ខេត្តបាត់ដំបង ៖ អតីតទណ្ឌិតម្នាក់ដែលធ្លាប់ជាប់ពន្ធនាគារចំនួន៣ខែ ពេលនេះត្រូវកម្លាំងសមត្ថកិច្ចចាប់ខ្លួនជាថ្មីទៀត កាលពីព្រឹកថ្ងៃទី៧ មករា ឆ្នាំ២០១៩ នៅភូមិដាំស្ពៃ សង្កាត់ស្លាកែត ក្រុងបាត់ដំបង…
ខេត្តបាត់ដំបង ៖ អតីតទណ្ឌិតម្នាក់ដែលធ្លាប់ជាប់ពន្ធនាគារចំនួន៣ខែ ពេលនេះត្រូវកម្លាំងសមត្ថកិច្ចចាប់ខ្លួនជាថ្មីទៀត កាលពីព្រឹកថ្ងៃទី៧ មករា ឆ្នាំ២០១៩ នៅភូមិដាំស្ពៃ សង្កាត់ស្លាកែត ក្រុងបាត់ដំបង បន្ទាប់ពីជនសង្ស័យម្នាក់នោះជិះម៉ូតូមួយគ្រឿងធ្វើសកម្មភាពឆក់កាបូបដៃពីស្ត្រីម្នាក់បណ្ដាលឲ្យដួលសន្លប់ កាលពីសប្ដាហ៍មុន។
មន្ត្រីការិយាល័យព្រហ្មទណ្ឌកំរិតធ្ងន់ នៃស្នងការខេត្ត បានឲ្យដឹងថា ជនសង្ស័យម្នាក់ខាងលើឈ្មោះធុច វិន ភេទប្រុស អាយុ២៧ឆ្នាំ រស់នៅភូមិដាំស្ពៃ សង្កាត់ស្លាកែត ក្រុងបាត់ដំបង។ ជនសង្ស័យម្នាក់នេះមានប្រវត្តិធ្លាប់ជាប់ពន្ធនាគារចំនួន៣ខែពីបទ«ប្រព្រឹត្តអំពើចោរកម្ម» តែមិនបានរាងចាល ឬកែខ្លួននោះទេ លុះចេញពីពន្ធនាគារមកវិញ ជនសង្ស័យម្នាក់នេះបានធ្វើសកម្មភាពឆក់កាបូបពីអ្នកដំណើរទៀត។
មន្ត្រីដដែលបានប្រាប់ថា ជនសង្ស័យម្នាក់ខាងលើត្រូវបានចាប់ខ្លួនជាថ្មី ដោយសារបានធ្វើសកម្មភាពឆក់កាបូបដៃពីស្ត្រីម្នាក់កាលពីវេលាម៉ោងជាង១០យប់ថ្ងៃទី៥ មករា នៅចំណុចក្បាលស្ពានស្លាកែត ស្ថិតក្នុងភូមិវត្តរំដួល សង្កាត់ចំការសំរោង ក្រុងបាត់ដំបង ដែលជនរងគ្រោះឈ្មោះសា រី ភេទស្រី អាយុ៣៦ឆ្នាំ រស់នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ។
សមត្ថកិច្ចបានបញ្ជាក់ថា ពេលដែលត្រូវជនសង្ស័យឆក់យកកាបូបស្ត្រីរងគ្រោះមិនបានដួលម៉ូតូទេ តែស្ត្រីរងគ្រោះបានជិះម៉ូតូដេញតាមជនសង្ស័យបណ្តាលឱ្យដួលរហូតដល់សន្លប់ និងរងរបួសស្ទើរសុសសាច់ ។
តាមប្រភពពីស្ត្រីរងគ្រោះបាននិយាយប្រាប់សមត្ថកិច្ចថា មុនពេលកើតហេតុ គាត់បានជិះម៉ូតូចេញ ពីផ្ទះក្នុងគោលបំណងទៅរកទិញថ្នាំពេទ្យ តែពេលជិះទៅដល់ផ្ទះលក់ថ្នាំពេទ្យម្ចាស់ផ្ទះបានបិទទ្វារ។
