រាជធានីភ្នំពេញ ៖ ព្រះសង្ឃនិងតាអាចារ្យនៅវត្តតាំងកសាងខាងត្បូងស្ទើរដាច់ផ្ងារ បន្ទាប់ពីប្រទះឃើញរថយន្តដឹកសព១គ្រឿង មានទាំងសពបុរសម្នាក់ផង ស្ថិតនៅក្បែរឈាបនដ្ឋានក្នុងវត្តនោះ ។ ដោយសារតែរថយន្តដឹកសពខាងលើ ពុំមានបិទស្លាកឡូហ្គោ ហើយមិនដឹងថា…
រាជធានីភ្នំពេញ ៖ ព្រះសង្ឃនិងតាអាចារ្យនៅវត្តតាំងកសាងខាងត្បូងស្ទើរដាច់ផ្ងារ បន្ទាប់ពីប្រទះឃើញរថយន្តដឹកសព១គ្រឿង មានទាំងសពបុរសម្នាក់ផង ស្ថិតនៅក្បែរឈាបនដ្ឋានក្នុងវត្តនោះ ។ ដោយសារតែរថយន្តដឹកសពខាងលើ ពុំមានបិទស្លាកឡូហ្គោ ហើយមិនដឹងថា ដឹកសពចូលមកទុកចោលតាំងពីពេលណា ព្រោះគ្មានការជូនដំណឹងនោះ ទើបបង្កឱ្យមានការភ្ញាក់ផ្អើលនិងសង្ស័យថា ជារថយន្តដឹកសពយកមកប្លុងចោល ។
បន្ទាប់ពីតាអាចារ្យរាយការណ៍ដល់នគរបាលឲ្យទៅពិនិត្យមើល ទើបក្រុមនគរបាលការិយាល័យបច្ចេកទេសនៃស្នងការដ្ឋានរាជធានីភ្នំពេញ ទៅធ្វើកោសល្យវិច័យដឹងថា រថយន្តដឹកសពនេះ គឺជាកម្មសិទ្ធិរបស់បុរសម្នាក់ឈ្មោះ ងួន ប្រាក់ធី ហៅឌី ដែលកន្លងមក តែងមានរឿងចម្រូងចម្រាសដណ្ដើមសព ជាមួយក្រុមរថយន្តដឹកសពផ្សេងទៀត ។ លុះពេលនេះ ក៏មានបញ្ហាផ្អើលពេញវត្តពីរឿងរថយន្តដឹកសពនេះ ។
ហេតុការណ៍ភ្ញាក់ផ្អើលនេះ កើតឡើងកាលពីវេលាម៉ោង៨ព្រឹកថ្ងៃទី៧ ខែមករា នៅវត្តតាំងកសាងខាងត្បូង ស្ថិតក្នុងភូមិចំការឪឡឹក សង្កាត់កាកាប២ ខណ្ឌពោធិ៍សែនជ័យ ។ រថយន្តដឹកសពដែលបង្កការភ្ញាក់ផ្អើលនេះ ពណ៌ស ពាក់ផ្លាកលេខ ព្រះសីហនុ ២A-២៦៥១៦ ។ ក្រោយពេលមានការភ្ញាក់ផ្អើល ទើបលេចមុខអ្នកបើកបររថយន្តនិងឈ្មោះ ងួន ប្រាក់ធី ហៅឌី ទៅកាន់កន្លែងកើតហេតុ និងប្រាប់ពីមូលហេតុដែលទុករថយន្តនិងសពចោលនាំឲ្យមានការភ្ញាក់ផ្អើលក្នុងវត្ត ។ លោកតាអាចារ្យម្នាក់និយាយថា មុនពេលមានការភ្ញាក់ផ្អើល លោកតាបានប្រទះឃើញរថយន្ត១គ្រឿងខាងលើ ចតចោលនៅជិតឈាបនដ្ឋានដោយមិនមានម្ចាស់នៅក្បែរឡើយ ។
ដោយមានការសង្ស័យ លោកតាក៏បានដើរទៅអើតមើល ស្រាប់តែប្រទះឃើញមានសពបុរសម្នាក់នៅក្នុងរថយន្តនោះ ។ បន្ទាប់ពីឃើញបែបនេះ តើនរណាដែលថា មិនមានការភ្ញាក់ផ្អើល ហើយលោកតាក៏បានប្រញាប់ទូលព្រះសង្ឃភ្លាមៗ ក្រោយមកទើបរាយការណ៍ជូននគរបាលប៉ុស្តិ៍កាកាបទី២ ទៅពិនិត្យមើលភ្លាមៗដែរ មិនហ៊ានទុកអូសបន្លាយពេលឡើយ ។
