រាជធានីភ្នំពេញ ៖ បុរសម្នាក់ស្រវឹងស្រាខ្លាំងពេកដល់ថ្នាក់មិនដឹងខុសរកវាយមិត្តភក្តិ និងប្រពន្ធកូនត្រូវបានសមត្ថកិច្ចប៉ុស្តិ៍បញ្ជូនទៅកាន់មន្ទីរពេទ្យដើម្បីព្យាបាលកាលពីវេលម៉ោង៨និង៣០នាទីយប់ ថ្ងៃទី៧ ខែមករា ឆ្នាំ២០១៩ ស្ថិតនៅផ្ទះជួល ភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ ។
បុរសស្រវឹងស្រាមានឈ្មោះ ហេង ហ៊ុន អាយុ២៤ឆ្នាំ មុខរបរកម្មករសំណង់ ស្នាក់នៅភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើតនៅភូមិក្រសាំង ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ មានប្រពន្ធឈ្មោះ យ៉ត ស្រីលក្ខណ៍ អាយុ ២៣ឆ្នាំ មុខរបរកម្មកររោងចក្រ ស្នាក់ភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើតនៅភូមិជាមួយប្តី ។
តាមប្រភពព័ត៌មានពីប្រពន្ធបុរសខាងលើបាននិយាយថា មុនពេលកើតហេតុប្តីរបស់នាងបានផឹកស៊ីជាមួយមិត្តភក្តិដែលមានគ្នា៤នាក់ផឹកស្រវឹងហើយបានរករឿងគ្នារកវាយគ្នា ប៉ុន្តែមិត្តភក្តិផ្សេងទៀតមិនបានរកវាយគាត់នោះទេ បន្ទាប់មកបុរសខាងលើបានរកប្រពន្ធដើម្បីរកវាយម្តង ចំណែកប្រពន្ធមានការភិតភ័យបានរត់ទៅផ្ទះម្តាយមីងខាងប្រុសជួយ ។
លុះពេលប្តីដើររកប្រពន្ធដើម្បីរករឿងហើយបន្ទាប់មកមើលទៅអាការស្រវឹងធ្ងន់ធ្ងរពេក នរណានិយាយក៏មិនស្តាប់គិតតែរកវាយគេឯងសង្ស័យដូចមនុស្សបែកថ្នាំផងនោះប្រជាពលរដ្ឋបានទូរស័ព្ទប្តឹងទៅសមត្ថកិច្ចអោយមកជួយអន្តរាគមន៍ភ្លាមៗផងដែរ ។
តាមសំដីសមត្ថកិច្ចបានសាកសួរទៅប្រពន្ធរបស់ជនបង្កខាងលើបាននិយាយថា ប្តីរបស់ខ្លួនធ្លាប់រករឿងគាត់ម្ដងរួចមកហើយអោយតែស្រវឹងដូចជាខ្មោចចូលអញ្ចឹង នរណាក៏មិនខ្លាចដែរ សូម្បីតែមានគ្នាច្រើនចាប់គាត់ក៏មិនចង់ឈ្នះដែរ ។ បន្ទាប់មកសមត្ថកិច្ច និងស្ត្រីជាប្រពន្ធខាងលើនាំបុរសខាងលើទៅកាន់ប៉ុស្តិ៍នគរបាលរដ្ឋបាលចោមចៅទី៣ដើម្បីសួរនាំបន្ថែម ។
លុះមកដល់ប៉ុស្តិ៍នគរបាលចោមចៅខាងលើនៅតែអាការដដែលមិនខ្លាចទាំងសមត្ថកិច្ចផង ហើយក្រុមគ្រួសារបានពឹងសមត្ថកិច្ចបញ្ជូនបុរសខាងលើទៅមន្ទីរពេទ្យបង្អែកពោធិចិនតុងដើម្បីព្យាបាល លុះទៅដល់មន្ទីរពេទ្យហើយពេទ្យមិនហ៊ានព្យាបាលទៀត ។ ក្រោយពេលកើតហេតុលោកគ្រូពេទ្យបង្អែកពោធិចិនតុងបានបញ្ជូនទៅកាន់មន្ទីរពេទ្យមិត្តភាពខ្មែរ-សូវៀត(ពេទ្យរុស្ស៊ី)ដើម្បីព្យាបាលបន្ត ព្រមទាំងសមត្ថកិច្ចទៅជាមួយផងដែរ ៕
ចែករំលែកព័តមាននេះ