រាជធានីភ្នំពេញ ៖ កម្ពុជាមានសមត្ថភាពផលិតថាមពលអគ្គិសនីដោយខ្លួនឯងបានកើនឡើងជាបន្ដបន្ទាប់ ដែលនាំឲ្យមានការកាត់បន្ថយការនាំចូលពីប្រទេសជិតខាងដល់កម្រិតទាបផងដែរ ។ ជាក់ស្ដែងក្នុងឆ្នាំ២០១៨កន្លងទៅ កម្ពុជាបាននាំចូលថាមពលអគ្គិសនីពីប្រទេសជិតប្រមាណតែ១៤%ប៉ុណ្ណោះនៃតម្រូវការសរុប ខណៈកាលពីប៉ុន្មានឆ្នាំមុននេះ បាននាំចូលមានំរហូតដល់ជាង២០%ឯណោះ។ ទន្ទឹមនឹងនេះ…
រាជធានីភ្នំពេញ ៖ កម្ពុជាមានសមត្ថភាពផលិតថាមពលអគ្គិសនីដោយខ្លួនឯងបានកើនឡើងជាបន្ដបន្ទាប់ ដែលនាំឲ្យមានការកាត់បន្ថយការនាំចូលពីប្រទេសជិតខាងដល់កម្រិតទាបផងដែរ ។
ជាក់ស្ដែងក្នុងឆ្នាំ២០១៨កន្លងទៅ កម្ពុជាបាននាំចូលថាមពលអគ្គិសនីពីប្រទេសជិតប្រមាណតែ១៤%ប៉ុណ្ណោះនៃតម្រូវការសរុប ខណៈកាលពីប៉ុន្មានឆ្នាំមុននេះ បាននាំចូលមានំរហូតដល់ជាង២០%ឯណោះ។ ទន្ទឹមនឹងនេះ រាជរដ្ឋាភិបាលថែមទាំងទម្លាក់ថ្លៃភ្លើងជាបន្តបន្ទាប់ផងដែរដើម្បីសម្រួលដល់ប្រជាជន ដែលជាផ្នែកមួយចូលរួមចំណែកកាត់បន្ថយភាពក្រីក្រ ។
តាមការបញ្ជាក់របស់លោក យឹម វិសិដ្ឋ ប្រធានអាជ្ញាធរអគ្គិសនីបានថ្លែងនៅក្នុងកិច្ចប្រជុំមួយកាលពីពេលថ្មីៗនេះថា ចាប់តាំងពីកម្ពុជាផលិតបានថាមពលអគ្គិសនីដោយខ្លួនឯង ដូចជាថាមពលពីស្ថានីយវារីអគ្គិសនី ថាមពលពន្លឺព្រះអាទិត្យជាបន្តបន្ទាប់មក ការនាំចូលថាមពលអគ្គិសនីពីបណ្ដាប្រទេសជិតខាង ដូចជាមកពីប្រទេសឡាវ វៀតណាម និងថៃ បានកាត់បន្ថយជាបន្តបន្ទាប់ តួយ៉ាងក្នុងឆ្នាំ២០១៨កន្លងទៅនេះការនាំចូលថាមពលអគ្គិសនីពីប្រទេសជិតខាងនៅសល់ត្រឹមតែប្រមាណ១៤%ប៉ុណ្ណោះនៃតម្រូវការសរុប ។
លោកបន្តថា ក្រៅពីកាត់បន្ថយការនាំចូលថាមពលអគ្គិសនីពីប្រទេសជិតខាងហើយនោះ កម្ពុជាក៏បានធ្វើឲ្យតម្លៃអគ្គិសនីថយចុះជាបន្តបន្ទាប់ផងដែរដើម្បីសម្រួលដល់ម្ចាស់សហគ្រាស អាជីវករ និងប្រជាពលរដ្ឋដែលកំពុងប្រើប្រាស់ថាមពលអគ្គិសនីតពីបណ្ដាញជាតិ ។ លោកមានប្រសាសន៍ថា ៖« ប្រភពថាមពលអគ្គិសនី គឺជាផលិតផលដែលសំខាន់សម្រាប់សេដ្ឋកិច្ច បើកាលណាវាមានតម្លៃកាន់តែទាប នឹងធ្វើឲ្យផលិតផលផ្សេងទៀតកាន់តែទាប ហើយវាកាន់តែសម្រួលដល់ជីវភាពរបស់ពលរដ្ឋកម្ពុជាផងដែរ »។ លោកថា ៖« ការបញ្ចុះតម្លៃអគ្គិសនីជាបន្តបន្ទាប់ គឺជាយុទ្ធសាស្ត្ររបស់រាជរដ្ឋាភិបាលក្នុងការសម្រួលដល់ជីវភាពពលរដ្ឋ »។
