ខេត្តក្រចេះ ៖ ឈើអារលេខ១ មានចំនួនរាប់រយម៉ែត្រគូប នាំយកចេញពីឃ្លាំងបាតអាងវារីអគ្គិសនីសេសាន ក្នុងខេត្តស្ទឹងត្រែង ត្រូវបានដឹកជញ្ជូនតាមក្បួនខ្សែរថយន្តយីឌុបចំនួន១៤គ្រឿងរត់បន្តកន្ទុយគ្នារញ្ជួយផ្លូវជាតិលេខ៧ ផ្អើលអស់សមត្ថកិច្ចពាក់ព័ន្ធចុះឃាត់ត្រួតពិនិត្យឯកសារដឹកជញ្ជូន កាលពីថ្ងៃទី៦ ខែមករា…
ខេត្តក្រចេះ ៖ ឈើអារលេខ១ មានចំនួនរាប់រយម៉ែត្រគូប នាំយកចេញពីឃ្លាំងបាតអាងវារីអគ្គិសនីសេសាន ក្នុងខេត្តស្ទឹងត្រែង ត្រូវបានដឹកជញ្ជូនតាមក្បួនខ្សែរថយន្តយីឌុបចំនួន១៤គ្រឿងរត់បន្តកន្ទុយគ្នារញ្ជួយផ្លូវជាតិលេខ៧ ផ្អើលអស់សមត្ថកិច្ចពាក់ព័ន្ធចុះឃាត់ត្រួតពិនិត្យឯកសារដឹកជញ្ជូន កាលពីថ្ងៃទី៦ ខែមករា ដែលគេនិយាយថា សង្ស័យជាឈើរបស់ឧកញ៉ា ជ័យ ដែលទទួកបន្ទុកឈើឈ្មោះហៅថា បាតអាង ព្រោះឃើញឧកញ៉ា ជ័យ នៅទីនោះជាប់លាប់។
ក្រោយការចុះត្រួតពិនិត្យយ៉ាងល្អិតល្អន់ពីកម្លាំងសមត្ថកិច្ចចម្រុះនៅខេត្តក្រចេះ លើក្បួន រថយន្តដឹកឈើទាំងនេះ ក្រុមមន្ត្រីរដ្ឋបាលព្រៃឈើក្រចេះបានអះអាងថា ការដឹកជញ្ជូនឈើ នេះ គឺមានច្បាប់អនុញ្ញាតិឲ្យដឹកជញ្ជូនទៅតាមតំបន់គោលដៅក្នុងប្រទេសត្រឹមត្រូវ។
ការដឹកជញ្ជូនឈើតាមរថយន្តធុនធំ ដឹកជាខ្សែរថយន្តបង្កឲ្យមានការចាប់អារម្មណ៍នេះ ត្រូវបានគេនិយាយថា ជាការរបើករបូតរលូតនៃថ្ងៃដឹកជញ្ជូនលើកដំបូងពីឈើដែលសង្ស័យកាប់ចេញពីតំបន់ផ្សេងៗនាំចូលមកស្តុកទុកក្នុងបាតអាងឱ្យក្លាយជាឈើស្របច្បាប់ ដែលត្រូវ បាននាំចេញពីតំបន់បាតអាងទំនប់វារីអគ្គិសនីសេសាន នៅខេត្តស្ទឹងត្រែង ក្រោយស្ថានភាពការដឹកជញ្ជូនត្រូវបានជាប់គាំងអស់រយៈពេលជាង១ឆ្នាំកន្លងមកនេះ ព្រោះបើនិយាយពីឈើបាតអាងវាមិនដែលមានសល់ច្រើនម្ល៉ឹងៗទេ ដែលដឹកចេញមួយលើកនេះភ្ញាក់ផ្អើលខ្លាំងណាស់ក្នុងពិភពឈ្មួញឈើដុះស្លែទាំងឡាយ។
ក្រុមមន្ត្រីដែលបានចុះទៅត្រួតពិនិត្យបានអះអាងប្រាប់ឲ្យដឹងទៀតថា រថយន្តធុនធំទាំង នេះមានចំនួន១៤គ្រឿង បានផ្ទុកឈើអារលេខ១ ចំនួនជាង១៨ម៉ែត្រគូបក្នុង១រថយន្ត និងមាន ច្បាប់អនុញ្ញាតិឲ្យដឹកជញ្ជូននាំចេញពីរោងម៉ាស៊ីនអារកែច្នៃបណ្តោះអាសន្ននៅតំបន់បាតអាង ស្រុកសេសាន ខេត្តស្ទឹងត្រែង បន្តនាំឆ្ពោះយកទៅគោលដៅនៅខេត្តស្វាយរៀង ដែលអ្នកស្ទឹងត្រែងនិយាយថា ឈើបាតអាងឯណាដឹកមិនចេះអស់នោះ។ បើថា «កន្ទេលធំ បន្លំដេក» ដោយមានមេព្រៃជួយទប់ជើងគ្រែផង ទើបត្រូវជាង ។
ព័ត៌មានពិស្តារនិងមានផ្សាយជូននៅកាសែតកោះសន្តិភាព ដោយមានទាំងការបំភ្លឺខ្លះៗពីអ្នកតំណាងម្នាក់។
ចំណែកឧកញ៉ា ជ័យ ដែលគេល្បីថា ជាម្ចាស់ឈើបាតអាង មិនអាចទាក់ទងសុំការបំភ្លឺបានទេ ម្សិលម៉ិញនេះ ។
ចែករំលែកព័តមាននេះ