រាជធានីភ្នំពេញ ៖ សេចក្តីរាយការណ៍បឋមឱ្យដឹងថា មានការប្រទះឃើញរថយន្តរួមទាំងសាកសពមនុស្សមានរុំថង់ប្លាស្ទិកក្នុងរថយន្តចតចោលនៅក្បែរចេតិយ៍ បង្កការភ្ញាក់ផ្អើលយ៉ាងខ្លាំង នាព្រឹកថ្ងៃទី០៧ មករា នេះ ស្ថិតក្នុងវត្ត«តាំងកសាងខាងត្បូង»ក្នុងភូមិចំការឪឡឹក សង្កាត់កាកាប២…
រាជធានីភ្នំពេញ ៖ សេចក្តីរាយការណ៍បឋមឱ្យដឹងថា មានការប្រទះឃើញរថយន្តរួមទាំងសាកសពមនុស្សមានរុំថង់ប្លាស្ទិកក្នុងរថយន្តចតចោលនៅក្បែរចេតិយ៍ បង្កការភ្ញាក់ផ្អើលយ៉ាងខ្លាំង នាព្រឹកថ្ងៃទី០៧ មករា នេះ ស្ថិតក្នុងវត្ត«តាំងកសាងខាងត្បូង»ក្នុងភូមិចំការឪឡឹក សង្កាត់កាកាប២ ខណ្ឌពោធិ៍សែនជ័យ ដោយម្នាក់ៗសង្ស័យថា អាចជាករណីសម្លាប់រួចយកឡាននិងសពប្លុងចោលនៅទីនេះ ។
សេចក្តីរាយការណ៍បន្តថា អ្វីនឹកស្មានមិនដល់ នៅពេលពេលដែលកំពុងភ្ញាក់ផ្អើលខ្លាំង ក៏បានលេចមុខបុរសម្នាក់មកអះអាងថា ជាម្ចាស់ឡាននិងជាអ្នកដឹកសាកសពមកកាន់វត្តនេះ តាំងពីម៉ោង០២អធ្រាត្រម្ល៉េះដើម្បីបូជា ។ ប្រភពបន្តថា ប៉ុន្តែពេលបើករថយន្តមកដល់វត្ត មិនបានជួបលោកតាអាចារ្យ ហើយក៏ងងុយផងបានទុករថយន្ត និងសាកសពសិនហើយបានទៅដេករហូតដល់ម៉ោងដែលភ្ញាក់ផ្អើលនេះ ។
ទោះបីជាយ៉ាងណា នៅមិនស្គាល់ឈ្មោះអ្នកបើកបររូបនេះទេ ដោយភ្លាមៗត្រូវ សមត្ថកិច្ចឃាត់ខ្លួនយកទៅសាកសួរបន្ថែមនៅប៉ុស្តិ៍ ទើបបានដឹងរឿងរ៉ាវច្បាស់ ។
បុរសខាងលើបាននិយាយថា សាកសពគឺបានស្លាប់នៅក្នុងហេតុការណ៍គ្រោះថ្នាក់ចរាចរណ៍មួយកាលពីយប់ស្ថិតនៅចំណុចមុខវត្តជ្រោយអំពិល ។ ហើយរូបគេជាអ្នកដឹកសាកសពបានទៅយក ដោយមានលិខិតស្នាមត្រឹមត្រូវផងដែរ (លិខិតមកបង្ហាញសមត្ថកិច្ចដែរ) ។
សាកសពគឺមានឈ្មោះ រស់ ចាន់វាសនា អាយុ២៩ឆ្នាំ មានទីលំនៅក្នុងភូមិឧកញ៉ាប៉ាង ឃុំកំពង់ត្រឡាច ស្រុកលំពង់ត្រឡាច ខេត្តកំពង់ឆ្នាំង ។ ជិះម៉ូតូម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ1AG-4433 ហើយក៏ជួបគ្រោះថ្នាក់រហូតដល់ស្លាប់តែម្តង ។
ព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