យោងតាមរបាយការណ៍របស់អាជ្ញាធរអគ្គិសនី ក្នុងឆ្នាំ២០១៨កន្លងទៅ ការនាំចូលប្រភពថាមពលអគ្គិសនី មកពីប្រទេសសំខាន់ៗចំនួន៣រួមមាន ប្រទេសវៀតណាម មានការនាំចូលច្រើនជាងគេ ដែលមានទំហំរហូតដល់២៧៧មេហ្កាវ៉ាត់ ខណៈនាំចូលពីប្រទេសថៃ មានទំហំ១៣៥មេហ្កាវ៉ាត់ និងពីប្រទេសឡាវនាំចូលប្រមាណ៣០មេហ្កាវ៉ាត់ ។ ដោយឡែកក្នុងឆ្នាំ ២០១៩នេះ កម្ពុជាមានផែនការនាំចូលថាមពលអគ្គិសនីពីប្រទេសជិត ក៏ប្រហាក់ប្រហែលនឹងឆ្នាំ ២០១៨កន្លងទៅដែរ ។
របាយការណ៍ដដែលបានបង្ហាញថា ប្រភពថាមពលក្នុងស្រុកសម្រាប់ឆ្នាំ២០១៨កន្លងទៅកម្ពុជាផលិតបានប្រមាណ២.២០៧មេហ្កាវ៉ាត់ ឬស្មើនឹង៨៦,៤៥%នៃតម្រូវការសរុប។ សម្រាប់ឆ្នាំ២០១៩នេះ កម្ពុជានឹងផលិតបានថាមពលអគ្គិសនីសរុបប្រមាណ២.៤២៨មេហ្កាវ៉ាត់ ឬស្មើនឹង៧៨,៨៥%នៃតម្រូវការសរុប ហើយឆ្នាំ ២០១៩នេះដែរ កម្ពុជា ត្រូវការថាមពលអគ្គិសនីសរុបប្រមាណ២.៨៧០មេហ្កាវ៉ាត់ ដែលមានកំណើនប្រមាណ១៦,១២%។
នៅក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ រាជរដ្ឋាភិបាលកម្ពុជា បានដាក់ចេញនូវការបញ្ចុះតម្លៃអគ្គិសនី,ការរៀបចំតំបន់ឧស្សាហកម្ម, ការបណ្តុះបណ្តាលធនធានមនុស្ស ដើម្បីប្រែក្លាយពីឧស្សាហកម្មដោយប្រើប្រាស់អតិពលកម្ម ទៅជាកម្លាំងពលកម្មជំនាញដែលអាចបង្កើត និងទាញយកតម្លៃបន្ថែមកាន់តែច្រើន ។
លោកបណ្ឌិត ម៉ី កល្យាណ ទីប្រឹក្សាជាន់ ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងកន្លងមកថា តម្រូវការថាមពលអគ្គិសនីនៅកម្ពុជាពិតជាត្រូវការកាន់តែច្រើនទៅៗហើយ ដោយសារកម្ពុជាកំពុងអភិវឌ្ឍន៍យ៉ាងឆាប់រហ័ស ព្រោះវិស័យអ្វីក៏ត្រូវការអគ្គិសនីដែរដើម្បីធ្វើឲ្យខ្សែសង្វាក់ផលិតកម្មបានរលូន ។
ទោះបីយ៉ាងណា លោកថ្លែងថា ៖« ថាមពលអគ្គិសនីនៅកម្ពុជានៅមានតម្លៃថ្លៃនៅឡើយ បើធៀបជាមួយប្រទេសជិតខាង ប៉ុន្តែនៅក្នុងគោលនយោបាយអភិវឌ្ឍន៍វិស័យឧស្សាហកម្ម ឆ្នាំ២០១៥-២០២៥ រាជរដ្ឋាភិបាលបានផ្តោតអាទិភាពលើការបញ្ចុះតម្លៃថាមពលអគ្គិសនីផងដែរ »។
គួរបញ្ជាក់ថា តម្លៃអគ្គិសនីក្នុងឆ្នាំ២០១៩នេះ សម្រាប់ការប្រើប្រាស់ចេញពីបណ្ដាញជាតិ ត្រូវបានរាជរដ្ឋាភិបាលកំណត់ជាថ្មី ក្នុងនោះ ការប្រើប្រាស់អស់ចាប់ពី ១គីឡូវ៉ាត់ម៉ោងដល់ ១០គីឡូវ៉ាត់ម៉ោង មានតម្លៃ៣៨០រៀល/kwh, ប្រើប្រាស់អស់ចាប់ពី១១ដល់៥០kwh មានតម្លៃ ៤៨០រៀល, ប្រើប្រាស់អស់ចាប់ពី៥១ដល់២០០kwh តម្លៃ៦១០រៀល និងប្រើប្រាស់លើសពី២០០kwh នឹងមានតម្លៃ ៧៤០រៀល/kwh ៕
ចែករំលែកព័តមាននេះ