោងក្រោយមក ការឆេះសន្ធោសន្ធៅនោះស្ងប់ទៅវិញ ដោយសារកងសន្តិសុខរបស់ក្រុមហ៊ុនកាស៊ីណូ សំរុកឡើងទៅទីតាំងកើតហេតុ ជួយបាញ់ពន្លត់ដោយបំពង់ឧស្ម័ន បើពុំដូច្នេះទេ កាស៊ីណូដ៏ធំមួយនេះអាចក្លាយជាផេះផង់បាត់ទៅហើយ និងបង្កឱ្យមានសោកនាដកម្មស្មានមិនដល់ផងដែរ ។
សមត្ថកិច្ចចម្រុះមកពីគ្រប់អង្គភាពពាក់ព័ន្ធ មានទាំងនគរបាលព្រំដែនគោល៩១១-៨៩១ ដឹកនាំដោយលោក សួន បវរ អភិបាលខេត្តអមដោយលោកឧត្តសេនីយ៍ទោ អាត់ ខែម ស្នងការនគរបាលខេត្ត លោកមេបញ្ជាការអាវុធហត្ថខេត្ត ជាមួយរថយន្តពន្លត់អគ្គិភ័យជាច្រើនគ្រឿង ជួយអន្តរាគមន៍បាញ់ពន្លត់និងរក្សាសណ្តាប់ធ្នាប់ ។
ប្រភពថា ពេលកើតហេតុ អ្នកស្នាក់នៅតាមបន្ទប់នៃកាស៊ីណូនេះ ចាប់ពីជាន់ទី៤ឡើងទៅ មិនអាចចុះមកក្រោមបានទេ ព្រោះជណ្តើរយន្តដាច់ភ្លើងអស់ និងតាមជណ្តើរជើងក៏មិនអាចចុះបានដែរ ដោយសារផ្សែងអួរអាប់ងងឹតរកផ្លូវចុះមិនឃើញ ។ ការត្រៀមសង្គ្រោះនៅកន្លែងកើតហេតុ គេឃើញមានរថយន្តសង្គ្រោះរបស់មន្ទីរពេទ្យបង្អែកក្រុងប៉ោយប៉ែត និងមណ្ឌលសុខភាពតាមសង្កាត់នីមួយៗ រួមទាំងរថយន្តអង្គភាពនគរបាល និងអាវុធហត្ថ ក្នុងនោះមានទាំងរថយន្តសង្គ្រោះរបស់ថៃ បានរងចាំត្រៀបត្រា ដើម្បីជួយដឹកអ្នករបួសទៅកាន់មន្ទីរពេទ្យ ។
ក្រោយអគ្គិភ័យស្ងប់ទៅវិញ អ្នកជាប់គាំងក្នុងអគារនេះដែល៩០% ជាជនជាតិចិនបានសំរុកចុះមកក្រោម ភាគច្រើនសុទ្ធតែដោះអាវ លើកលែងតែស្ត្រី ។ ចំណែកអ្នករបួសក៏មានខ្លះដែរ ត្រូវដឹកទៅកាន់មន្ទីរពេទ្យជាបន្តបន្ទាប់ ក្នុងនោះឃើញបុរសជាជនជាតិបរទេសម្នាក់ភ័យលោតពីជាន់ទី៤ របួសបាក់ជើង ប៉ុន្តែមិនទាន់ដឹងថាមានអ្នកស្លាប់ ឬយ៉ាងណានោះទេ ។ ដោយសារតែការកើតមានអគ្គិភ័យនេះ ទើបដឹងថា វត្តមានជនជាតិចិនព្រោងព្រាត ពិតជាច្រើនរហូតអ្នកស្រុកលាន់មាត់ថា ចិនអីក៏ច្រើនម្ល៉េះ ? នេះមិនមែនតែចំណុចកើតហេតុទេ សូម្បីតាមដងផ្លូវផ្សេងៗ ក្នុងទឹកដីកាស៊ីណូឆ្ពោះទៅកាស៊ីណូផ្កាយ៥ ឬទៅដើមស្រល់ ក៏មានសុទ្ធតែជនជាតិចិនស្អេកស្កះដែរភ្ញាក់ផ្អើលកកទឹកកកដី ។
ករណីឆេះអគារកាស៊ីណូហ្គោដិនក្រោននេះ កោះសន្តិភាពមិនអាចទាក់ទងសុំការបំភ្លឺពីតំណាងក្រុមហ៊ុនកាស៊ីណូបានទេ ឯការជួបជាមួយក្រុមសន្តិសុខនៅទីនោះ ក៏បានបដិសេធថា មិនហ៊ានបំភ្លឺដែរ គឺគេមិនហ៊ាននិយាយ ។ ទោះជាយ៉ាងណានៅព្រឹកថ្ងៃទី៨ មករា លោក សាន ស៊ានហូ អភិបាលក្រុងប៉ោយប៉ែត ប្រាប់តាមទូរស័ព្ទថា យោងតាមការសាកសួរ ករណីឆេះអគារកាស៊ីណូនេះ គឺបណ្តាលមកពីទុស្សេចរន្ត ហើយឆេះតែចំណុចជណ្តើរយន្ត ដែលនៅជាប់ជញ្ជាំងខាងក្រៅជ្រុងខាងត្បូង ឆៀងខាងកើត នៃអគារតែប៉ុណ្ណោះ មិនមែនឆាបឆេះខ្លួនឬតួអគារកាស៊ីណូនោះទេ ។ លោកអភិបាលក្រុងបញ្ជាក់ថា ករណីឆេះនេះមិនបណ្តាលឲ្យនរណាម្នាក់ស្លាប់បាត់បង់ជីវិតទេ មានត្រឹមតែអ្នករបួស៥ទៅ៦នាក់ត្រូវបានជួយសង្គ្រោះភ្លាមៗផងដែរ។
