រាជធានីភ្នំពេញ ៖ រថយន្តស៊េរីទំនើបមួយគ្រឿងសង្ស័យអ្នកបើកបរស្រវឹងស្រាបើករថយន្តមិនបានប្រយ័ត្នបានបុកខឿនពុះចែកទ្រូងផ្លូវខូចខាតអស់ចំនួន២ផ្ទាំង រថយន្តដាច់កង់ម្ខាងរងការខូចខាតយ៉ាងធ្ងន់ធ្ងរ បង្កអោយមានការភ្ញាក់ផ្អើលកាលពីវេលាម៉ោង១១យប់ ថ្ងៃទី៦ ខែមករា ឆ្នាំ២០១៩ នៅតាមបណ្ដោយផ្លូវសហព័ន្ធរុស្ស៊ីទល់មុខប្រលានយន្តហោះអន្តរជាតិភ្នំពេញ ដែលស្ថិតនៅភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ។
រថយន្តបង្កខាងលើម៉ាកឡិចស៊ីស RX-330 ពណ៌ទឹកមាស ពាក់ផ្លាកលេខ ភ្នំពេញ 2AT -9268បើកបរដោយបុរសម្នាក់ និងអ្នករួមដំណើរ២នាក់ទៀត បើកបរក្នុងទិសដៅពីកើតទៅលិច ។
តាមប្រភពព័ត៌មានពីកន្លែងកើតហេតុខាងលើបានបញ្ជាក់ប្រាប់ថា នៅមុនពេលកើតហេតុគេឃើញរថយន្តបង្កបើកក្នុងល្បឿនយ៉ាងលឿនបើកក្នុងទិសដៅពីកើតទៅលិចបានរ៉េចង្កូតបុកខឿនពុះចែកទ្រូងផ្លូវបណ្តាលឲ្យខូចខាតចំនួន២ផ្ទាំង ចំណែកឯរថយន្តបង្កវិញបណ្តាលឲ្យខ្ទៀតទទឹងផ្លូវ និងដាច់កាឡេផ្នែកខាងឆ្វេងរងការខូចខាតយ៉ាងធ្ងន់ធ្ងរ រថយន្តបង្កខាងលើ បានបែកពោងសុវត្ថិភាពដែលមិនបង្កអោយគ្រោះថ្នាក់ធ្ងន់ធ្ងរឡើយ ។
ប្រភពព័ត៌មានបានបន្តទៀតថា ខណៈគ្រោះថ្នាក់ភ្លាមៗអ្នកបើកបរ និងអ្នករួមដំណើរខាងលើ បានឡើងលើរថយន្តមួយគ្រឿងទៀតគេចខ្លួនបាត់បន្ទាប់មកកម្លាំងនគរបាលប៉ុស្តិ៍កាកាបទី២បានទាក់ទងទៅផ្នែកជំនាញចរាចរណ៍ខណ្ឌពោធិ៍សែនជ័យដើម្បីមកត្រួតពិនិត្យភ្លាមៗផងដែរ ។
ក្រោយពេលកើតហេតុរថយន្តបង្កខាងលើត្រូវបានជំនាញចរាចរណ៍ខណ្ឌពោធិ៍សែនជ័យបានប្រគល់អោយជំនាញចរាចរណ៍នៃការិយាល័យចរាចរណ៍ផ្លូវគោករាជធានីភ្នំពេញធ្វើការវាស់វែង និងស្ទូចរថយន្តយកទៅរក្សាទុកដើម្បីរង់ចាំការដោះស្រាយ ៕
ចែករំលែកព័តមាននេះ