ខេត្តកណ្តាល ៖ បុរសម្នាក់ត្រូវបានគេប្រទះឃើញដេកស្លាប់ក្នុងអង្រឹងក្បែរគុម្ពឫស្សី បង្កការភ្ញាក់ផ្អើលកាលពីវេលាម៉ោង៧និង៣០នាទីព្រឹកថ្ងៃទី៧ ខែមករា ឆ្នាំ២០១៩ នៅចំណុចខាងក្រោយផ្ទះជនរងគ្រោះប្រហែល៧០ម៉ែត្រ ស្ថិតនៅក្នុងភូមិទ្រា ឃុំព្រៃពួច ស្រុកអង្គស្នួល ខេត្តកណ្តាល។
ជនរងគ្រោះដែលស្លាប់ឈ្មោះ សន សុផារី ភេទប្រុស អាយុ៣៦ឆ្នាំ មុខរបរកសិករ ស្ថិតនៅភូមិទ្រា ឃុំព្រៃពួចស្រុកអង្គស្នួល ខេត្តកណ្តាល។
តាមការបំភ្លឺរបស់ម្តាយជនរងគ្រោះឈ្មោះស្វាយ ណាវី អាយុ៥៧ឆ្នាំ មុខរបរកសិករ រស់នៅភូមិទ្រា ឃុំព្រៃពួច ស្រុកអង្គស្នួល ខេត្តកណ្ដាល បានឲ្យដឹងថា កូនប្រុសរបស់គាត់មានជំងឺសួត និងបានទៅពិនិត្យនៅមន្ទីរពេទ្យ ហើយគ្រូពេទ្យប្រាប់ថា ហាមហូបស្រា តែកូនប្រុសរបស់គាត់ផឹកស្រាជារៀងរាល់ថ្ងៃ រហូតដល់ថ្ងៃទី៧ ខែ មករា ឆ្នាំ២០១៩ ប្រហែលម៉ោង៦និង៣០នាទីព្រឹក ឈ្មោះ សុខ ចាន់ ភេទប្រុស អាយុ១៨ឆ្នាំ មុខរបរកសិករ រស់នៅភូមិឃុំខាងលើ បានមកប្រាប់គាត់ថា ពេលខ្លួនទៅបត់ជើងធំខាងក្រោយផ្ទះ ឃើញជនរងគ្រោះដេកក្នុងអង្រឹងក្បែរគុម្ពឫស្សី ហើយក៏ស្រែកហៅ តែជនរងគ្រោះមិនឆ្លើយ ពេលនោះខ្លួនក៏ដើរទៅទាញអង្រឹង ស្រាប់តែឃើញជនរងគ្រោះស្លាប់ក្នុងអង្រឹងបាត់ទៅហើយ ។
ក្រោយមកសមត្ថកិច្ចនគរបាលផ្នែកពិនិត្យ វិភាគកន្លែងកើតហេតុស្រុកអង្គស្នួលបានចុះមកដល់កន្លែងកើតហេតុ ដោយមានការចូលរួមពីលោកក្រុមប្រឹក្សាឃុំគ្រូពេទ្យ មេភូមិ នគរបាលប៉ុស្តិ៍ និងឪពុកម្តាយរបស់ជនរងគ្រោះបានធ្វើការពិនិត្យសព ។ តាមការសន្និដ្ឋានរបស់គ្រូពេទ្យ និងជំនាញបានឱ្យដឹងថា ជនរងគ្រោះស្លាប់ដោយសារខ្យល់គ ។
បន្ទាប់ពីពិនិត្យរួច សពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