គួរបញ្ជាក់ថាដោយសារចំណុចកើតហេតុដាច់ភ្លើង មេឃងងឹត ម្យ៉ាងទីតាំងជណ្តើរយន្តនៅជ្រុងខាងក្រោយអគារ បានធ្វើឲ្យអ្នកស្រុកយល់ច្រឡំថា ជាកាឆេះអគារកាស៊ីណូក៏នាំគ្នាថតបង្ហោះព្រោងព្រាតតាមបណ្តាញសង្គម ។
ព័ត៌មានបន្ថែមចុងក្រោយ
ជនរងគ្រោះក្នុងហេតុការណ៍ឆេះជណ្តើរយន្តនេះ រងរបួសធ្ងន់ស្រាលចំនួន៥នាក់ សុទ្ធតែជាជនជាតិចិន
១-ឈ្មោះ លៀវ ប៉ោឆាយ ភេទប្រុស អាយុ២៧ឆ្នាំ បានលោតពីលើអគារជាន់ទី៣ គ្រិចជើង ។
២-ឈ្មោះ ស៊ុន ឆឺចិន ភេទប្រុស អាយុ២៧ឆ្នាំ លោតពីលើអគារ៥ជាន់បណ្តាលឱ្យគ្រិចជើង ។
៣-ឈ្មោះ ជីង មីង ភេទប្រុស អាយុ២៥ឆ្នាំ មានអាការៈថប់ដង្ហើម ។
៤-ឈ្មោះ ឈីវ សឺសៀង ភេទប្រុស អាយុ២៥ឆ្នាំ លោតពីលើអគារជាន់ទី៤ បណ្តាលឱ្យបាក់កជើង ។
៥-ឈ្មោះ ស៊ីង ស៊ីង ភេទប្រុស អាយុ២៥ឆ្នាំ លោតពីលើអគារជាន់ទី៥ បណ្តាលឱ្យគ្រិចកជើង ។
ជនរងគ្រោះដែលរងរបួសបណ្តាលឱ្យបាក់កជើងម្នាក់និងរងរបួសគ្រិចជើង៣នាក់គឺលោតពីលើអគារជាន់ទី៣ និងជាន់ទី៤និងទី៥ដោយសារភ័យខ្លាចនៅពេលដែលភ្លើងកំពុងឆេះហើយនាំគ្នាលោតពីលើអគារមកដីតែម្តងត្រូវបានសង្គ្រោះបន្ទាន់មាននៅគ្លីនិកឯកជន និងមន្ទីរពេទ្យបង្អែកក្រុងប៉ោយប៉ែត ។
តំណាងក្រុមហ៊ុនកាស៊ីណូហ្គោដិនក្រោន ដែលពេលនេះបានដូរមកឈ្មោះហ្គេនទីងផោវ័រ(Gantingpower) បានបញ្ជាក់ថា មូលហេតុកើតមានភ្លើងឆេះជណ្តើរយន្តនេះ គឺបណ្តាលមកពីឆ្លងចរន្តអគ្គិសនី បណ្តាលឱ្យឆេះពីជាន់ក្រោមរហូតដល់ជាន់ទី១៨ហើយបណ្តាលខូចខាតនៅចំណុចជណ្តើរយន្ត ។ លោកប្រាប់ថា ក្រោយពេលជួសជុលឡើងវិញអាចដំណើរដូចដើមវិញក្នុងពេលឆាប់ៗ ។
នៅពេលដែលភ្លើងឆេះជណ្តើរយន្តកាស៊ីណូនេះគេឃើញមានវត្តមាន អភិបាលខេត្តលោក សួន បវរ និងអភិបាលរងខេត្ត ព្រមទាំងកងកម្លាំង មានកងរាជអាវុធហត្ថ និងកម្លាំងនគរបាលខេត-ស្រុកប្រមាណជិត២០០នាក់ និងរថយន្តពន្លត់អគ្គិភ័យស្នងការដ្ឋាននគរបាលខេត្ត-ក្រុងនិងក្រុមហ៊ុនប្រមាណ១០គ្រឿង បានជួយអន្តរាគមន៍ពន្លត់ដោយមានរថយន្តសង្គ្រោះរបស់មន្ទីពេទ្យបង្អែកក្រុងប៉ោយប៉ែត និងរថយន្តសង្គ្រោះភាគីថៃ បានចូលមកជួយសង្គ្រោះអ្នករងគ្រោះផងដែរ ៕
ចែករំលែកព័តមាននេះ