រាជធានីភ្នំពេញ ៖ ជនសង្ស័យម្នាក់បានធ្វើសកម្មភាពឆក់កាបូបពីស្ត្រីជាបុគ្គលិកខារ៉ាអូខេម្នាក់បានសម្រេច បណ្តាលឲ្យម៉ូតូទាក់ដៃចង្កូតគ្នាដួលត្រូវប្រជាពលរដ្ឋចាប់បានប្រគល់ទៅឲ្យសមត្ថកិច្ចមូលដ្ឋាន បង្កឲ្យមានការភ្ញាក់ផ្អើលឡើង កាលពីវេលាម៉ោង២និង៤០នាទីទៀបភ្លឺ ថ្ងៃទី០៨ ខែមករា ឆ្នាំ២០១៩ ត្រង់ចំណុចក្បែរខាងក្រោមស្ពានអាកាសស្ទឹងមានជ័យ តាមបណ្ដោយផ្លូវព្រះមុន្នីរ៉េត ស្ថិតក្នុងសង្កាត់បឹងសាឡាង ខណ្ឌទួលគោក ។
ជនរងគ្រោះឈ្មោះ សុភក្ត័ អាយុ៣៣ឆ្នាំ មុខរបរធ្វើការនៅខារ៉ាអូខេអេកូ ស្នាក់នៅក្រោយវត្តស្ទឹងមានជ័យ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ ។ ចំណែកឯជនសង្ស័យមានឈ្មោះ ភឿន តួ ភេទប្រុស អាយុ២៧ឆ្នាំ មុខរបរ និងកន្លែងស្នាក់នៅមិនពិតប្រាកដ មានស្រុកកំណើតនៅស្រុកស្អាង ខេត្តកណ្ដាល ។
បើតាមសម្តីស្ត្រីរងគ្រោះបានអោយដឹងថា នៅមុនពេលកើតហេតុគាត់បានជិះម៉ូតូមួយគ្រឿងម៉ាកធូដេ ពណ៌ក្រហម ទើបតែជិះចេញមកពីកន្លែងធ្វើការនៅម្តុំស្តុបដេឥន្ទបំណងត្រឡប់ទៅផ្ទះវិញ នៅវត្តស្ទឹងមានជ័យ ដោយធ្វើដំណើរតាមបណ្ដោយផ្លូវព្រះមុន្នីរ៉េត ក្នុងទិសដៅពីស្តុបផ្សារដើមគរឆ្ពោះទៅស្ទឹងមានជ័យ ។
លុះមកដល់ចំណុចកើតហេតុស្រាប់តែមានជនសង្ស័យម្នាក់ជិះម៉ូតូមួយគ្រឿងម៉ាកអ៊ិចសាយទ័រ ពណ៌ខ្មៅជិះមកពីក្រោយក៏បានធ្វើសកម្មភាពឆក់កាបូបពីរូបគាត់ដែលស្ពាយ និងខ្លួនបណ្តាលឲ្យដាច់ខ្សែធ្វើឲ្យចង្កូតម៉ូតូរបស់ជនសង្ស័យរ៉េទៅទាក់ជាមួយដៃម៉ូតូជនរងគ្រោះក៏បណ្តាលឲ្យដួលទាំងអស់គ្នា ។
ភ្លាមៗនោះផងដែរ ក៏មានប្រជាពលរដ្ឋដែលបានឃើញហេតុការណ៍បាននាំគ្នាជួយអន្តរាគមន៍ចាប់ឃាត់ជនសង្ស័យ និងបានស្វាគមន៍ម្នាក់មួយដៃមួយជើង បណ្តាលឲ្យហើមមុខមើលលែង ចង់ស្គាល់ ។ ដោយឡែកកាបូបរបស់ជនរងគ្រោះក៏ត្រូវបានជនឆ្លៀតឱកាសធ្វើការលួចយកទៅ ខណៈពេលដែលមានប្រជាពលរដ្ឋជាច្រើនមកជួយធ្វើអន្តរាគមន៍ ។ ប៉ុន្តែសំណាងល្អដែលនៅក្នុងកាបូបរបស់ជនរងគ្រោះដែលបានបាត់ទៅនោះមិនមានវត្ថុមានតម្លៃ គឺមានតែម្សៅផាត់មុខតែប៉ុណ្ណោះ ។
ក្រោយពីកើតហេតុជនសង្ស័យរួមទាំងវត្ថុតាំងត្រូវបានសមត្ថកិច្ចមូលដ្ឋាននាំយកទៅសាកសួរនាំនៅប៉ុស្តិ៍នគរបាលរដ្ឋបាលបឹងសាឡាង ដើម្បីកសាងសំណុំរឿងបញ្ជូនខ្លួនទៅអធិការដ្ឋាននគរបាលខណ្ឌទួលគោករង់ចាំធ្វើការចាត់ការទៅតាមនីតិវិធី ៕
ចែករំលែកព័តមាននេះ