ខេត្តសៀមរាប ៖ អគ្គិភ័យឆាបឆេះផ្ទះប្រជាពលរដ្ឋ១ខ្នង៤ម៉ែត្រគុណនឹង៥ម៉ែត្រអស់ទាំងស្រុង និងរាលដាលដល់វាលស្មៅដែលនៅជិតនោះអស់ប្រមាណ២ហិកតាផងដែរ កាលពីវេលាម៉ោង១១និង១០នាទីថ្ងៃត្រង់ថ្ងៃទី០៦ ខែមករា ឆ្នាំ២០១៩ នៅចំណុចភូមិអញ្ចាញ សង្កាត់នគរធំ ក្រុង-ខេត្តសៀមរាប ។
លោកឧត្តមសេនីយ៍ត្រី ភឹង សម្បត្តិ ស្នងការរងទទួលការិយាល័យនគរបាលបង្ការពន្លត់អគ្គិភ័យ និងសង្គ្រោះបានប្រាប់ថា ផ្ទះប្រជាពលរដ្ឋចំនួន០១ខ្នងទំហំ៤ម៉ែត្រគុណ៥ម៉ែត្រ ប្រភេទឈើដំបូលប្រក់សង្ក័សី ជញ្ជាំងស្លឹករបស់គ្រួសារឈ្មោះ វ៉ាន់ ឡង អាយុ៣២ឆ្នាំ និងប្រពន្ធឈ្មោះ ហិប ពៅ អាយុ២៤ឆ្នាំ មុខរបរដាំបន្លែលក់ មានកូនចំនួនម្នាក់ក្នុងបន្ទុក ។
លោកបានបញ្ជាក់ថា ករណីឆេះផ្ទះរបស់ពួកគាត់នេះបានធ្វើខូចខាតរួមមានផ្ទះមួយខ្នងទំហំ៤ម៉ែត្រគុណ៥ម៉ែត្រ ខូចខាតទាំងស្រុងកង់ចំនួន០២គ្រឿង ទូរទស្សន៍ប្រភេទ LCD មួយគ្រឿង លុយដុល្លារចំនួន១២០០ដុល្លារ សម្ភារផ្ទះបាយ និងសំលៀកបំពាក់ខូចខាតទាំងស្រុង សំបុត្រកំណើត និងឯកសារផ្សេងៗទៀតមួយចំនួន ហើយបានឆាបឆេះ រាលដាលដល់វាលស្មៅ និង ព្រៃដែលនៅក្បែរផ្ទះគាត់អស់ទំហំប្រហែល០២ហិកតាផងដែរ ប៉ុន្តែពុំរាលដាលដល់ផ្ទះបងប្អូនប្រជាពលរដ្ឋទៀតឡើយ ។
មូលហេតុម្ចាស់ផ្ទះមិននៅមានក្មេងទៅលេងក្បែរ ហើយប្រើដែកកេះបង្កាត់ភ្លើងលេង បណ្ដាលឲ្យឆាបឆេះជញ្ចាំងផ្ទះ ហើយឆេះរាលដាលតែម្តង ។ ក្នុងពេលកើតហេតុត្រូវបានកម្លាំងនគរបាលនៃស្នងការដ្ឋាននគរបាលខេត្តសៀមរាបប្រើប្រាស់រថយន្តអស់ចំនួន ០១ គ្រឿង បាញ់ទឹកពន្លត់ ដើម្បីទប់ស្កាត់មិនឲ្យរាលដាលដល់លំនៅដ្ឋានបងប្អូនប្រជាពលរដ្ឋផ្សេងទៀតរហូតដល់១៣ និង៣០នាទី ទើបរលត់អស់ទាំងស្រុង ៕
ចែករំលែកព័តមាននេះ