ដោយឡែក នគរបាលបានឲ្យដឹងថា ក្រោយពេលទទួលដំណឹងពីលោកតាអាចារ្យរួចមកពិតជាធ្វើឲ្យមានការភ្ញាក់ផ្អើលមែន ហើយកម្លាំងនគរបាលប៉ុស្តិ៍បានទៅកាន់កន្លែងកើតហេតុ និងឃើញទិដ្ឋភាពដូចអ្វីដែលលោកតាអាចារ្យរាយការណ៍មែន ។ បន្ទាប់មក នគរបាលប៉ុស្តិ៍កាកាបទី២ បានរាយការណ៍បន្តទៅតាមឋានានុក្រមជាបន្តបន្ទាប់ រហូតដល់ខាងនគរបាលការិយាល័យបច្ចេកទេសនៃស្នងការដ្ឋានរាជធានីភ្នំពេញទៅពិនិត្យទៀតផង ។
ប៉ុន្តែ ខណៈនោះអ្វីៗក៏បានអស់ចម្ងល់ ដោយនៅពេលនគរបាលរៀបចំធ្វើកោសល្យវិច័យសពទៅហើយ ស្រាប់តែលេចមុខអ្នកបើកបររថយន្ត និងលោក ងួន ប្រាក់ធី ហៅឌី ដែលកន្លងមកតែងមានរឿងអាស្រូវខាងដណ្ដើមសព ជាមួយក្រុមរថយន្តដឹកសពផ្សេងទៀត មិនចេះចប់មិនចេះហើយនោះទៅដល់ និងអះអាងថា រថយន្តខាងលើគឺជាកម្មសិទ្ធិរបស់ខ្លួន ។ ជាមួយនេះ ក៏បានបង្ហាញលិខិតកំណត់ហេតុប្រគល់សព១ច្បាប់ ដែលចេញដោយនគរបាលខណ្ឌច្បារអំពៅ ឱ្យនគរបាលបច្ចេកទេសមើលទៀតផង។
ម្ចាស់រថយន្តខាងលើបានអះអាងប្រាប់នគរបាលថា សពនៅក្នុងរថយន្តរបស់ខ្លួននេះឈ្មោះ រស់ ចាន់វាសនា អាយុ២៤ឆ្នាំ មានទីលំនៅក្នុងភូមិឧកញ៉ាប៉ាង ឃុំកំពង់ត្រឡាច ស្រុកកំពង់ត្រឡាច ខេត្តកំពង់ឆ្នាំង ។ ជនរងគ្រោះស្លាប់ដោយសារគ្រោះថ្នាក់ចរាចរណ៍ ខណៈជិះម៉ូតូហុងដាឌ្រីម សេ១២៥ ពណ៌ខ្មៅ ពាក់ផ្លាកលេខភ្នំពេញ ១AG-៤៤៣៣ មានគ្នា២នាក់ ហើយត្រូវរថយន្តបុកស្លាប់ម្នាក់របួសធ្ងន់ម្នាក់ ។
ប្រភពដដែលនិយាយទៀតថា ខ្លួនបានទៅដឹកសពដោយមានការចេញលិខិតអនុញ្ញាតត្រឹមត្រូវពីនគរបាលខណ្ឌច្បារអំពៅ ។ ខណៈនោះមានគោលបំណងដឹកសពទៅកាន់ឈាបនដ្ឋានវត្តទឹកថ្លា ក្នុងខណ្ឌសែនសុខ រង់ចាំក្រុមគ្រួសារមកទទួលយកទៅធ្វើបុណ្យទេ ប៉ុន្តែពេលទៅដល់ ដោយសារទ្វារវត្តទឹកថ្លាជាប់សោចូលមិនរួច ទើបដឹកសពបន្តដំណើរមកកាន់ឈាបនដ្ឋានវត្តតាំងកសាងខាងត្បូងវិញ ។ លុះពេលដឹកទៅដល់វត្តហើយនៅតែមិនអាចដាក់សពចុះបានព្រោះមិនបានជួបតាអាចារ្យ ទើបអ្នកបើកបរទុករថយន្តនិងសពនៅក្នុងវត្ត រួចហើយទៅរកកន្លែងដេក ស្រាប់តែជ្រុលម៉ោងរហូតដល់មានការភ្ញាក់ផ្អើល ។
ក្រោយពីទទួលបានការពិនិត្យលើលិខិតស្នាម និងការបំភ្លឺពីអ្នកបើកបររថយន្តរួចរាល់ ទើបធ្វើឲ្យនគរបាលមានការហួសចិត្តគ្រប់ៗគ្នា ហើយក៏អនុញ្ញាតឲ្យឈ្មោះ ងួន ប្រាក់ធី ហៅឌី ចាត់ចែងសពនោះ ។ បុរសនោះបានដឹកសពចេញពីវត្តតាំងកសាងខាងត្បូង ត្រឡប់ទៅកាន់វត្តទឹកថ្លាវិញ ដើម្បីរង់ចាំក្រុមគ្រួសារទៅទទួលយកធ្វើបុណ្យនៅទីនោះ ។
គេមិនដឹងថា ថ្លៃដឹកសពទៅតម្កល់ធ្វើបុណ្យតាមវត្តយកថ្លៃប៉ុន្មាននោះទេ ៕
ចែករំលែកព័តមាននេះ