ក្រុងប៉ោយប៉ែត ៖ បើតាមសេចក្តីរាយការណ៍បឋមបានឱ្យដឹងថា គិតមកត្រឹមម៉ោង៨និង៣៩នាទីព្រឹក ថ្ងៃទី០៨ ខែមករា ឆ្នាំ២០១៨នេះ ភ្នាក់ងារកោះសន្តិភាពបានជួបតាមទូរស័ព្ទជាមួយលោក សាន សា៑នហូ…
ក្រុងប៉ោយប៉ែត ៖ បើតាមសេចក្តីរាយការណ៍បឋមបានឱ្យដឹងថា គិតមកត្រឹមម៉ោង៨និង៣៩នាទីព្រឹក ថ្ងៃទី០៨ ខែមករា ឆ្នាំ២០១៨នេះ ភ្នាក់ងារកោះសន្តិភាពបានជួបតាមទូរស័ព្ទជាមួយលោក សាន សា៑នហូ អភិបាលក្រុងប៉ោយប៉ែត បានប្រាប់ឱ្យដឹងថា ករណីឆាបឆេះជណ្តើរយន្តនៃអគារ១៨ជាន់ នៅក្នុងទឹកដីកាស៊ីណូនេះ យោងកាសាកសួរ គឺដោយសារទុស្សេចរន្តចំណុចជណ្តើយន្ត ហើយក៏ឆាបឆេះតែចំណុចជណ្តើរយន្តនោះផងដែរ ប៉ុន្តែមិនឆាបឆេះដល់អគារកាស៉ីណូនោះទេ។ លោកបញ្ជាក់ថា ពុំមានអ្នកស្លាប់បាត់បង់ជីវិតទេ មានតែអ្នករបួស៥ទៅ៦នាក់ប៉ុណ្ណោះ។
គួររំលឹកថា ពាក់ព័ន្ធករណីខាងលើនេះ គឺយប់ម៉ិញមានការឆាបឆេះតួជណ្តើរយន្តពីចំហៀងនៅបែកខាងត្បូងឈៀងខាងកើត នៃអគារ១៨ជាន់មួយនៅក្នុងទឹកដីកាស៊ីណូ បានបង្កឱ្យមានការភ្ញាក់ផ្អើលដល់ប្រជាពលរដ្ឋខ្មែរ និងជនជាតិចិនជាច្រើននាំគ្នាជ្រួលច្របល់រត់ចេញពីបន្ទប់កាស៊ីណូដែលជាកន្លែងស្នាក់នៅ ដែលបានកើតឡើងកាលពីយប់ថ្ងៃទី៧ មករា ២០១៩ ស្ថិតនៅក្នុងទឹកដីភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។
សេចក្តីរាយការណ៍បន្តទៀតថា អគារឆាបឆេះនេះ ដែលដំបូងគេសង្ស័យជាប់គាំងមនុស្សមួយចំនួន ព្រោះខណៈអណ្តាតភ្លើងកំពុងឆាបឆេះនៅជាន់ទី៤ ដេញឡើងទៅជាន់លើឃើញមានភ្លើងពិលបំភ្លឺឆ្វេតឆ្វាតពីលើមកក្រោម។ មនុស្សម្នាកំពុងចោមរោមមើលច្រូងច្រាង ឯវត្តមានជនជាតិចិនក៏កំពុងសម្រុកចេញពីចំណុចកើតហេតុព្រោងព្រៀត។ ហើយគេឃើញអ្នករបួសខ្លះត្រូវបានដឹកទៅមន្ទីរពេទ្យ ចំណែករថយន្តពន្លត់អគ្គីភ័យជាច្រើនគ្រឿងកំពុងជួយបាញ់ពន្លត់ និងមានសមត្ថកិច្ចជំនាញពាក់ព័ន្ធក្នុងក្រុងកំពុងជួយធ្វើសណ្តាប់ធ្នាប់ និងការពារសន្តិសុខផងដែរ។
គួរបញ្ជាក់ថា នៅចំណុចកើតហេតុយប់មិញក៏មានវត្តមានលោក សួន បវរ អភិបាលខេត្ត លោកស្នងការនគរបាលខេត្ត លោកមេបញ្ជាការអាវុធហត្ថខេត្តដឹកនាំកងកម្លាំងចម្រុះមានទាំងនគរបាលការពារព្រំដែនគោក ៩១១ និង៨៩១ ជាមួយរថយន្តពន្លត់អគ្គីភ័យជាច្រើនគ្រឿងជួយបាញ់ពន្លត់។ ហើយរថយន្តសង្គ្រោះជាច្រើនគ្រឿងមានទាំងរថយន្តសង្គ្រោះរបស់ថៃឆ្លងព្រំដែនមកចាំជួយដឹកអ្នករបួសទៅមន្ទីរពេទ្យទៀតផង។
ចែករំលែកព័តមាននេះ