រាជធានីភ្នំពេញ ៖ ជនសង្ស័យម្នាក់ និងបក្ខពួកបានធ្វើសកម្មភាពឆក់យកទូរស័ព្ទដៃម៉ាក iPhone XS Max ពីបុរសជនជាតិសិង្ហបុរីម្នាក់បានសម្រេច ហើយព្យាយាមរត់គេច ក៏ត្រូវបានកម្លាំងល្បាតប៉ុស្តិ៍ទន្លេបាសាក់ប្រទះឃើញ និងធ្វើការដេញចាប់បានជនសង្ស័យម្នាក់ភ្លាមៗយកមកសួរនាំនៅប៉ុស្តិ៍នគរបាល។
ហេតុការណ៍ខាងលើនេះបានកើតឡើងកាលពីវេលាម៉ោង៩នឹង១៥នាទីយប់ថ្ងៃទី៦ ខែមករា នៅតាមបណ្ដោយផ្លូវ៣១២ កែងនឹងផ្លូវ សុធារស សង្កាត់ទន្លេបាសាក់ ខណ្ឌចំការមន។
ជនសង្ស័យម្នាក់ខាងលើដែលត្រូវសមត្ថកិច្ចឃាត់ខ្លួនឈ្មោះឡេង ពន្លឺ ភេទប្រុស អាយុ១៨ឆ្នាំ ស្នាក់នៅផ្ទះគ្មានលេខ ភូមិយួន សង្កាត់ព្រែកប្រា ខណ្ឌច្បារអំពៅ។ ចំណែកជនរងគ្រោះឈ្មោះ lim cha yee ភេទប្រុស ជាជនជាតិសិង្ហបុរី ស្នាក់នៅខុនដូទ្រីលាម បន្ទប់លេខ8A ផ្លូវ៣១២ សង្កាត់ទន្លេបាសាក់ ខណ្ឌចំការមន។
ប្រភពព័ត៌មានពីជនរងគ្រោះបានប្រាប់ឱ្យដឹងថា មុនកើតហេតុ គាត់ទើបតែចេញពីខុនដូដែលជាកន្លែងស្នាក់នៅ រួចដើរតាមផ្លូវ៣១២ និងមានកាន់ទូស័ព្ទមួយគ្រឿងនៅនឹងដៃ ស្រាប់តែជនសង្ស័យមានគ្នាចំនួន៤នាក់ជិះម៉ូតូ២គ្រឿង បានធ្វើសកម្មភាពឆក់ទូរស័ព្ទពីដៃរបស់គាត់បានសម្រេច ហើយគាត់ដឹងខ្លួនទាន់ក៏ចាប់ដៃជនសង្ស័យជាប់ បណ្តាលអោយធ្លាក់ពីលើម៉ូតូ រីឯទូរស័ព្ទក៏ធ្លាក់បណ្តាលអោយបែកខ្ទេច ។
ភ្លាមៗនោះជនសង្ស័យបានព្យាយាមរត់គេច ក៏ត្រូវកម្លាំងសមត្ថកិច្ចល្បាតប៉ុស្តិ៍នគរបាលទន្លេបាសាក់ដែលកំពុងល្បាតក្នុងមូលដ្ឋានប្រទះឃើញ ក៏ធ្វើការដេញចាប់ឃាត់ខ្លួនបានម្នាក់ភ្លាមៗតែម្តង ចំណែកបក្ខពួករបស់ជនសង្ស័យផ្សេងទៀត រត់គេចខ្លួនបាត់ស្រមោល។
ក្រោយកើតហេតុ ជនសង្ស័យត្រូវបានកម្លាំងសមត្ថកិច្ចប៉ុស្តិ៍នគរបាលទន្លេបាសាក់ឃាត់ខ្លួនយកទៅសួរនាំនៅប៉ុស្តិ៍នគរបាលទន្លេបាសាក់ និងកសាងសុំណុំរឿងបញ្ជូនទៅតុលាការចាត់ការបន្តតាមនីតិវិធី ៕
ចែករំលែកព័តមាននេះ