រាជធានីភ្នំពេញ៖ ជនសង្ស័យ១ក្រុមមានគ្នាចំនួន៨នាក់បានប្រមូលផ្ដុំគ្នាសម្ងំសេពគ្រឿងញៀននៅក្នុងបន្ទប់ផ្ទះជួលមួយកន្លែងធ្វើឲ្យប្រជាពលរដ្ឋដែលបានដឹងមានការភ័យខ្លាច ក៏បានលួចរាយការណ៍ជូននគរបាលដោយស្ងាត់ៗ ហើយនគរបាលក៏បានចេញអន្តរាគមន៍ឆ្មក់ចាប់ខ្លួនបានទាំងសម្បុករួមទាំងថ្នាំញៀន និងឧបករណ៍សម្រាប់ប្រើប្រាស់ថ្នាំញៀនផងដែរ។
ការឃាត់ខ្លួនជនសង្ស័យទាំងអស់ខាងលើនោះបានធ្វើឡើងកាលពីវេលាម៉ោង៤និង៣០នាទីរសៀលថ្ងៃទី៧ ខែមករា ឆ្នាំ២០១៩ នៅក្នុងបន្ទប់ផ្ទះជួលមួយកន្លែងដែលមានទីតាំងស្ថិតនៅក្នុងភូមិត្រពាំងថ្លឹងទី១ សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យទាំង៨នាក់ខាងលើដែលត្រូវសមត្ថកិច្ចរបានចាប់ឃាត់ខ្លួនរួមមាន ១-ឈ្មោះយន្ត័ ថាវិន ភេទប្រុស អាយុ១៩ឆ្នាំ ២-ឈ្មោះបឿន រ៉ាម៉ន ភេទប្រុស អាយុ១៨ឆ្នាំ ៣-ឈ្មោះម៉េង ភ័ក្ត្រ ភេទប្រុស អាយុ២០ឆ្នាំ ៤-ឈ្មោះហែម ឡូយ ភេទប្រុស អាយុ២០ឆ្នាំ ៥-ឈ្មោះស្តី ស៊ីណា ភេទប្រុស អាយុ១៨ឆ្នាំ ៦-ឈ្មោះអ៊ុច សំអឿន ភេទប្រុស អាយុ១៩ឆ្នាំ ៧-ឈ្មោះ កែវ កំសាន្ត ភេទប្រុស អាយុ១៨ឆ្នាំ និង៨-ឈ្មោះកែវ ឯម អាយុ២០ឆ្នាំ។
ក្រោយពេលចាប់ឃាត់ខ្លួនជនសង្ស័យទាំង៨នាក់ខាងលើ កម្លាំងនគរបាលខាងលើបានដកហូតបានគ្រឿងញៀនចំនួន៥កញ្ចប់ រួមជាមួយឧបករណ៍សម្រាប់ប្រើប្រាស់គ្រឿងញៀនមួយចំនួនទៀតផងដែរ។
ប្រភពដដែលបានបន្តទៀតថា បន្ទាប់ពីកម្លាំងសមត្ថកិច្ចបានធ្វើការដកហូតបានវត្ថុតាងខាងលើរួចហើយ សមត្ថកិច្ចបាននាំខ្លួនជនសង្ស័យទាំងនេះទៅសាកសួរនៅប៉ុស្តិ៍មួយជំហាន រួចទើបបញ្ជូនបន្តទៅកាន់ផ្នែកប្រឆាំងគ្រឿងញៀនខណ្ឌដង្កោដើម្បីសួរនាំបន្ត និងកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់៕
ចែករំលែកព័តមាននេះ