ខេត្តកោះកុង ៖ កាលពីព្រឹកថ្ងៃទី៥ មករា កម្ពស់ទឹកសមុទ្របានហក់ឡើងខ្ពស់រលកធំៗហួសពីការស្មាន ដោយលាយឡំទៅដោយខ្យល់បក់បោកខ្លាំង បង្កឱ្យមានរលកធំៗ វាយប្រហារមកលើលំនៅឋាន និងតូបលក់ដូរជាច្រើនកន្លែង បណ្តាលឱ្យរងការខូចខាតមួយចំនួនធំនៅឆ្នេរប៉ាក់ខ្លង…
ខេត្តកោះកុង ៖ កាលពីព្រឹកថ្ងៃទី៥ មករា កម្ពស់ទឹកសមុទ្របានហក់ឡើងខ្ពស់រលកធំៗហួសពីការស្មាន ដោយលាយឡំទៅដោយខ្យល់បក់បោកខ្លាំង បង្កឱ្យមានរលកធំៗ វាយប្រហារមកលើលំនៅឋាន និងតូបលក់ដូរជាច្រើនកន្លែង បណ្តាលឱ្យរងការខូចខាតមួយចំនួនធំនៅឆ្នេរប៉ាក់ខ្លង ក្នុងស្រុកមណ្ឌលសីមា ។
បាតុភូតរលកសមុទ្រធំៗនេះ បានកើតឡើងបន្ទាប់ពីមានសេចក្តីរាយការណ៍ថា ព្យុះ PABUK បានវាយប្រហារតំបន់កោះនានា ក្នុងឈូងសមុទ្រថៃ កាលពីថ្ងៃទី៣ មករា ធ្វើឱ្យអាជ្ញាធរថៃ បានជម្លៀសមនុស្សជិត៣ម៉ឺននាក់ ទៅកាន់ជម្រកនានា ដោយសារតែបារម្ភពីឥទ្ធិពលព្យុះនេះ ។
បើតាមការរៀបរាប់ពីក្រុមអាជីវករ ដែលជាអ្នកលក់ដូរនៅតំបន់ខាងលើបានថ្លែងថា នេះជាលើកទី១ហើយ ដែលពួកគាត់បានឃើញមានការហក់ឡើង គឺហូរហៀរលិចមកដល់ក្យូសលក់ដូរនៃកម្ពស់ទឹកសមុទ្រខ្ពស់បែបនេះ ហើយពួកគាត់កំពុងតែមានការព្រួយបារម្ភថា បើសិនជាទឹកសមុទ្រ និងរលកអាចកើតមានខ្លាំងជាងនេះ វាពិតជាអាចបង្កឱ្យរងគ្រោះថ្នាក់ និងផលប៉ះពាល់ខ្លាំងជាក់ជាមិនខានឡើយ ។
ប្រភពខាងលើបានបន្តថា ពេលនេះពួកគាត់កំពុងដឹកជញ្ជូនសម្ភារះមួយចំនួន យកទៅកាន់ទីទួលមាន
សុវត្ថិភាព ដើម្បីបញ្ចៀសនូវឧបទ្ទវហេតុុផ្សេងៗដែលអាចកើតឡើងជាយថាហេតុ ។ លោក ហាក់ ឡេង អភិបាលស្រុកមណ្ឌលសីមាបានថ្លែងថា ចំពោះមុខលោកត្រូវបញ្ឈប់រថយន្តដឹកដី និងរថយន្តដឹកទំនិញធុនធំជាបណ្តោះអាសន្នសិន រង់ចាំទឹកស្រកដូចដើមទើបអាចបើកអោយធ្វើចរាចរណ៍ជាធម្មតាឡើងវិញបាន ។
លោកបានឱ្យដឹងថា ចំពោះបញ្ហាទឹកឡើងនេះ គឺវាបានកើតឡើងជារៀងរាល់ឆ្នាំ តែដោយឡែកឆ្នាំនេះ គឺថា ស្ថានភាពទឹកឡើងខ្ពស់ហួសពីការរំពឹងទុក ហើយនេះក៏ប្រហែលជាអាចបណ្តាលមកពីចំហាយព្យុះដែលឆ្លងកាត់ប្រទេសថៃនោះ តែទោះជាយ៉ាងណាក្តីមកទល់និងពេលនេះឃើញថា ពុំមានពលរដ្ឋណាម្នាក់បាត់បង់អាយុជីវិត ដោយសារហេតុការនេះទេ ដោយគ្រាន់តែមានពលរដ្ឋខ្លះបានរងផលប៉ះពាល់ដល់លំនៅឋានពួកគាត់បន្តិចបន្ទួចប៉ុណ្ណោះ ហើយចំពោះការជម្លៀសពលរដ្ឋចេញពីតំបន់ខាងលើគឺនៅពុំទាន់មាននោះឡើយ ដោយសារសភាពការណ៍ និងផលប៉ះពាល់វាមានសភាពមិនធ្ងន់ធ្ងរប៉ុន្មាននោះទេ ។
ជាមួយគ្នានេះដែរ លោក ហាក់ ឡេង អភិបាលស្រុកមណ្ឌលសីមា ក៏បានអំពាវនាវដល់បងប្អូនដែលរស់នៅតំបន់ជាប់មាត់សមុទ្រ មេត្តាបង្កើនការប្រុងប្រយ័ត្នអោយបានខ្ពស់ដើម្បីចៀសវាងនូវឧប្បត្តិហេតុដែលអាចនិងកើតមានដោយចៃដន្យ ។
គូររំលឹកថា កាលពីថ្ងៃទី២ ខែមករា ឆ្នាំ២០១៩ ក្រសួងធនធានទឹក និងឧតុនិយម បានចេញសេចក្តីប្រកាសពីឥទ្ធិពលរបស់ព្យុះប៉ាប៊ុក (PABUK) ដោយព្យុះនេះ បាននិវត្តន៍ខ្លួនទៅជាព្យុះទីហ្វុង (TI PABUK) រួចបន្តដំណើរទៅកាន់ ភាគខាងត្បូងប្រទេសថៃ ដែលលក្ខណៈនេះអាចធ្វើអោយខេត្តមួយចំនួន មានភ្លៀងធ្លាក់ពីតិចទៅមធ្យម ។
ជាមួយគ្នានេះដែរ ក្រសួងធនធានទឹក និងឧតុនិយមបានអំពាវនាវ អោយបងប្អូនប្រជានេសាទ និងអ្នកធ្វើដំណើរតាមផ្លូវទឹក ពិសេសពលរដ្ឋដែលរស់នៅតាមបណ្តាកោះនានា ត្រូវបង្កើនការប្រុងប្រយ័ត្នចំពោះបាតុភូតព្យុះ ដែលអាចបង្ករអោយកើតមានភ្លៀងលាយឡំ ជាមួយខ្យល់បក់បោកខ្លាំង និងរលកទឹកសមុទ្រ
ខ្ពស់ ។
ចែករំលែកព័តមាននេះ