រាជធានីភ្នំពេញ ៖ ខណៈនៅឯប្រទេសចិនកំពុងផ្ទុះជំងឺម្យ៉ាងឈ្មោះថា ប៉េស អាហ្វ្រិក លើសត្វជ្រូក ដែលត្រូវបានអាជ្ញាធរដុតកម្ទេចចោលរាប់ម៉ឺនក្បាលនោះ នៅបណ្ដាប្រទេសជិតខាងកម្ពុជា ដូចជាថៃ និងវៀតណាមជាដើមក៏កំពុងមានផែនការរឹតបន្តឹងខ្លាំងផងដែរពីការនាំចូលសត្វជ្រូកពីប្រទេសចិន…
រាជធានីភ្នំពេញ ៖ ខណៈនៅឯប្រទេសចិនកំពុងផ្ទុះជំងឺម្យ៉ាងឈ្មោះថា ប៉េស អាហ្វ្រិក លើសត្វជ្រូក ដែលត្រូវបានអាជ្ញាធរដុតកម្ទេចចោលរាប់ម៉ឺនក្បាលនោះ នៅបណ្ដាប្រទេសជិតខាងកម្ពុជា ដូចជាថៃ និងវៀតណាមជាដើមក៏កំពុងមានផែនការរឹតបន្តឹងខ្លាំងផងដែរពីការនាំចូលសត្វជ្រូកពីប្រទេសចិន ។
ចំណែកកម្ពុជាវិញ បើតាមអ្នកពាក់ព័ន្ធក្នុងវិស័យនេះ បានឲ្យដឹងថា នៅក្នុងអំឡុងខែមករានេះ ក្រសួងកសិកម្ម រុក្ខាប្រមាញ់ និងនេសាទ និងសមាគមអ្នកចិញ្ចឹមសត្វកម្ពុជា គ្រោងនឹងរៀបចំកិច្ចប្រជុំដ៏ធំមួយជាមួយអ្នកពាក់ព័ន្ធក្នុងវិស័យចិញ្ចឹមជ្រូក ដើម្បីទប់ស្កាត់ការរីកដាល នៃជំងឺលើសត្វជ្រូកនៅកម្ពុជាផងដែរ ។ ទោះបីជាយ៉ាងណា ពុំទាន់ដឹងច្បាស់ពីកាលបរិច្ឆេទច្បាស់លាស់នៅឡើយទេ ។
លោក ជេត ភីរម្យ អនុប្រធានសមាគមអ្នកចិញ្ចឹមសត្វកម្ពុជា បានមានប្រសាសន៍តាមទូរសព្ទ័កាលពីថ្ងៃទី៧ មករា ថា សមាគមអ្នកចិញ្ចឹមសត្វកម្ពុជា នឹងសហការជាមួយក្រសួងកសិកម្ម និង សាកលវិទ្យាល័យកសិកម្មចំការដូង រៀបចំកិច្ចប្រជុំថ្នាក់ជាតិមួយ ដើម្បីទប់ស្កាត់ ពីការឆ្លងជំងឺនេះមកកាន់ជ្រូកកម្ពុជា ខណៈប្រទេសជិតខាង ដូចជាថៃ និងវៀតណាម កំពុងតែមានវិធានការលើការទប់ស្កាត់បញ្ហានេះដែរ ដូចជាការរឹតបន្តឹងដល់ការនាំចូលពីប្រទេសចិន និងការនាំចូល តែផលិតផលសម្រេចពីសាច់ជ្រូកជាដើម ។
លោកបន្តថា សិក្ខាសាលា និងកិច្ចប្រជុំដែលនឹងរៀបចំនៅពេលខាងមុខនេះ សមាគម នឹងអញ្ជើញអ្នកចិញ្ចឹមជ្រូក ក៏ដូចជាអ្នកពាក់ព័ន្ធ នៅក្នុងវិស័យចិញ្ចឹមជ្រូកនេះ មកជជែកនិងរកវិធីសាស្ត្រ ដើម្បីទប់ស្កាត់ពីការឆ្លងជំងឺប៉េស អាហ្វ្រិកនេះមកលើជ្រូកកម្ពុជា និងត្រូវឲ្យអ្នកចិញ្ចឹមជ្រូកទាំងអស់ បង្កើនការប្រុងប្រយ័ត្នឲ្យបានខ្ពស់ ស្របពេលទីផ្សារជ្រូកនៅកម្ពុជា កំពុងមានស្ថានភាពល្អប្រសើរ ។ លោកមានប្រសាសន៍ថា ៖« បច្ចុប្បន្ននេះស្ថានភាពទីផ្សារជ្រូក យើងឃើញថាមានកំណើនល្អប្រសើរឡើងវិញ ហើយកសិករក៏ដូចជាក្រុមហ៊ុនធំៗក៏បាននិងកំពុងពង្រីកការចិញ្ចឹមឡើងវិញ ដើម្បីផ្គត់ផ្គង់លើទីផ្សារក្នុងស្រុកហើយក៏បានកាត់បន្ថយការនាំចូលពីខាងក្រៅប្រទេសបានមួយចំណែកផងដែរ » ។
