ទីក្រុងសិង្ហបុរី ៖ ៧០%នៃអ្នកចូលរួមការស្ទង់មតិបាននិយាយថា ប្រទេសក្នុងអាស៊ីអាគ្នេយ៍គួរតែមានការប្រុងប្រយ័ត្នក្នុងការចរចាជាមួយនឹងប្រទេសចិនលើការផ្តួចផ្តើមគំនិតខ្សែក្រវាត់ និងវិថី (BRI) ដើម្បីជៀសវាងការធ្លាក់ចូលក្នុងបំណុលដែលមិនមានចីរភាព ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មានReuters កាលពីថ្ងៃទី៦ មករា កន្លងមក ។
ការសិក្សានេះបានឲ្យដឹងទៀតថា អាស៊ីអាគ្នេយ៍កាន់តែទុទិដ្ឋិនិយមទៅលើការប្តេជ្ញារបស់អាមេរិកក្នុងតំបន់ក្នុងនាមជាដៃគូយុទ្ធសាស្ត្រ និងប្រភពនៃសន្តិសុខដែរ ខណៈដែលឥទ្ធិពលរបស់ប្រទេសចិនកំពុងតែលូតលាស់ទាំងក្នុងវិស័យនយោបាយ និងសេដ្ឋកិច្ច ។
ការស្ទង់មតិខាងលើត្រូវបានធ្វើឡើងដោយវិទ្យាស្ថាន ISEAS-Yusof Ishak Institute ដែលស្ថិតក្រោមរដ្ឋាភិបាលសិង្ហបុរី និងមានការចូលរួមពីមនុស្សប្រមាណ១.០០៨ក្នុងប្រទេសទាំង១០របស់អាស៊ានដែលមកពីរដ្ឋាភិបាល វិទ្យាស្ថានអប់រំ និងសហគមន៍អាជីវកម្ម សង្គមស៊ីវិល ព្រមទាំងផ្នែកផ្សព្វផ្សាយជាដើម ។
ប្រមាណជិតពាក់កណ្តាលនៃអ្នកចូលរួមបាននិយាយថា ការផ្តួចផ្តើមគំនិតខ្សែក្រវាត់ និងវិថីរបស់លោកប្រធានាធិបតីស៊ីជិនពីង (Xi Jinping) នេះ នឹងធ្វើឲ្យអាស៊ានកាន់តែខិតជិតប្រទេសចិន ខណៈដែល១ភាគ៣និយាយថាគម្រោងនេះខ្វះតម្លាភាព និង១៦%គិតថា វានឹងបរាជ័យ ។
៧០%នៃអ្នកចូលរួមបាននិយាយថារដ្ឋាភិបាលគួរតែប្រុងប្រយ័ត្នក្នុងការចរចាលើគម្រោង BRI ដើម្បីជៀសវាងការជាប់បំណុលជាមួយនឹងប្រទេសចិន ។
គួរបញ្ជាក់ដែរថា ប្រទេសលោកខាងលិចមួយចំនួនបានចោទប្រកាន់ថា ប្រទេសចិនកំពុងតែទាញប្រទេសជាច្រើនចូលក្នុងអន្ទាក់បំណុលតាមរយៈការផ្តួចផ្តើមខាងលើ ។
ជាមួយគ្នានេះផងដែរ ៧៣%នៃអ្នកចូលរួមគិតថា ប្រទេសចិនមានឥទ្ធិពលសេដ្ឋកិច្ចធំជាងគេក្នុងតំបន់ និងមានឥទ្ធិពលផ្នែកនយោបាយ និងយុទ្ធសាស្ត្រច្រើនជាងសហរដ្ឋអាមេរិកដែរ ៕
ចែករំលែកព័តមាននេះ