ខេត្តប៉ៃលិន ៖ ជារៀងរាល់ឆ្នាំ នៅពេលដល់រដូវប្រមូលផលដំឡូងមី គេតែងឃើញថា កម្មករប្រុសស្រីក្មេងចាស់ចូលមកបោះតង់ស្នាក់នៅដើម្បីស៊ីឈ្នួលកាប់ចិញ្ច្រាំដំឡូងឱ្យថៅកែ រួចហាលឲ្យស្ងួត ទើបលក់ឱ្យឈ្មួញដឹកតាមរថយន្តយកទៅលក់បន្តនៅប្រទេសថៃ ។
ប៉ុន្ដែជាការកត់សម្គាល់នៅចុងឆ្នាំ២០១៨ និងដើមឆ្នាំ២០១៩នេះវិញ កម្មករដែលធ្លាប់តែមកពីក្នុងខេត្តប៉ៃលិន បាត់ដំបង សៀមរាប កំពង់ឆ្នាំង និងខេត្តផ្សេងៗទៀត អត់ចូលមកស៊ីឈ្នួលកាប់ចិញ្ច្រាំដូចមុននោះទេ ។ បើតាមការអះអាងរបស់កសិករបានឲ្យដឹងថា ដោយសារឆ្នាំនេះអាកាសធាតុត្រជាក់ពេក ព្រមទាំងមានសន្សើមចុះខ្លាំង ធ្វើឲ្យកម្មករចាស់ៗ និងក្មេងៗទ្រាំមិនបាន ។ ណាមួយ បើទោះជាតម្លៃដំឡូងមីលើទីផ្សារខ្ពស់ជាងឆ្នាំមុនៗក្ដី តែថ្លៃឈ្នួលកាប់ចិញ្ច្រាំនៅដដែល ធ្វើឲ្យពួកគេងាកទៅរកការងារផ្សេងវិញ ព្រោះទីផ្សារកម្លាំងពលកម្មឥឡូវកំពុងមានតម្រូវការខ្ពស់ ពិសេសកម្មករសំណង់ ។
បើតាមការឲ្យដឹងពីកម្មករដែលមកបោះតង់ស៊ីឈ្នួលកាប់ចិញ្ច្រាំដំឡូងមី នៅក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន បានលើកឡើងថា គាត់តែងតែមកស៊ីឈ្នួលកាប់ចិញ្ច្រាំដំឡូងមីឲ្យថៅកែនៅពេលដល់រដូវប្រមូលផលជារៀងរាល់ឆ្នាំ។ ជាការកត់សម្គាល់ឆ្នាំនេះ ហាក់ពុំសូវមានកម្មករចូលមកធ្វើការសោះ ។
លោក ជួន ប៉ុន កម្មកររូបនេះបន្ដថា លោកបានចូលមកស៊ីឈ្នួលកាប់ចិញ្ច្រាំដំឡូងមីអស់រយៈពេលជាច្រើនខែមកហើយ ដោយនាំទាំងប្រពន្ធមកជាមួយដែរ ។ លោកបន្ដថា ឆ្នាំនេះ ទោះបីជាតម្លៃដំឡូងមីលើទីផ្សារខ្ពស់ជាងឆ្នាំមុនក្ដី តែតម្លៃឈ្នួលកាប់ចិញ្ច្រាំនៅដដែល គឺ១កញ្ឆេ តម្លៃ១ពាន់រៀល ហើយក្នុង១ថ្ងៃ លោកនិងភរិយាអាចកាប់ចិញ្ច្រាំបានពី៤០ទៅ៥០កញ្ឆេដែរ ។
លោក ជួន ប៉ុន បញ្ជាក់ថា ៖« ការកាប់ចិញ្ច្រាំដំឡូងមីឆ្នាំនេះ តម្លៃមិនខុសពីឆ្នាំមុនទេ ដោយថៅកែឱ្យត្រឹមតែ១កញ្ឆេតម្លៃ១០០០រៀលប៉ុណ្ណោះ ទោះបីជាតម្លៃទីផ្សារដំឡូងមីឡើងខ្ពស់ជាងឆ្នាំមុនៗក្ដី ដោយសារតែបែបនេះហើយបានជាពុំសូវមានកម្មករចូលមកធ្វើការ ហើយណាមួយពេលនេះជាខែចុះត្រជាក់ខ្លាំងទៀត »។ លោកបន្ដថា ៖« ការធ្លាក់ចុះនេះ ក៏ដោយសារតែកម្លាំងការងារក្នុងវិស័យសំណង់កំពុងមានតម្រូវការខ្ពស់ ហើយបើគិតពីប្រាក់ឈ្នួលវិញ ក៏ខ្ពស់ជាងការងារកាប់ចិញ្ច្រាំដំឡូងមីដែរ។ ដូច្នេះហើយបានជាគេមិនសូវមករកការងារនៅទីនេះ »។
ស្ត្រីដែលកំពុងកាប់ចិញ្ច្រាំដំឡូងមី ឈ្មោះ ញ៉ែម រ៉ាត់ បានឲ្យដឹងដែរថា ការបោះតង់ស្នាក់នៅដើម្បីស៊ីឈ្នួលកាប់ចិញ្ច្រាំមើមដំឡូងមីឆ្នាំនេះ មានការលំបាកបន្តិច ដោយសារអាកាសធាតុត្រជាក់ខ្លាំងពេក ហើយក៏មានទឹកសន្សើមច្រើន សូម្បីតែក្មេងតូចៗក៏ពិបាកទ្រាំដែរ ។ អ្នកស្រីបន្ដថា បច្ចុប្បន្ននេះ ដំឡូងមីស្រស់១គីឡូក្រាម ម្ចាស់ស្តង់អាចលក់បានជាង២បាតឬជាង២០០រៀល រីឯចំណិតដំឡូងមីស្ងួត ថៅកែអាចលក់បាន៥,៨ ទៅ៥,៩បាត ឬជាង៦០០រៀលក្នុង១គីឡូងក្រាម ដែលតម្លៃនេះ មានការកើនឡើងជាងឆ្នាំមុនៗច្រើន តែទោះបីជាតម្លៃកើនឡើងក្ដី ក៏ថ្លៃឈ្នួលកាប់ចិញ្ច្រាំមិនឡើងថ្លៃដែរ ដែលនេះជាហេតុផលមួយធ្វើឲ្យកម្មករឯទៀត ងាកទៅរកការងារផ្សេងធ្វើ ។
យ៉ាងនេះក្ដីអ្នកស្រីថា ៖« ពួកយើងនៅតែបន្ដខិតខំប្រឹងប្រែងធ្វើទាំងយប់ទាំងថ្ងៃ ដើម្បីបានប្រាក់យកទៅផ្គត់ផ្គង់ជីវភាពគ្រួសារ ដោយមិនចង់ចេញទៅធ្វើការងារនៅប្រទេសគេនោះទេ ព្រោះឆ្ងាយពីផ្ទះសម្បែង លំបាកចេញចូល ជាពិសេស ពេលមានជំងឺម្តងៗ ក៏លំបាករកពេទ្យមើលព្យាបាលដែរ »៕
ចែករំលែកព័តមាននេះ