លោកបន្ថែមថា ទីផ្សារជ្រូកធ្លាក់មួយរយៈពេលប្រមាណជាង១ឆ្នាំ វាក៏បានងើបឡើងវិញបន្តិចម្ដងៗ ហើយរហូតមកដល់ពេលនេះ ឃើញថា ទីផ្សារជ្រូកក្នុងស្រុកស្ថិតក្នុងស្ថានភាពមួយល្អប្រសើរ ហើយអ្នកចិញ្ចឹមជ្រូកក៏កំពុងសប្បាយចិត្តក្នុងការទទួលផល និងទទួលយកតម្លៃនៅលើទីផ្សារបច្ចុប្បន្ន ។ ប៉ុន្តែ ដោយសារតែការពង្រីកការចិញ្ចឹមច្រើននៅក្នុងស្រុក បានធ្វើឲ្យមានការខ្វះខាតជ្រូកពូជសម្រាប់ចិញ្ចឹមទៅវិញ ព្រោះបច្ចុប្បន្ននេះ ការផ្គត់ផ្គង់កូនជ្រូកពូជនៅលើទីផ្សារ មានតែក្រុមហ៊ុន M’s Pig របស់លោកឧកញ៉ា ម៉ុង ឫទ្ធី មួយប៉ុណ្ណោះ ហើយក្រុមហ៊ុននេះក៏មិនអាចផ្គត់ផ្គង់បានគ្រប់គ្រាន់ដែរ ដូច្នេះទាមទារឲ្យមានការពង្រីកការផ្គត់ផ្គង់កូនជ្រូកពូជបន្ថែមទៀតសម្រាប់កសិករ និងម្ចាស់កសិដ្ឋាននានានៅក្នុងស្រុកពង្រីកការចិញ្ចឹមជ្រូកសាច់ផ្គត់ផ្គង់លើទីផ្សារ ។
លោកបញ្ជាក់ថា បើសិនជាស្ថានភាពទីផ្សារជ្រូកកម្ពុជានៅតែល្អប្រសើរបែបនេះបន្តទៀត មិនយូរទេកម្ពុជានឹងអាចកាត់បន្ថយការនាំចូលពីខាងក្រៅប្រទេសកាន់តែច្រើន ព្រោះកសិករនិងម្ចាស់កសិដ្ឋាន នឹងពង្រីកការចិញ្ចឹមរបស់ខ្លួន កាន់តែច្រើន ដើម្បីផ្គង់ផ្គង់លើទីផ្សារ ក៏ប៉ុន្តែវាត្រូវការពេលវេលាយូរបន្ថែមទៀត ។ លោកបន្ថែមថា ៖« សព្វថ្ងៃនេះ យើងនាំចូលជ្រូកតែពីប្រទេសថៃទេ មកកាន់ទីផ្សារក្នុងស្រុកយើង ហើយការនាំចូលពីវៀតណាមលែងមានទៀតហើយ ព្រោះវៀតណាមគេមានគោលការណ៍មួយ គឺចិញ្ចឹមមិនឲ្យលើសពីតម្រូវការ អីចឹងហើយទើបមិនមានជ្រូកសម្រាប់នាំចូលកាន់ទីផ្សារយើងដូចមុនទៀតនោះទេ ។ ដូច្នេះ ខណៈយើងនៅតែមានទំនាក់ទំនងទីផ្សារអន្តរជាតិក្នុងវិស័យនេះ យើងត្រូវតែពិនិត្យឲ្យបានខ្លាំងថែមទៀត ដើម្បីបង្ការពីការឆ្លងជំងឺដែលកំពុងរាលដាលនៅប្រទេសចិន នោះ »។
យោងតាមបណ្ដាញសង្គមរបស់លោកឧកញ៉ា ម៉ុង ឫទ្ធី បានបង្ហោះឃ្លីបវីដេអូមួយ អំពីសកម្មភាពដុតកម្ទេច និងកប់ជ្រូកដែលរកឃើញមានជំងឺប៉េសអាហ្វ្រិក នៅក្នុងប្រទេសចិនប្រមាណ៤ម៉ឺនក្បាល ហើយលោកឧកញ៉ាក៏បានសរសេរបញ្ជាក់ឲ្យកសិករ ដែលចិញ្ចឹមជ្រូក ម្ចាស់កសិដ្ឋានខ្នាតតូច ខ្នាតមធ្យម និងខ្នាតធំទូទាំងប្រទេសកម្ពុជាទាំងអស់បង្កើនការប្រុងប្រយ័ត្ន និងទប់ស្កាត់ពីការឆ្លងជំងឺនេះមកកាន់ជ្រូកក្នុងស្រុក ៕
ចែករំលែកព័តមាននេះ