ពេលនោះគាត់ក៏បានឡើងម៉ូតូជិះត្រឡប់មកវិញ ស្រាប់តែមានជនសង្ស័យម្នាក់ជិះម៉ូតូមកពីក្រោយរួចធ្វើសកម្មភាពឆក់ យកកាបូបពីដៃគាត់ភ្លាមៗតែម្ដង។ ពេលនោះគាត់បានជិះម៉ូតូដេញតាមបណ្ដើរ និងស្រែកឲ្យគេជួយបណ្ដើរ តែពេលគាត់ជិះម៉ូតូដេញតាមជនសង្ស័យបានបន្តិចក៏ដួលម៉ូតូ បណ្តាលឱ្យគាត់សន្លប់តែម្ដង ។
ប្រភពដដែលបានបន្តថា លុះនៅព្រឹកថ្ងៃទី៦ មករា ទើបគាត់ទៅប្ដឹងសមត្ថកិច្ចឲ្យជួយស្រាវជ្រាវចាប់ជនសង្ស័យ។ ស្ត្រីរងគ្រោះបានឲ្យដឹងដែរថា នៅក្នុងកាបូបដៃដែលជនសង្ស័យសង្ស័យឆក់យកទៅនោះ មានទូរស័ព្ទចំនួន២គ្រឿង លុយខ្មែរចំនួន៧ម៉ឺនរៀល និងលុយដុល្លាចំនួន២ដុល្លារ។
ជាមួយនឹងការឃាត់ខ្លួនជាថ្មីនេះ ជនសង្ស័យ បានសារភាពថា ខ្លួនពិតជាបានជិះម៉ូតូធ្វើសកម្មភាពឆក់កាបូបពីស្ត្រីរងគ្រោះខាងលើនេះមែន ។ ជនសង្ស័យបាននិយាយថា ខ្លួនគ្មានបក្ខពួកនោះទេ គឺធ្វើសកម្មភាពតែម្នាក់ឯង ហើយជននេះបានបញ្ជាក់ថា នៅក្នុងកាបូបដែលខ្លួនឆក់យកទៅនោះមានទូរស័ព្ទចំនួន២គ្រឿង លុយដុល្លាតែជាង៥០ដុល្លារ និងលុយខ្មែរមួយចំនួនប៉ុណ្ណោះ។ ជនសង្ស័យបាននិយាយទៀតថា ខ្លួនធ្លាប់ជាប់ពន្ធនាគារចំនួន៣ខែ ដោយសារលួចទ្រព្យសម្បត្តិអ្នកដទៃ តែចំពោះបទល្មើស«ឆក់»នេះគឺខ្លួនទើបប្រព្រឹត្តលើកទី១ ក៏ត្រូវសមត្ថកិច្ចចាប់ខ្លួនជាថ្មីទៀតតែម្ដង។
លោកជេត វណ្ណនី ស្នងការរងខេត្ត បានថ្លែងថា ចំពោះករណីជនសង្ស័យម្នាក់ធ្វើសកម្មភាពឆក់កាបូបពីស្ត្រីម្នាក់ខាងលើនេះ បានធ្វើឲ្យស្ត្រីរងគ្រោះដួលរបួសយ៉ាងធ្ងន់ធ្ងររហូតដល់សន្លប់បាត់ស្មារតី ពេលព្យាយាមជិះដេញតាមជនសង្ស័យ។
លោកបានបញ្ជាក់ថា ក្រោយកើតហេតុ កម្លាំងជំនាញបានធ្វើការស្រាវជ្រាវរហូតកំណត់មុខសញ្ញាបាន និងឈានដល់ការចាប់ខ្លួនជនសង្ស័យបានម្នាក់ ហើយថែមទាំងដកហូតបាននូវវត្ថុតាងបានមកវិញទៀតផង។ ពេលនេះមន្ត្រីការិយាល័យជំនាញកំពុងសួរនាំជនសង្ស័យដើម្បីកសាងសំណុំរឿងបញ្ជូនទៅតុលាការហើយ។
ចែករំលែកព័តមាននេះ